ຂປລ. ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ນະຄອນຫລວງວຽງຈັນ (ສປນວ) ຊຸດທີ II ໃນວັນທີ 12 ກໍລະກົດ 2024 ພາຍໃຕ້ການເປັນປະທານຂອງ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ, ບັນດາສະມາຊິກສະພາປະຊາຊົນ ນະຄອນຫລວງວຽງຈັນ (ສສນວ), ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ ໄດ້ສຸມໃສ່ປະກອບຄຳຄິດຄຳເຫັນ ໃສ່ບົດລາຍງານການຈັດຕັ້ງປະຕິບັດ ວຽກງານຂອງຂົງເຂດຕຸລາການ ທັງໝົດ 4 ອົງການ ເປັນຕົ້ນ ບົດລາຍງານຂອງສານປະຊາ ຊົນ, ອົງການໄອຍະການປະຊາຊົນ ພາກກາງ ແລະ ບົດລາຍງານຂອງສານປະຊາຊົນ, ອົງການໄອຍະການປະຊາຊົນ ນະຄອນຫລວງວຽງຈັນ ທີ່ສະເໜີໂດຍ ພາກສ່ວນທີ່ກ່ຽວຂ້ອງ. ຈາກນັ້ນ, ທ່ານ ນະຄະເສນ ສີຫາລາດ ເລຂາທິການສະພາປະຊາຊົນນະຄອນຫລວງວຽງຈັນ ໄດ້ຂຶ້ນສະເໜີຮ່າງ ມະຕິວ່າດ້ວຍການຮັບຮອງ ເອົາບົດລາຍງານດັ່ງກ່າວ ໂດຍ ສສຊ, ສສນວ ໄດ້ພ້ອມກັນລົງຄະແນນສຽງ ຮັບຮອງເອົາ ບົດລາຍງານດັ່ງກ່າວ, ດ້ວຍຄະແນນສຽງ ເຫັນດີເປັນສ່ວນຫລາຍ.

ຜ່ານການຄົ້ນຄວ້າພິຈາລະນາ ​ແລະ ປະກອບ​ຄຳ​ຄິດ​ຄຳ​ເຫັນ ຢ່າງເລິກເຊິ່ງ ຂອງສະ​ມາຊິກ​ສະ​ພາ​ແຫ່ງ​ຊາດປະ​ຈໍາເຂດເລືອກຕັ້ງທີ 1 ແລະ ສະມາຊິກສະ​ພາ​ປະ​ຊາ​ຊົນ​ ນະ​ຄອນຫລວງວຽງຈັນ, ກອງປະຊຸມຕົກລົງ ຮັບຮອງ​ເອົາບົດລາຍງານຂອງສານປະຊາຊົນ, ອົງການໄອຍະການປະຊາຊົນ ພາກກາງ ແລະ ສານປະຊາຊົນ, ອົງການໄອຍະການປະຊາຊົນ ນະ​ຄອນຫລວງວຽງ​ຈັນ ໃນ​ໄລ​ຍະ 6 ເດືອນ​ຕົ້ນ​ປີ 2024 ເຊິ່ງ ກອງ​ປະຊຸມ ໄດ້​ສະ​ແດງ​ຄວາມ​ຊົມ​ເຊີຍ ແລະ ຮັບຮອງເອົາບົດລາຍງານ​ ການເຄື່ອນໄຫວວຽກງານ ຂອງທັງ 4 ອົງການ ທີ່ໄດ້ຕັ້ງໜ້າຈັດ​ຕັ້ງຜັນ​ຂະ​ຫຍາຍ ມະຕິກອງປະຊຸມ ສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II ດ້ວຍຄວາມຮັບຜິດ ຊອບສູງ ມີຜົນສໍາເລັດຫລາຍດ້ານ ເປັນຕົ້ນ ການ​ຕີ​ລາ​ຄາການຈັດຕັ້ງປະຕິບັດ ວຽກງານວິຊາສະເພາະ ຫລາຍດ້ານ ສາ ມາດປະຕິບັດໄດ້ຕາມຄາດໝາຍ ໂດຍສະເພາະ ​ການ​ພິ​ຈາ​ລະ​ນາ​ຕັດ​ສິນ​ຄະ​ດີ, ອັດຕາການຂໍອຸທອນຕໍ່າ, ການສັ່ງຟ້ອງຜູ້ຖືກຫາຂຶ້ນສານ ແລະ ການຕິດຕາມກວດກາການ​​ປະ​ຕິ​ບັດ​ກົດ​ໝາຍ ​ໃນ​ການດໍາເນີນ​ຄະ​ດີ​ຢູ່​ສານ, ການ​ຈັດ​ຕັ້ງ​ຜັນ​ຂະ​ຫຍາຍ​ຄໍາຂວັນ 3 ມີ 4 ຮັບ​ປະ​ກັນ ຂອງອົງການໄອຍະການປະຊາຊົນ ລວມ​ທັງ​ການກໍ່​ສ້າງ ແລະ ບັນ​ຈຸ​ຊັບ​ປ່ຽນ​ ບ່ອນ​ປະ​ຈໍາການ ຂອງ​ບຸກ​ຄະ​ລາ​ກອນ ​ຂອງ​ສານປະ​ຊາ​ຊົນ ແລະ ​ອົງ​ການໄອ​ຍະ​ການ​ປະ​ຊາ​ຊົນ ເພື່ອເຮັດໃຫ້ການຈັດ ຕັ້ງມີຄວາມເຂັ້ມແຂງ, ສ້າງຄວາມເຊື່ອໝັ້ນໃຫ້ແກ່ສັງຄົມຕໍ່ລະບົບຍຸຕິທໍາ ເຊິ່ງເປັນ​ການປະກອບສ່ວນ​ເຂົ້າ​ໃນ​ ວຽກ​ງານປົກປັກຮັກສາຄວາມສະຫງົບ ​ແລະ ຄວາມເປັນລະບຽບຮຽບຮ້​ອຍຂອງ​ສັງຄົມ, ​ເຮັດ​ໃຫ້ການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍດີ​ຂຶ້ນເທື່ອລະກ້າວ.

ພ້ອມນີ້, ຍັງໄດ້ຮັບຮອງເອົາວິ​ທີ​ການ​ ແລະ ມາດ​ຕະ​ການ​ແກ້​ໄຂ​ຂໍ້​ຄົງ​ຄ້າງ ຂອງສານປະຊາຊົນ, ອົງການໄອຍະການປະຊາຊົນ ພາກກາງ ແລະ ສານປະຊາຊົນ, ອົງການໄອຍະການປະຊາຊົນ ນະຄອນຫລວງວຽງຈັນ ເຊິ່ງກອງປະຊຸມເຫັນດີ​ຕໍ່ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2024. ພ້ອມ​ກັນ​ນັ້ນ​, ກອງປະຊຸມ ຍັງໄດ້ເຫັນດີ ແລະ ຮັບ​ຮອງ​ເອົາວິ​ທີ​ການ​ແກ້​ໄຂ ​ດ້ານ​ອ່ອນ​ຂໍ້​ຄົງ​ຄ້າງ ຕາມ​ທີ່​ແຕ່ລະອົງການໄດ້​ລາຍ​ງານ​ໃນ​ກອງ​ປະ​ຊຸມ. ພ້ອມທັງ ຮັບ​ຮອງ​ເອົາ​ບົດ​ລາຍ​ງານ​ ການ​ປະ​ຕິ​ບັດ​ຄໍາຕັດ​ສິນ​ຂອງ​ສານ ໃນ​ໄລ​ຍະ 6 ເດືອນ​ຕົ້ນ​ປີ 2024 ແລະ ການ​ຈັດ​ຕັ້ງ​ປະ​ຕິ​ບັດ​ ດໍາລັດວ່າ​ດ້ວຍ​ຊັບ​ສິນ​ທີ່​ຖືກ​ຍຶດ, ອ​າ​ຍັດ ແລະ ຮິບ​ເປັນ​ຂອງ​ລັດ ກອງ​ປະ​ຊຸມ​ຊົມ​ເຊີຍ ແລະ ເຫັນ​ດີ​ຕໍ່​ການ​ຕີ​ລາ​ຄາ ​​ການປະ​ຕິ​ບັດ​ຄໍາຕັດ​ສິນ​ຂອງ​ສານ ໃນ​ໄລ​ຍະ 6 ເດືອນ​ຕົ້ນ​ປີ 2024 ແລະ ການ​ຈັດ​ຕັ້ງ​ປະ​ຕິ​ບັດ​ດໍາລັດ ວ່າ​ດ້ວຍ​ຊັບ​ສິນ​ທີ່​ຖືກ​ຍຶດ, ອ​າ​ຍັດ ແລະ ຮິບ​ເປັນ​ຂອງ​ລັດ ​ຂອງກອງ​ປະ​ຕິ​ບັດ ​ຄໍາຕັດ​ສິນ​ຂອງ​ສານ​ ທີ່​ໄດ້​ເອົາ​ໃຈ​ໃສ່ ແລະ ຮັບ​ຜິດ​ຊອບ​ຕໍ່​ໜ້າ​ທີ່​ການ​ເມືອງ ເຊິ່ງ​ໄດ້​ສ່ອງ​ແສງເຖິງຜົນ​ສໍາເລັດ​​​ດ້ານຕັ້ງ​ໜ້າ, ດ້ານ​ອ່ອນ, ​ຂໍ້​ຄົງ​ຄ້າງໃນ​ວຽກ​ງານ ​ການ​ປະ​ຕິ​ບັດ​ຄໍາຕັດ​ສິນ​ຂອງ​ສານ. ພ້ອມນີ້, ຍັງໄດ້ຮັບ​ຮອງ​ເອົາ​ມາດ​ຕະ​ການ ແລະ ວິ​ທີ​ແກ້​ໄຂ​ ໃນ​ການ​ປະ​ຕິ​ບັດ​ຄໍາຕັດ​ສິນ​ຂອງ​ສານ ແລະ ການ​ຈັດ​ຕັ້ງ​ປະ​ຕິ​ບັດດໍາລັດ ວ່າ​ດ້ວຍ​ຊັບ​ສິນ​ທີ່​ຖືກ​ຍຶດ, ອ​າ​ຍັດ ແລະ ຮິບ​ເປັນ​ຂອງ​ລັດ ຕື່ມອີກ.

ຂ່າວ: ທະນູທອງ

ພາບ: ເກດສະໜາ

KPL