ຂປລ. ເມື່ອບໍ່ດົນມານີ້,  ຢູ່ເມືອງວັງວຽງ ແຂວງວຽງຈັນ, ສະພາແຫ່ງຊາດ ໄດ້ສືບຕໍ່ດໍາເນີນກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ໂດຍການເປັນປະທານຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ມີບັນດາປະທານ-ຮອງປະທານກຳມາທິການ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງລັດຖະ ມົນຕີກະຊວງຍຸຕິທຳ, ຄະນະທີ່ປຶກສາທາງດ້ານກົດໝາຍ, ຫົວໜ້າ-ຮອງຫົວໜ້າກົມ ແລະ ພະນັກງານທີ່ກ່ຽວຂ້ອງຂອງສະພາແຫ່ງຊາດເຂົ້າຮ່ວມ.
   ໃນກອງປະຊຸມຄັ້ງນີ້, ໄດ້ຮັບຟັງລາຍງານໂດຍຫຍໍ້ ກ່ຽວກັບການປັບປຸງກົດໝາຍວ່າດ້ວຍການທ່ອງ ທ່ຽວ (ສະບັບປັບປຸງ) ຈາກທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ. ຈາກນັ້ນ, ຜູ້ເຂົ້າຮ່ວມໄດ້ສືບຕໍ່ຄົ້ນຄວ້າເນື້ອໃນຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ເພື່ອຮັບປະກັນທາງດ້ານເນື້ອໃນຂອງຮ່າງກົດໝາຍດັ່ງກ່າວ ທີ່ຈະນຳເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃຫ້ມີການຄົ້ນຄວ້າເຮັດໃຫ້ຮ່າງກົດໝາຍມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະ ໂຍບາຍຂອງລັດ, ລັດຖະທຳມະນູນ, ກົດໝາຍອື່ນ, ສົນທິສັນຍາສາກົນ ທີ່ ສປປ ລາວ ເປັນພາຄີ ແລະ ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ, ເພື່ອເປັນການລະດົມສະຕິປັນຍາຈາກພາກສ່ວນທີ່ກ່ຽວ ຂ້ອງກັບການສ້າງ ແລະ ປັບປຸງກົດໝາຍ ກ່ອນນຳສະເໜີກອງປະຊຸມຄະນະປະຈຳສະພາແຫ່ງຊາດ ພິຈາລະນານຳເຂົ້າກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.
   ໂອກາດນີ້, ທ່ານ ພົນໂທ ສຸວອນ ເລືອງບຸນມີ ໄດ້ໃຫ້ຮູ້ວ່າ: ກອງປະຊຸມກວດກາເນື້ອໃນຮອບດ້ານ ຂອງຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ໃນຄັ້ງນີ້, ໄດ້ດໍາເນີນເປັນເວລາ 2 ວັນເຕັມ ເຊິ່ງໄດ້ດຳເນີນໄປດ້ວຍຄວາມຮັບຜິດຊອບສູງຂອງບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ແລະ ດໍາເນີນດ້ວຍບັນຍາກາດຟົດຟື້ນ ກົງໄປກົງມາດ້ວຍເຫດ ແລະ ຜົນ, ເຮັດໃຫ້ກອງປະຊຸມໃນຄັ້ງນີ້ ສາມາດບັນລຸຜົນສໍາເລັດໂດຍພື້ນຖານ. ຜ່ານການຄົ້ນຄວ້າ, ປະກອບຄໍາເຫັນຂອງບັນດາທ່ານຜູ້ແທນ ເຫັນວ່າສາມາດເຫັນດີເປັນເອກະພາບຕໍ່ການປັບປຸງຂອງຄະນະຮັບຜິດຊອບ ແລະ ກອງເລຂາ. ພ້ອມກັນນັ້ນ, ກໍຍັງມີຫລາຍມາດຕາ ທີ່ພວກເຮົາຍັງມີຄໍາເຫັນແຕກຕ່າງກັນ ເຊິ່ງຈະໄດ້ສືບຕໍ່ນໍາໄປຄົ້ນຄວ້າ, ປັບປຸງ ກ່ອນຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.

KPL