ຂປລ
ເມື່ອບໍ່ດົນມານີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຂັ້ນສູງສະຖາບັນການເມືອງແຫ່ງຊາດ ໂຮ່ຈີ່ມິງ ແລະ ສະຖາບັນ ບັນດິດວິທະຍາສາດສັງຄົມຫວຽດນາມ,
ຂປລ. ນຳໂດຍສະຫາຍ ດວານ ມິງ ຮວັນ ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດໂຮ່ຈີ່ມິງ, ຮອງປະທານສະພາທິດສະດີສູນກາງພັກກອມມູນິດຫວຽດນາມ ໃນໂອກາດເດີນທາງມາຢ້ຽມຢາມ ແລະ ເຮັດວຽກຮ່ວມກັບສະຖາບັນການເມືອງ ແລະ ການປົກຄອງແຫ່ງຊາດ ແລະ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.
ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ຜົນສຳເລັດຂອງການເຮັດວຽກຮ່ວມກັນລະຫວ່າງຄະນະຜູ້ແທນຫວຽດນາມ ກັບສະຖາບັນການເມືອງ ແລະ ການປົກຄອງແຫ່ງຊາດ ແລະ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຂອງ ສປປ ລາວ. ພ້ອມທັງ, ຊີ້ນໍາໃຫ້ບັນດາສະຖາບັນຂອງທັງສອງຝ່າຍສືບຕໍ່ຜັນຂະຫຍາຍຜົນຂອງການປຶກສາຫາລືໃນຄັ້ງນີ້ ໃຫ້ກາຍເປັນແຜນງານ ແລະ ໂຄງການຮ່ວມມືຕົວຈິງທີ່ແຫລມຄົມ, ເລິກເຊິ່ງ ແລະ ມີປະສິດທິຜົນສູງຂຶ້ນກວ່າເກົ່າ. ສະຫາຍ ດວານ ມິງ ຮວັນ ກໍໄດ້ສະແດງຄວາມຂອບໃຈຕໍ່ສະຫາຍເລຂາທິການໃຫຍ່, ປະທານປະເທດ ທອງລຸນ ສີສຸລິດ ທີ່ໄດ້ໃຫ້ກຽດຕ້ອນຮັບຢ່າງສົມກຽດ ແລະ ອົບອຸ່ນ, ພ້ອມທັງໄດ້ນຳເອົາຄວາມຢ້ຽມຢາມຖາມຂ່າວອັນສະໜິດສະໜົມ ແລະ ພອນໄຊອັນປະເສີດຈາກຄະນະການນຳຂັ້ນສູງຂອງພັກ, ລັດ ຫວຽດນາມ ມາຍັງສະຫາຍ ທອງລຸນ ສີສຸລິດ ແລະ ບັນດາການນຳຂອງລາວ.
ການເຂົ້າຢ້ຽມຂໍ່ານັບໃນຄັ້ງນີ້, ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບອັນດູດດື່ມ, ສະແດງເຖິງຄວາມສາມັກຄີພິ ເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ລາວ- ຫວຽດນາມ ທີ່ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນ, ປະກອບສ່ວນອັນສຳຄັນເຂົ້າໃນການຮັດແໜ້ນຮາກຖານທາງດ້ານອຸດົມການການເມືອງ ແລະ ຊຸກຍູ້ພາລະກິດການປົກຄອງ ແລະ ການພັດທະນາປະເທດຊາດຂອງສອງປະເທດ ໃຫ້ກ້າວຂຶ້ນຢ່າງໜັກແໜ້ນ. ທັງສະແດງໃຫ້ເຫັນເຖິງຄວາມສຳຄັນທາງດ້ານການເມືອງ ແລະ ທິດສະດີແນວຄິດລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ການຮ່ວມມືຢ່າງເລິກເຊິ່ງລະຫວ່າງບັນດາສະຖາບັນຄົ້ນຄວ້າທິດສະດີການເມືອງ ແລະ ວິທະຍາສາດສັງຄົມຂອງສອງປະເທດຖືເປັນກຳລັງແຮງຫລັກແຫລ່ງໃນການປົກປ້ອງ, ເສີມຂະຫຍາຍ ແລະ ພັດທະນາແນວທາງກໍ່ສ້າງສັງຄົມນິຍົມໃຫ້ສອດຄ່ອງກັບສະພາບຄວາມເປັນຈິງຂອງແຕ່ລະປະເທດໃນຍຸກສະໄໝໃໝ່.
KPL
