ຂປລ
ການບັນລຸການເພິ່ງຕົນເອງ, ສ້າງຄວາມເຂັ້ມແຂງ ດ້ວຍຕົນເອງ ດ້ານວິທະຍາສາດ ເຕັກໂນໂລຊີ ໃນລະດັບສູງ ແລະ ການສ້າງໃຫ້ເປັນປະເທດ ເຂັ້ມແຂງ ດ້ານວິທະຍາສາດ ເຕັກໂນໂລຊີ ເມື່ອຮອດປີ 2035 ແມ່ນເປົ້າໝາຍຍຸດທະສາດ ທີ່ໄດ້ກຳນົດໂດຍ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ.
ຂປລ.ວິທະຍຸ-ໂທລະພາບ ສູນກາງຈີນ, ການບັນລຸການເພິ່ງຕົນເອງ, ສ້າງຄວາມເຂັ້ມແຂງ ດ້ວຍຕົນເອງ ດ້ານວິທະຍາສາດ ເຕັກໂນໂລຊີ ໃນລະດັບສູງ ແລະ ການສ້າງໃຫ້ເປັນປະເທດ ເຂັ້ມແຂງ ດ້ານວິທະຍາສາດ ເຕັກໂນໂລຊີ ເມື່ອຮອດປີ 2035 ແມ່ນເປົ້າໝາຍຍຸດທະສາດ ທີ່ໄດ້ກຳນົດໂດຍ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ. ນັບແຕ່ຕົ້ນປີນີ້, ໂດຍສຸມໃສ່ການເລີ່ມຕົ້ນ ຂອງແຜນພັດທະນາ ເສດຖະກິດ ສັງຄົມແຫ່ງຊາດ 5 ປີຄັ້ງທີ 15, ທ່ານ ສີ ຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກ ກອມມູນິດຈີນ ໄດ້ມີການຈັດວາງທີ່ສຳຄັນຕ່າງໆກ່ຽວກັບ ການປະດິດສ້າງ ດ້ານວິທະຍາສາດ ເຕັກໂນໂລຊີ ເພື່ອເລັ່ງຊຸກຍູ້ ການເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ດ້ານວິທະຍາສາດ ເຕັກໂນໂລຊີ ໃນລະດັບສູງ.
ໃນປີທຳອິດ ທີ່ເລີ່ມການປະຕິບັດ ແຜນການ 5 ປີຄັ້ງທີ 15, ຈາກການຮ່ຳຮຽນ ລວມໝູ່ ຂອງກົມການເມືອງ ສູນກາງພັກ ກອມມູນິດຈີນ, ຮອດການເຄື່ອນໄຫວ ຢ້ຽມຢາມ ເຂດນິຄົມ ອຸດສາຫະ ກຳ ການປະຍຸກໃຊ້ ແລະ ປະດິດສ້າງເຕັກໂນໂລຊີ ຂໍ້ມູນຂ່າວສານ ແຫ່ງຊາດຈີນ, ຈົນເຖິງການຈັດກອງປະຊຸມສຳມະນາ ກ່ຽວກັບ ການເພີ່ມທະວີ ການຄົ້ນຄວ້ນຂັ້ນພື້ນຖານ, ທ່ານ ສີ ຈິ້ນຜິງ ໄດ້ເນັ້ນໜັກ ຄວາມສຳຄັນ ຂອງການປະດິດສ້າງ ດ້ານວິທະຍາສາດ ເຕັກໂນໂລຊີ ຫລາຍຄັ້ງ ເຊິ່ງໄດ້ສະແດງໃຫ້ເຫັນເຖິງ ຖານະສຳຄັນ ໃນສະພາບລວມ ແຫ່ງການສ້າງສາ ຄວາມທັນສະໄໝຂອງ ສປ ຈີນ.
ໃນພິທີເປີດກອງປະຊຸມ ປັນຍາປະດິດໂລກ 2026 ທີ່ຈັດຂຶ້ນ ຢູ່ນະຄອນຊຽງໄຮ້ຈີນ ເມື່ອບໍ່ດົນມານີ້, ທ່ານ ສີຈິ້ນຜິງ ໄດ້ຊີ້ແຈງຈຸດຢືນຂອງ ສປ ຈີນ ຢ່າງເປັນລະບົບ ໃນການຊຸກຍູ້ການພັດທະນາ ແລະ ການຄຸ້ມຄອງ ປັນຍາປະດິດໂລກ ເຊິ່ງເປັນການຊີ້ທິດເຍືອງທາງ ໃຫ້ແກ່ ການຊຸກຍູ້ປັນຍາປະດິດ ພັດທະນາ ກ້າວໄປສູ່ສິ່ງທີ່ດີງາມ ແລະ ກ້າວໜ້າຢ່າງມີປະສິດທິຜົນ ຫລາຍກວ່າເກົ່າ. ນອກຈາກນີ້, ທ່ານ ສີ ຈິ້ນຜິງ ຍັງປະກາດວ່າ: ເພື່ອສະໜັບ ສະໜູນ ການພັດທະນາປັນຍາປະດິດໂລກ ແລະ ຊຸກຍູ້ການເສີມສ້າງ ຄວາມສາມາດ ດ້ານປັນຍາປະດິດໂລກ ຕື່ມອີກ, ໃນ 5 ປີຕໍ່ໜ້າ,ສປ ຈີນ ຈະສະໜອງໂອກາດ ການຝຶກອົບຮົມ ດ້ານປັນຍາປະດິດ ຈຳນວນ 5,000 ຄົນ ໃຫ້ແກ່ ປະເທດ ພວມພັດທະນາ; ສ້າງສູນຮ່ວມມື ການປະຍຸກໃຊ້ ປັນຍາປະດິດສາກົນ ທີ່ຫັນໜ້າສູ່ອາຊຽນ, ສັນນິບາດ ອາ ຣັບ, ສະຫະພາບ ອາຟຣິກາ, ປະຊາຄົມປະເທດ ອາເມຣິກາລາຕິນ-ກາຣາອິບ, ອົງການຮ່ວມມືຊຽງໄຮ້ ແລະ ບຣິກສ, ເຊິ່ງໄດ້ສະແດງ ໃຫ້ເຫັນເຖິງຄວາມຮັບຜິດຊອບຂອງ ສປ ຈີນ ໃນຖານະເປັນປະເທດໃຫຍ່./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
