ຂປລ
ໃນວັນທີ 29 ກໍລະກົດ 2026 ທີ່ທໍານຽບປະທານປະເທດ, ທ່ານ ນາງ ວຽງທອງ ສີພັນດອນ ຮອງປະທານປະເທດ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາ ຂອງທ່ານ ຢາຣອນ ເມເຢີ (Yaron Mayer) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອິດສະຣາແອນ ປະຈຳ ສປປ ລາວ ໃນໂອກາດສໍາເລັດໃນການປະຕິບັດໜ້າທີ່ການທູດຢູ່ ສປປ ລາວ.
ຂປລ. ໂອກາດນ້ີ, ທ່ານ ນາງ ວຽງທອງ ສີພັນດອນ ໄດ້ສະແດງຄວາມຕ້ອນຮັບ, ຊົມເຊີຍ ແລະ ຕີລາຄາສູງຕ່ໍຜົນສຳເລັດໃນການປະຕິບັດໜ້າທີ່ທາງ ການທູດໃນໄລຍະຜ່ານມາ ຊ່ຶງເປັນການປະກອບສ່ວນສຳຄັນເຂົ້າໃນການເພ່ີມທະວີສ້າງສາຍພົວພັນມິດຕະພາບລະຫວ່າງ ລາວ-ອິດສະຣາແອນ ໃຫ້ນັບມື້ແໜ້ນແຟ້ນຍິ່ງໆຂຶ້ນ. ໃນຕອນທ້າຍ, ທ່ານຮອງປະທານປະເທດ ໄດ້ຍັງໄດ້ອວຍພອນໃຫ້ ທ່ານເອກອັກຄະລັດຖະທູດເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳເລັດໃນໜ້າທີ່ວຽກງານໃໝ່ ທ່ີທ່ານທູດຈະໄດ້ຮັບຜິດຊອບໃນອະນາຄົດ ແລະ ສະແດງຄວາມຫວັງວ່າທ່ານທູດຈະສືບຕໍ່ປະກອບສ່ວນເຂົ້າໃນການສົ່ງເສີມການພົວພັນຮ່ວມມືລະຫວ່າງສອງປະເທດ ໂດຍສະເພາະການຊຸກຍູ້ທ່ານທູດຜູ້ໃໝ່ ທ່ີຈະມາຮັບໜ້າທີ່ມີຂໍ້ມູນເປັນພື້ນຖານໃນການປະຕິບັດໜ້າທີ່ການທູດຢູ່ ສປປ ລາວ ແລະ ສືບຕໍ່ຈັດຕັ້ງປະຕິບັດບັນດາໂຄງການຮ່ວມມືໃຫ້ມີຄວາມຄືບໜ້າເລື້ອຍໆ.
ໃນໂອກາດດຽວກັນນີ້, ທ່ານ ຢາຣອນ ເມເຢີ ກໍໄດ້ສະແດງຄວາມຂອບໃຈມາຍັງລັດຖະບານ ແລະ ປະຊາຊົນລາວທີ່ໄດ້ໃຫ້ການຊ່ວຍເຫລືອສະໜັບສະໜູນ ແລະ ອໍານວຍຄວາມສະດວກເຮັດໃຫ້ການປະຕິບັດໜ້າທ່ີການທູດຢູ່ ສປປ ລາວ ປະສົບຜົນສໍາເລັດ, ພ້ອມທັງສະແດງຄວາມໝາຍໝ້ັນທ່ີຈະສືບຕ່ໍປະກອບສ່ວນໃນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືທ່ີດີລະຫວ່າງອິດສະຣາແອນ ແລະ ສປປ ລາວ ໃຫ້ນັບມ້ືນັບຈະເລີນງອກງາມຍິ່ງໆຂຶ້ນ.
ຂ່າວ: ກິດຕາ; ພາບ: ສຳນານ
KPL
