ຂປລ
ລັດຖະບານ ເຢຍລະມັນ ໄດ້ຮັບຮອງເອົາ ຮ່າງແຜນງົບປະມານ ສຳລັບ ປີ 2027. ອີງຕາມຮ່າງ ແຜນງົບປະມານ ສະບັບດັ່ງກ່າວ, ງົບປະມານລາຍຈ່າຍ ຂອງລັດຖະບານກາງ ເຢຍລະມັນປີ 2027 ວາງໄວ້ທີ່ 555,4 ຕື້ເອີໂຣ, ເພີ່ມຂຶ້ນຈາກ 524,5 ຕື້ເອີໂຣ ໃນປີ 2026.
ຂປລ.ວິທະຍຸ ໂທລະພາບ ສູນກາງຈີນ, ລັດຖະບານ ເຢຍລະມັນ ໄດ້ຮັບຮອງເອົາ ຮ່າງແຜນງົບປະມານ ສຳລັບ ປີ 2027. ອີງຕາມຮ່າງ ແຜນງົບປະມານ ສະບັບດັ່ງກ່າວ, ງົບປະມານລາຍຈ່າຍ ຂອງລັດຖະບານກາງ ເຢຍລະມັນປີ 2027 ວາງໄວ້ທີ່ 555,4 ຕື້ເອີໂຣ, ເພີ່ມຂຶ້ນຈາກ 524,5 ຕື້ເອີໂຣ ໃນປີ 2026. ງົບປະມານປ້ອງກັນປະເທດ ຂອງລັດຖະບານກາງ ເຢຍລະມັນໃນປີ 2027 ຈະເພີ່ມຂຶ້ນເປັນ ປະມານ 109,7 ຕື້ເອີໂຣ, ເພີ່ມຂຶ້ນ ປະມານ 1/3 ເມື່ອທຽບ ໃສ່ປີ 2026. ຮ່າງແຜນງົບປະມານສະບັບນີ້ ຖືກຫລາຍຝ່າຍ ຕຳໜິຕິຕຽນ. ພັກຝ່າຍຊ້າຍ ເຢຍລະມັນ ເຫັນວ່າ: ລັດຖະບານ ເພີ່ມລາຍຈ່າຍງົບປະມານ ໃສ່ດ້ານການປ້ອງກັນປະເທດ ຫລາຍເກີນໄປ ແຕ່ພັດລະເລີຍ ທີ່ຈະຫລຸດຜ່ອນພາລະຫາບແບກຂອງປະຊາຊົນ ແລະ ການບັນເທົາທຸກໄພພິບັດ; ວົງການອຸດສາຫະກຳເຢຍລະມັນ ເຫັນວ່າ: ລາຍຈ່າຍດ້ານງົບປະມານ ແລະ ຂະໜາດຂອງໜີ້ສິນ ເພີ່ມຂຶ້ນໄວເກີນໄປ, ການວາງແຜນໃຊ້ງົບປະມານ ຂາດຄວາມໝັ້ນທ່ຽງ ແລະ ບາງອົງການອະນຸລັກສິ່ງແວດລ້ອມ ໄດ້ຕຳໜິຕິຕຽນລັດຖະບານ ທີ່ຫລຸດການສະໜັບສະໜູນ ການປົກປ້ອງສະພາບດິນຟ້າອາກາດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
