ຂປລ
ຂປລ. ຖືວ່າກໍາລັງເປັນກະແສ ໃນສັງຄົມອອນລາຍເລີຍກໍວ່າໄດ້ ສໍາລັບ ຮ້ານ ນາງ ນ້ອຍ ບັນແສ່ວແຊບວັດໄຕ ແລະ ເຂົ້າໜົມຄົກໄສ້ເຄັມ ດ້ວຍລົດຊາດທີ່ແຊບຊ້ອຍ, ຫອມມັນກະທິ ແລະ ແຜ່ນແປ້ງກອບບໍ່ອົມນ້ຳມັນ ຖືກໃຈຜູ້ບໍລິໂພກ ສາມາດດຶງດູດລູກຄ້າຈຳນວນຫລາຍຫລັ່ງໄຫລເຂົ້າມາບໍ່ຂາດສາຍ
ຂປລ. ຖືວ່າກໍາລັງເປັນກະແສ ໃນສັງຄົມອອນລາຍເລີຍກໍວ່າໄດ້ ສໍາລັບ ຮ້ານ ນາງ ນ້ອຍ ບັນແສ່ວແຊບວັດໄຕ ແລະ ເຂົ້າໜົມຄົກໄສ້ເຄັມ ດ້ວຍລົດຊາດທີ່ແຊບຊ້ອຍ, ຫອມມັນກະທິ ແລະ ແຜ່ນແປ້ງກອບບໍ່ອົມນ້ຳມັນ ຖືກໃຈຜູ້ບໍລິໂພກ ສາມາດດຶງດູດລູກຄ້າຈຳນວນຫລາຍຫລັ່ງໄຫລເຂົ້າມາບໍ່ຂາດສາຍ ບາງຄົນກໍມານັ່ງກິນຢູ່ຮ້ານ, ບາງຄົນກໍສັ່ງຊື່ກັບບ້ານ ຫລື ບາງຄົນກໍໂທສັ່ງໄວ້ແລ້ວມາເອົາຢູ່ໜ້າຮ້ານ ໂດຍສະເພາະໄລຍະ 4-5 ເດືອນມານີ້ ໄດ້ຂາຍດີພໍສົມຄວນ ເນື່ອງຈາກວ່າຮ້ານຂອງເພິ່ນເປັນທີ່ຮູ້ຈັກຫລາຍຂຶ້ນຈາກການລີວິວຜ່ານແອັບຕິກຕ໋ອກ ແລະ ຫລາຍຄົນກໍ່ຢາກຮູ້ວ່າແຊບແທ້ບໍ່? ແຕ່ເມື່ອໄດ້ມາກິນແລ້ວກໍຕິດໃຈກັບລົດຊາດທີ່່ແຊບຊ້ອຍ ຈຶ່ງມີການບອກຕໍ່ປາກຕໍ່ປາກຈົນແຕ່ລະມື້ ມີຄົນມາຕໍ່ແຖວຍາວ ເຮັດນໍາກໍ່ບໍ່ທັນ ຊຶ່ງຈຸດນີ້ມັນໄດ້ສ້າງຮອຍຍີ້ມໃຫ້ກັບ ນາງ ນ້ອຍ.
ນາງ ນ້ອຍ ເວົ້າສູ່ຟັງວ່າ: ກ່ອນຈະມາເຮັດອາຊີບນີ້ ຍ້ອນວ່າຕົນເອງ ເປັນຄົນມັກແຕ່ງກິນ ຈຶ່ງເຮັດສິ່ງທີ່ຕົນເອງມັກ ຄື ການເຮັດອາຫານປະເພດຕ່າງໆ ເພື່ອວາງຂາຍຢູ່ໜ້າເຮືອນ ແຕ່ປີ 2015 ເປັນຕົ້ນມາ ໂດຍການຂາຍ ຫລາຍຢ່າງ ບໍ່ວ່າຈະເປັນບັນກວນ, ບັນແສ່ວ, ບັນແຕ, ຍໍ່ຂາວ, ຍໍ່ຈື, ເຂົ້າໜົມຄົກ ປີ້ງເອັນ ແລະ ຂາຍປະເພດເສັ້ນ, ຈົນມາຈັບທາງໄດ້ ວ່າ ບັນແສ່ວ ເປັນທີ່ຕ້ອງການຂອງຜູ້ບໍລິໂພກຫລາຍ, ຈາກຮ້ານທີ່ຄົນຮູ້ໜ້ອຍ ກາຍເປັນຮ້ານທີ່ສັງຄົມຮູ້ຈັກຫລາຍຈາກການທີ່ຫລານສາວ ມາລີວິວບັນແຊ່ວ ຜ່ານທາງແອັບຕິກຕ໋ອກ ໃຫ້ ປະມານ 5 ເດືອນກ່ອນ ຈຶ່ງເຮັດໃຫ້ລູກຄ້າຮູ້ຈັກຮ້ານບັນແສ່ວແຊບ ວັດໄຕ ຫລາຍຂຶ້ນ ຊຶ່ງແຕ່ລະມື້ຈະມີລູກຄ້າເຂົ້າມາຫລາຍພໍສົມຄວນ. ສະນັ້ນ, ຕົນເອງ ຈຶ່ງຫັນມາເຮັດສະເພາະແຕ່ບັນແສ່ວ ແລະ ເຂົ້າໜົມຂົກ ຂາຍ ດ້ວຍສູດທີ່ຂ້າພະເຈົ້າຄິດຄົ້ນເອງ ຜ່ານການລອງຜິດ, ລອງຖືກ ກວ່າຈະໄດ້ສູດນີ້ມາ ຈົນປັດຈຸບັນ ແມ່ນມີຜົນຕອບຮັບດີຫລາຍ ຊຶ່ງແຕ່ລະມື້ນຳໃຊ້ແປ້ງ ປະມານ 8 ຖົງ/ມື້ ໄດ້ເກືອບ 200 ແຜ່ນ/ມື້, ໝູບົດ 10 ກິໂລ/ມື້. ສໍາລັບລາຄາຂາຍ ບັນແສ່ວ ແຜ່ນລະ 15.000 ກີບ (ບໍ່ໃສ່ໄຂ່), ໃສ່ໄຂ່ແມ່ນ 20.000 ກີບ, ເຂົ້າໜົມຄົກ ຄູ່ລະ 5.000 ກີບ, ລາຄານີ້ກໍຖືວ່າບໍ່ແພງຖ້າທຽບໃສ່ຕົ້ນທຶນໃນປັດຈຸບັນ ເພາະວ່າມີສ່ວນປະກອບເຄື່ອງຄຽງຫລາຍຢ່າງຕື່ມອີກ ເຊັ່ນ: ໄຂ່, ຜັກ, ຖົ່ວງອກ ແລະ ອື່ນໆ (ສ່ວນນ້ຳແຈ່ວແມ່ນຕັກເອງ). ພ້ອມນີ້ ຢູ່ຮ້ານບັນແສ່ວ ຍັງອາຫານປະເພດເສັ້ນໄວ້ຄອຍບໍລິການລູກຄ້າຕື່ມອີກ ເຊັ່ນ: ເຂົ້າປຽກເສັ້ນ, ເຝີງົວ, ເຝີເຮືອ, ໝີ່ເຫລືອງ,ເຂົ້າຊອຍ, ຕົ້ມລ້ອນ ຊຶ່ງແມ່ນນ້ອງສາວເປັນຜູ້ຂາຍ ໃນລາຄາເລີ່ມຕົ້ນ 30.000 ກີບ ຂຶ້ນໄປ ແລະ ປະເພດນ້ຳ ເຊັ່ນ: ກາເຟ, ນ້ຳດື່ມ, ແປບຊີ ນຳອີກ.
ນາງ ນ້ອຍ ເວົ້າເສີມວ່າ: ນອກຈາກຂາຍຢູ່ພາຍໃນຮ້ານແລ້ວ, ທາງຮ້ານຂອງພວກເຮົາ ຍັງຮັບອອກງານນອກສະຖານທີ່ ໂດຍເລີ່ມຕົ້ນໃນລາຄາ 3.500.000 ກີບ ເຄື່ອງທຸກຢ່າງຂອງທາງຮ້ານໝົດ. ສໍາລັບ ລູກຄ້າທ່ານໃດ ທີ່ຢາກລອງຊີມ ກໍມາຫາໄດ້ຮ້ານຕັ້ງຢູ່ ບ້ານໜອງປາໄນ ເມືອງ ສີໂຄດຕະບອງ ນະຄອນຫລວງວຽງຈັນ (ຫລັງວັດໄຕ)ຮັບຮອງວ່າ ຈະບໍ່ຜິດຫວັງແນ່ນອນ ຫລື ຖ້າຫາກທ່ານໃດ ສົນໃຈ ບັນແສ່ວ, ເຂົ້າໜົມຂົກແຊບໆອອກງານ ກໍຕິດຕໍ່ໄດ້ທີ່ເບີ 020 98103357.
ໂດຍ:ມາລີດາ
KPL
