ຂປລ.  ທ່ານ ທອງລຸນ ສີສຸລິດ  ປະທານປະເທດ  ແຫ່ງ ສປປ ລາວ ພ້ອມຄະນະໄດ້ເຄື່ອນໄຫວຢ້ຽມຢາມສວນຖົ່ວລຽນໂຊກໄຊ ບ້ານຫລັກ  28  ເມືອງປາກຊ່ອງ ໂດຍມີທ່ານ ອາລຸນໄຊ ສູນນະລາດ ເລຂາຄະບໍລິຫານງານພັກແຂວງ, ປະທານສະພາ ປະຊາຊົນ ແຂວງຈໍາປາສັກ,  ມີການນໍາພັກ-ລັດ  ຈາກສູນກາງ,  ແຂວງ, ເມືອງປາກຊ່ອງ  ແລະ ພາກສ່ວນກ່ຽວຂ້ອງເຂົ້າຮ່ວມ.  ໂອກາດນ້ີ, ທ່ານ ໄພວັນ ທໍາມະວົງ ເຈົ້າຂອງສວນຖົ່ວລຽນໂຊກໄຊ ແລະ ທ່ານ ເອລາວັນ ລາດປາກດີຄະນະລິເລີ່ມສະມາຄົມທຸລະກິດຖົ່ວລຽນລາວ  ໄດ້ຜັດປ່ຽນກັນລາຍງານປະຫວັດຄວາມເປັນມາ  ແລະ ສະພາບລວມກ່ຽວກັບການເຮັດສວນຖົ່ວລຽນຢູ່ບ້ານຫລັກ 28  ໂດຍຍົກໃຫ້ເຫັນສະພາບລວມ ໃນການປູກຖົ່ວລຽນເປັນສິນຄ້າຂອງສວນຖົ່ວລຽນໂຊກໄຊ  ບ້ານຫລັກ 28,  ຍົກໃຫ້ເຫັນເຖິງການຂະຫຍາຍຕົວຂອງພືດເສດຖະກິດ  ກໍຄື ໝາກຖົ່ວລຽນທີ່ມີທ່າແຮງໃນການສົ່ງອອກ.

   ສວນຖົ່ວລຽນໂຊກໄຊ ເປັນຕົວແບບທີ່ດີໃນການປູກຖົ່ວລຽນທີ່ໄດ້ມາດຕະຖານ,  ສາມາດປະກອບສ່ວນໃນການພັດທະນາເສດຖະກິດ ເພື່ອຕອບສະໜອງຄວາມຕ້ອງການຂອງຕະຫລາດສາກົນ,  ມີເນື້ອທີ່ 13 ເຮັກຕາ,  ມີຕົ້ນຖົ່ວລຽນປະມານ 2.000 ຕົ້ນ. ໃນນັ້ນ , ພັນໝອນທອງ 1. 950 ຕ້ົນ, ພັນມູຊັນຄີງ 10 ຕົ້ນ, ພັນພວງມະນີ 20  ຕົ້ນ ແລະ  ພັນນົກກະຈິບ 10 ຕົ້ນ,  ຜົນຜະລິດສະເລ່ຍ 100-140 ໂຕນ/ ປີ. ປັດຈຸບັນ, ໄດ້ເຂົ້າເປັນສະມາຊິກສະມາຄົມທຸລະກິດຖົ່ວລຽນລາວ ແລະ ມີສັນຍາຊື້ - ຂາຍ  ກັບ  ບໍລິສັດສົ່ງອອກໄປ ສປ ຈີນ ຢ່າງເປັນຮູບປະທຳ, ສ່ວນລາຄາໝາກຖົ່ວລຽນແມ່ນຂາຍຕາມເກຣດເອ -ດີ.  ທົ່ວ ແຂວງ ຈໍາປາສັກ  ມີເນື້ອທີ່ປູກຖົ່ວລຽນເກືອບ 4. 000 ເຮັກຕາ, ຄາດຄະເນຜົນຜະລິດປະມານ 16. 730 ໂຕນ/ປີ; ກຸ່ມບໍລິສັດສົ່ງອອກມີ 6 ບໍລິສັດ ທີ່ຜ່ານການກວດກາຈາກ ພາສີຈີນ ເພື່ອກະກຽມສົ່ງອອກ, ມີຜົນຜະລິດຄຸນນະພາບສູງປະມານ 3. 980 ໂຕນ.

    ຕອນທ້າຍ,  ທ່ານ ທອງລຸນ ສີສຸລິດ ກໍໄດ້ສະແດງຄວາມຍ້ອງຍໍຊົມເຊີຍສວນຖົ່ວລຽນໂຊກໄຊ ທ່ີປູກຖົ່ວລຽນຄຸນນະພາບສາມາດ ສົ່ງອອກໄປຕ່າງປະເທດ  ໂດຍສະເພາະແມ່ນ  ສປ ຈີນ  ຊຶ່ງເປັນໃບໜ້າໃບຕາໃຫ້ແກ່ປະເທດຊາດ,   ຍ້ອນແນວນັ້ນ,  ຕ້ອງຮັກສາມູນເຊື້ອ ແລະ  ສືບຕໍ່ຜະລິດໝາກຖົ່ວລຽນທີ່ມີ ຄຸນນະພາບສູງ, ສະອາດ,  ປອດສານພິດ - ສານເຄມີ,  ໄດ້ມາດຕະຖານຂອງການສົ່ງອອກ  ໂດຍສະເພາະສົ່ງໄປ  ສປ  ຈີນ  ແລະ  ຈໍາໜ່າຍພາຍໃນ.  ຈາກນ້ັນ , ຕ້ອງປະກອບສ່ວນໃນການສ້າງວຽກເຮັດງານທໍາໃຫ້ແກ່ປະຊາຊົນຢູ່ທ້ອງຖ່ິນ,  ເອົາໃຈໃສ່ຂະຫຍາຍພັນຖົ່ວລຽນໃຫ້ເປັນພັນເອກະລັກສະເພາະຂອງສວນ.  ພ້ອມນີ້,  ທ່ານຍັງເນັ້ນໜັກໃຫ້ກະຊວງ, ພະແນກການທ່ີກ່ຽວຂ້ອງ ຂອງແຂວງ, ເມືອງຕ້ອງເອົາໃຈໃສ່ໃຫ້ການສະໜັບສະໜູນ,  ຊຸກຍູ້ສົ່ງເສີມທາງດ້ານເຕັກນິກວິຊາການໃນການບົວລະບັດຮັກສາເພື່ອໃຫ້ສວນຖົ່ວລຽນໂຊກໄຊ ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ. 

   ຂ່າວ -ພາບ : ທູນທອງໃຈ

KPL