ຂປລ
ຂປລ. ໝາກໂມ ເປັນອີກໝາກໄມ້ຊະນິດໜຶ່ງທີ່ຄົນນິຍົມກິນ ແລະ ເປັນທີ່ຕ້ອງການຂອງທ້ອງຕະຫລາດຫລາຍ ໂດຍສະເພາະແມ່ນຍາມຮ້ອນ ເພາະວ່າໝາກໂມ ເມື່ອກິນເຂົ້າໄປຈະຊ່ວຍເຮັດໃຫ້ຮູ້ສຶກສົດຊື່ນຜ່ອນຄາຍຄວາມອິດເມື່ອຍໄດ້ດີ ຈຶ່ງເປັນທີ່ນິຍົມຂອງຜູ້ບໍລິໂພກ ຈົນເຮັດໃຫ້ຊາວສວນທີ່ຜະລິດໝາກໂມຂາຍຍີ້ມໄດ້ ເມື່ອຮອດລະດູການເກັບໝາກໂມ
ຂປລ. ໝາກໂມ ເປັນອີກໝາກໄມ້ຊະນິດໜຶ່ງທີ່ຄົນນິຍົມກິນ ແລະ ເປັນທີ່ຕ້ອງການຂອງທ້ອງຕະຫລາດຫລາຍ ໂດຍສະເພາະແມ່ນຍາມຮ້ອນ ເພາະວ່າໝາກໂມ ເມື່ອກິນເຂົ້າໄປຈະຊ່ວຍເຮັດໃຫ້ຮູ້ສຶກສົດຊື່ນຜ່ອນຄາຍຄວາມອິດເມື່ອຍໄດ້ດີ ຈຶ່ງເປັນທີ່ນິຍົມຂອງຜູ້ບໍລິໂພກ ຈົນເຮັດໃຫ້ຊາວສວນທີ່ຜະລິດໝາກໂມຂາຍຍີ້ມໄດ້ ເມື່ອຮອດລະດູການເກັບໝາກໂມ ເໝືອນດັ່ງຊາວກະສິກອນ ບ້ານດົງໂພນແຮ່ ເມືອງຫາດຊາຍຟອງ ນະຄອນຫລວງວຽງຈັນ ໜຶ່ງໃນນັ້ນກໍແມ່ນສວນຂອງ ນາງ ສຸກສັນ ທີ່ຢືດຖືອາຊີບປູກໝາກໂມຂາຍດ້ວຍປະສົບການຍາວນານກວ່າ 40 ປີ.
ທ່ານ ນາງ ສຸກສັນ ເຈົ້າຂອງສວນໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວວ່າ: ອາຊີບປູກໝາກແຕງໂມ ແມ່ນເຮັດມາແຕ່ຈື່ຄວາມໄດ້ກໍໄດ້ຊ່ວຍຄອບຄົວເຮັດສວນໝາກໂມນີ້ແລ້ວ ຈົນເຮັດໃຫ້ມີຄວາມຮູ້ ໃນເລື່ອງການບົວລະບັດຮັກສາເປັນຢ່າງດີ, ພໍໃຫຍ່ມີຄອບຄົວ ກໍໄດ້ສືບທອດມູນເຊື້ອຄວາມດຸໝັ່ນຂະຫຍັນພຽງຈາກພໍ່ແມ່ໃນການປູກໝາກໂມເປັນອາຊີບຫລັກ ເພື່ອສ້າງລາຍຮັບເຂົ້າຄອບຄົວ ຊຶ່ງເວົ້າໄດ້ວ່າອາຊີບນີ້ ກໍເປັນອາຊີບໜຶ່ງທີ່ສ້າງລາຍຮັບໄດ້ດີພໍສົມຄວນໃນແຕ່ລະປີ ເນື່ອງຈາກວ່າ ປີ 1 ໜຶ່ງແມ່ນປູກ 2 ລະດູ ຄື: ລະດູແລ້ງ, ລະດູຝົນ ແລະ ການປູກແຕ່ເທື່ອແມ່ນຕ້ອງໝູນວຽນເນື້ອທີ່ປູກ (ໝາຍຄວາມວ່າ ຫລັງຈາກເກັບຜົນລະປູກແລ້ວແມ່ນຈະຍ້າຍໄປປູກບ່ອນໃໝ່ ເພື່ອເປັນການປັບປຸງດິນ) ຈຶ່ງກັບມາປູກບ່ອນເກົ່າເພື່ອເຮັດໃຫ້ດິນມີຄວາມອຸດົມສົມບູນ ເວົ້າລວມ, ເວົ້າສະເພາະການປູກ
ໝາກໂມລະດູແລ້ງປີນີ້ ມີເນື້ອທີ່ກວ່າ 8 ເຮັກຕາ ແຕ່ປູກນໍາກັນ 3 ຄົນ, ສະເພາະສວນຂອງຕົນເອງມີ 3,5 ເຮັກຕາ ໂດຍລົງທຶນ 130 ລ້ານກີບ ເພື່ອຊື້ແນວພັນ,ເຊົ້າເນື້ອທີ່, ລົງລະບົບນໍ້າ ແລະ ຈ້າງແຮງງານໃນການປູກ ລວມເຖິງຂັ້ນຕອນອື່ນກ່ອນຈະໄດ້ເກັບໝາກໂມ ໂດຍການປູກລະດູແລ້ງແມ່ນ ເລີ່ມປູກຕັ້ງແຕ່ເດືອນຕຸລາ ໃຊ້ເວລາປະມານ 65 ມື້ ຈຶ່ງສາມາດເກັບຜົນຜະລິດໄດ້, ສ່ວນໝາກໂມທີ່ປູກມີ 2 ສາຍພັນຄື: ພັນຊີ້ນແດງ, ພັນນ້ຳເຜິ້ງ (ສີເຫລືອງ), ຮັບປະກັນຄວາມຫວານ ກອບ ແລະ ປອດໄພ 100%. ສໍາລັບການບົວລະບັດຮັກສາ ກໍບໍ່ໄດ້ຫຍຸ້ງຍາກຍັງຫລາຍ ພຽງແຕ່ຫົດນໍ້າ, ໃສ່ປຸຍ, ໃສ່ຝຸ່ນຄອກ, ພ້ອມນັ້ນໝາກໂມເຄືອໜຶ່ງຈະຈົ່ງໝາກທີ່ສົມບູນໄວ້ ແລະ ບໍ່ຫລາຍຈົນເກີນໄປ ເພື່ອໃຫ້ໄດ້ໝາກໃຫຍ່ໄວ. ສ່ວນການຂາຍ ມີແມ່ຄ້າຈາກຕະຫລາດໃຫຍ່ໃນນະຄອນຫລວງ ເຊັ່ນ: ຕະຫລາດສີໄຄ, ຕະຫລາດລາວເຂົ້າມາຮັບຊື້ເຖິງສວນໂດຍຂາຍຍົກຢູ່ປະມານ 25 ລ້ານກີບຕໍ່ໄລ່ ຫລື ຂາຍເປັນລົດ ກໍລາຄາປະມານ 3 ລ້ານກີບ ແລ້ວແຕ່ປະລິມານຂອງໝາກໂມ, ພ້ອມນີ້ຍັງມີ ການຂາຍຜ່ານອອນລາຍ ແລະ ຕາມແຄມທາງ 450 ປີ ຕື່ມອີກ.
ທ່ານ ນາງ ສຸກສັນ ເວົ້າເສີມວ່າ: ສໍາລັບລາຄາໝາກໂມປີນີ້ແມ່ນບໍ່ດີຄືປີຜ່ານມາ ເນື່ອງຈາກວ່າປີນີ້ໝາກໂມມີຫລາຍ ຈຶ່ງເຮັດໃຫ້ລາຄາຫລຸດ ແລະ ຄາດຄະເນວ່າປີນີ້ຈະສ້າງລາຍຮັບປະມານ 100-200 ລ້ານກີບ, ຖ້າທຽບໃສ່ປີກາຍແມ່ນຫລຸດຫລາຍ. ສະນັ້ນ, ໃນນາມກະສິກອນ ຈຶ່ງຢາກຝາກເຖິງພາກລັດ ກໍຄື ພາກສ່ວນທີ່ກ່ຽວຂ້ອງ ຊ່ວຍຊຸກຍູ້ສົ່ງເສີມສິນຄ້າລາວໃຫ້ຫລາຍຂຶ້ນກວ່າເກົ່າ ໂດຍສະເພາະແມ່ນສິນຄ້າກະສິກຳ ທີ່ປູກມາແລ້ວ ຕະຫລາດຮອງຮັບມີໜ້ອຍ ແລະ ອັນໃດທີ່ຄົນລາວຜະລິດໄດ້ກໍຢາກໃຫ້ເພີ່ມຄວາມເຂັ້ມງວດໃນນຳເຂົ້າຈາກຕ່າງປະເທດຕື່ມອີກ.ເຖິງແນວ ໃດກໍດີ, ໃນນາມເຈົ້າຂອງສວນຂໍຝາກເຖິງຜູ້ບໍລິໂພກທຸກທ່ານຊ່ວຍສະໜັບສະໜູນຜົນຜະລິດຂອງກະສິກອນລາວ ແລະ ຢືນຢັນວ່າໝາກໂມຈາກສວນຂອງເຮົາຫວານແຊບແນ່ນອນ ແລະ ທີ່ສຳຄັນບໍ່ມີສານເຄມີຕົກຄ້າງ. ຖ້າລູກຄ້າທ່ານໃດສົນໃຈຢາກເຂົ້າໄປຊື້ຢູ່ກັບສວນໝາກໂມ ນາງ ສຸກສັນ ບ້ານດົງໂພນແຮ່ ກໍສາມາດຕິດຕໍ່ໄດ້ທີ່ເບີ: 020 76583677.
KPL
