ຂປລ
ຂປລ. ເມື່ອເວົ້າເຖິງປາແດກແລ້ວ, ກໍເປັນອາຫານພື້ນບ້ານທີ່ຕິດພັນກັບວິຖີຊີວິດຂອງຄົນລາວມາແຕ່ດຶກດຳບັນຈົນສືບເນ່ືອງມາເຖິງປັດຈຸບັນນີ້, ປາແດດ ຖືວ່າເປັນອາຫານທີ່ຫລາຍໆຄົນມັກກິນກໍວ່າໄດ້ ແລະ ເພືື່ອເປັນການຕໍ່ຍອດພູມປັນຍາຂອງປະຊາຊົນທ້ອງຖິ່ນ
ຂປລ. ເມື່ອເວົ້າເຖິງປາແດກແລ້ວ, ກໍເປັນອາຫານພື້ນບ້ານທີ່ຕິດພັນກັບວິຖີຊີວິດຂອງຄົນລາວມາແຕ່ດຶກດຳບັນຈົນສືບເນ່ືອງມາເຖິງປັດຈຸບັນນີ້, ປາແດດ ຖືວ່າເປັນອາຫານທີ່ຫລາຍໆຄົນມັກກິນກໍວ່າໄດ້ ແລະ ເພືື່ອເປັນການຕໍ່ຍອດພູມປັນຍາຂອງປະຊາຊົນທ້ອງຖິ່ນ ກໍຄື ພໍ່ແມ່ອາວອາ ໃຫ້ຢູ່ຄູ່ສັງຄົມລາວຕະຫລອດໄປໃນການຜະລິດປາແດກ ຈຶ່ງເຮັດໃຫ້ຫລາຍໆຄອບຄົວເກີດມີແນວຄວາມຄິດນຳເອົາປາແດດ ມາພັດທະນາສູ່ການຜະລິດແບບທັນສະໄໝ ສະອາດ ແລະ ມີມາດຕະຖານ ຊຶ່ງໜຶ່ງໃນນັ້ນກໍແມ່ນຜະລິດຕະພັນ “ປາແດກພອນປະເສີດ” ທີ່ເນັ້ນຄຸນນະພາບ ລົດຊາດ, ຄວາມສະອາດ ແລະ ກິ່ນຫອມ ອັນເປັນເອກະລັກ ທີ່ເຮັດໃຫ້ລູກຄ້າຫລາຍໆທ່ານຕ້ອງກັບມາຊື້ຊ້ຳ.
ທ່ານ ນາງ ພອນ ສິນໄຊວໍລະວົງ ໄດ້ໃຫ້ຮູ້ວ່າ: ໂຮງງານຜະລິດປາແດກພອນປະເສີດ ໂຮງງານຕັ້ງຢູ່ບ້ານດົງບັງ ເມືອງໄຊທານີ ນະຄອນຫລວງ ໄດ້ເລີ່ມດຳເນີນການຜະລິດມາປະມານ 4 ປີ ຊຶ່ງທຸກຂັ້ນຕອນການຜະລິດແມ່ນນັ້ນຄວາມສະອາດເປັນຫລັກ, ມີຄວາມປອດໄພຕໍ່ຜູ້ບໍລິໂພກ, ເນັ້ນລົດຊາດແຊບ ແລະ ກິ່ນຫອມເປັນເອກະລັກ; ໃນນັ້ນແຮງງານຕົ້ນຕໍປະມານ 10 ກວ່າຄົນ, ສ່ວນວັດຖຸດິບໄດ້ມີການເລືອກເຟັ້ນເອົາປາທີີ່ມີຄຸນນະພາບໂດຍສັ່ງຊື້ຈາກຂ້າປະຈຳຢູ່ເຂດປາກເຊ ແຂວງຈຳປາສັກ. ແນວໃດກໍດີ, ການເຮັດປາແດກຢາກໃຫ້ມີລົດຊາດທີ່ແຊບນັ້ນບໍ່ແມ່ນເລື່ອງງ່າຍ ທາງໂຮງງານໃຊ້ເວລາໝັກດົນເຖິງ 2 ປີ ແລະ ໄດ້ເລີ່ມຈຳໜ່າຍຜະລິດຕະພັນຢ່າງເປັນທາງການມາໄດ້ປະມານ 1 ກວ່າປີ ເນື່ອງຈາກການຜະລິດປາແດກຈຳເປັນຕ້ອງໃຊ້ເວລາໃນການໝັກ ເພື່ອໃຫ້ໄດ້ລົດຊາດແຊບຊ້ອຍທີ່ເອກະລັກສະເພາະ. ປາແດກພອນປະເສີດ ໄດ້ຜະລິດອອກມາ 3 ປະເພດຫລັກ ຄື: ປາແດກສຸກ, ປາແດກດິບ ແລະ ແຈ່ວປາແດກ ໂດຍໄດ້ຮັບຜົນຕອບຮັບດີຈາກຜູ້ບໍລິໂພກ ແລະ ປັດຈຸບັນໄດ້ນຳເຂົ້າຈຳໜ່າຍຢູ່ຮ້ານໂຊກທະວີທຸກສາຂາ. ລາຄາຈຳໜ່າຍ ປາແດກສຸກ ເລີ່ມຕົ້ນ 25.000 ກີບຕໍ່ຕຸກ, ແຈ່ວປາແດກ 35.000 ກີບຕໍ່ກັບ ແລະ ປາແດກດິບ 60.000 ກີບຕໍ່ກິໂລ. ເຖິງແນວໃດກໍດີ, ໃນອະນາຄົດ ທາງໂຮງງານມີແຜນຈະພັດທະນາຜະລິດຕະພັນເພີ່ມເຕີມ ເຊັ່ນ: ນ້ຳປາຫວານ ແລະ ແຈ່ວສຳລັບກິນກັບສົ້ມ ພ້ອມທັງຂະຫຍາຍຕະຫລາດໃຫ້ກວ້າງຂວາງຂຶ້ນຕື່ມ.
ທ່ານ ນາງ ຈິນດາ ສີຫາລາດ ຕົວແທນຈຳໜ່າຍປາແດກພອນປະເສີດ ໄດ້ໃຫ້ສຳພາດໃນໂອກາດເຂົ້າຮ່ວມງານເທສະການອາຫານລາວ ປະຈຳປີ 2026 ວ່າ: ການເຂົ້າຮ່ວມງານຄັ້ງນີ້ເປັນຄັ້ງທຳອິດທີ່ໄດ້ນຳເອົາຜະລິດຕະພັນປາແດກພອນປະເສີດ ມາຈຳໜ່າຍຢ່າງເປັນທາງການ ຊຶ່ງຈຸດປະສົງໃນການເຂົ້າຮ່ວມງານ ເພື່ອແນະນຳຜະລິດຕະພັນ /ປາແດກ ໃຫ້ສັງຄົມໄດ້ຮູ້ຈັກ, ໄດ້ເຫັນ, ໄດ້ຊີມ ແລະ ສາມາດຊື້ໄປປຸງແຕ່ງອາຫານ ຫລື ຊື້ເປັນຂອງຝາກຂອງຕ້ອນ ເນື່ອງຈາກປາແດກ ເປັນອາຫານເອກະລັກຂອງຄົນລາວ. ພ້ອມກັນນັ້ນ, ງານເທສະການອາຫານລາວ ຍັງເປັນເວທີສຳຄັນໃນການອະນຸຮັກ ແລະ ສົ່ງເສີມວັດທະນະທຳ ຮີດຄອງປະເພນີອັນດີງາມຂອງລາວ ໂດຍສະເພາະອາຫານພື້ນບ້ານຂອງແຕ່ລະທ້ອງ ຖິ່ນ.
ເອົາເປັນວ່າ ທ່ານໃດມີຄວາມສົນໃຈ ສາມາດຫາຊື້ປາແດກພອນປະເສີດໄດ້ທີ່ຮ້ານໂຊກທະວີທຸກສາຂາ ຫລື ຕິດຕໍ່ສັ່ງຊື້ໄດ້ທີ່ເບີ 020 5555 0455.
KPL
