ຂປລ. ແຂວງຄໍາມ່ວນ ເປັນອີກໜຶ່ງຈຸດໝາຍປາຍທາງການທ່ອງທ່ຽວ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ  ເນື່ອງຈາກວ່າ ມີສະຖານທີ່ທ່ອງທ່ຽວທີ່ຂຶ້ນຊື່ລືນາມ ເລື່ອງຄວາມສວຍງາມ ແລະ ມີປະຫວັດຄວາມເປັນມາທີ່ຍາວນານ ຈົນເຮັດໃຫ້ປັດຈຸບັນມີນັກທ່ອງທ່ຽວເຂົ້າມາທ່ຽວຊົມຢ່າງຫລວງຫລາຍບໍ່ຂາດສາຍໃນແຕ່ລະມື້ ແລະ ເມື່ອເວົ້າເຖິງສະຖານທີ່ທ່ອງທ່ຽວຂອງແຂວງຄໍາມ່ວນແລ້ວ ກໍມີຫລາຍແຫ່ງທີ່ມີຊື່ສຽງເປັນຕົ້ນ: ທ່າຝຣັ່ງ, ຖ້ຳນາງແອ່ນ, ປາສະຫງວນຫີນໜາມໝໍ່, ພູຜາມານ ແລະ ອື່ນໆ ທີ່ກໍາລັງເປັນທີ່ນິຍົມຂອງນັກທ່ອງທ່ຽວ ນັ້ນກໍຄື ແຫລ່ງທ່ອງທ່ຽວ ບຶງໜອງເທົາ ແລະ ຖໍ້າປາເຊືອມ ເປັນສະຖານທີ່ທ່ອງທ່ຽວທີ່ຫາກໍເປີດຂຶ້ນໃໝ່ ດ້ວຍເອກະລັກໂດດເດັ່ນ, ສວຍງາມສາມາດດຶງດູດນັກທ່ອງທ່ຽວເຂົ້າມາທ່ຽວຊົມຢ່າງຫລວງຫລາຍໃນແຕ່ລະມື້, ພາຍໃນຖ້ຳຈະໂພງຖໍ້າຂະໜາດໃຫຍ່,ມີຫີນງອກ-ຫີນຍ້ອຍຈັບຢູ່ຕາມຝາຜະໜັງດ້ານເທິງຂອງຖໍ້ຳຢ່າງຫລວງຫລາຍ ເມື່ອຫີນດັ່ງກ່າວກະທົບໃສ່ແສງດອກໄຟຍິ່ງເພ່ີ່ມຄວາມງົດງາມອາລັງການຈັບຕາຕ້ອງໃຈເມ່ືອພົບເຫັນ ແລະ ຫີນຍ່ອຍທີ່ຢ່ອນລົງມາຈະມີລັກສະນະຮູບແບບທີ່ແຕກຕ່າງກັນໄປຕາມແຕ່ລະຈຸດຂອງຖໍ້າ ໂດຍຖໍ້າແຫ່ງນີ້ ມີ 7 ຈຸດສໍາຄັນ ເພື່ອໃຫ້ນັກທ່ອງທ່ຽວເຂົ້າມາທ່ຽວຊົມຖ່າຍຮູບ ແລະ ສັກກາລະບູຊາ, ພ້ອມນັ້ນພາຍໃນຖ້ຳມີຂົວເຫລັກທີ່ສ້າງຂຶ້ນ, ປະດັບປະດາດອກໄຟຕາມທາງຍ່າງເພື່ອອຳນວຍຄວາມສະດວກໃຫ້ນັກທ່ອງທ່ຽວທີ່ເຂົ້າໄປທ່ຽວພາຍໃນຖ້ຳອີກດ້ວຍ.

ສໍາລັບ ແຫລ່ງທ່ອງທ່ຽວ ບຶງໜອງເທົາ ແລະ ຖໍ້າປາເຊືອມ ເປັນແຫລ່ງທ່ອງທ່ຽວອຸດົມສົມບູນໄປດ້ວຍທຳມະຊາດ ທີ່ສວຍສົດງົດງາມ ຊຶ່ງຕັ້ງຢູ່ບ້ານນາຂ້າງຊ້າງ ຢູ່ບໍ່ໄກຈາກເທສະບານເມືອງທ່າແຂກ ແຂວງຄຳມ່ວນ ອອກໄປທາງທິດຕາເວັນອອກ ປະມານ 17 ກິໂລແມັດ, ໂດຍແມ່ນບໍລິສັດ ເພັດມະນີ ເຄພີຊີ ຈຳກັດຜູ້ດຽວ ເປັນຜູ້ສໍາປະທານ ແລະ ພັດທະນາ, ມີເນື້ອທີ່ເຂດພັດທະນາ 9,89 ເຮັກຕາ ແລະ ເນື້ອທີ່ເຂດອະນຸລັກ 404 ເຮັກຕາ; ໃນນັ້ນ ປະກອບມີການປຸກສ້າງສະຖານທີ່ຮອງຮັບ ແລະ ສູນບໍລິການ, ສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ, ສິ່ງອໍານວຍຄວາມສະດວກໃນການທ່ອງທ່ຽວ, ກິດຈະກຳຂີ່ເຮືອ, ຍ່າງປ່າ, ຍ່າງຂົວທ່ຽວຊົມພາຍໃນຖໍ້າເບິ່ງຫີນຫງອກ-ຫີນຍ້ອຍ ທີ່ມີຄວາມສວຍງາມຢ່າງໜ້າຕື່ນຕາຕື່ນໃຈ ແລະ ມີກິດຈະກໍາອື່ນໆອີກຫລາກຫລາຍ ດ້ວຍມູນຄ່າການລົງທຶນທັງໝົດ 3 ລ້ານໂດລາສະຫະລັດ ໂດຍແມ່ນການລົງທຶນຂອງນັກລົງທຶນພາຍໃນ 100%  ແລະ ມີໄລຍະການສໍາປະທານ 50 ປີ. ປັດຈຸບັນ ແມ່ນກໍາລັງເລັ່ງປັບປຸງສະຖານທີ່ຈອດລົດ, ກໍ່ສ້າງຫ້ອງນໍ້າ, ກໍ່ສ້າງເສັ້ນທາງຍົກສູງຂຶ້ນຈາກລະດັບນໍ້າເຂົ້າຫາແຫລ່ງທ່ອງທ່ຽວ, ຮ້ານອາຫານ, ຈຸດບໍລິການ ແລະ ຂົວຍ່າງທ່ຽວຊົມພາຍໃນຖໍ້າ ເພື່ອຮອງຮັບນັກທ່ອງທ່ຽວທີ່ເພີ່ມຂຶ້ນເລື້ອຍໆ.

ພະນັກງານ ນໍາທ່ຽວ ແຫລ່ງທ່ອງທ່ຽວ ບຶງໜອງເທົາ ແລະ ຖໍ້າປາເຊືອມ ໄດ້ໃຫ້ຮູ້ວ່າ: ສໍາລັບ ສະຖານທ່ອງທ່ຽວແຫ່ງນີ້ເປີດໃນວັນທີ 14 ເດືອນເມສາ ປີ 2025 ເປັນຕົ້ນມາກໍເຫັນວ່າ ມີນັກທ່ອງທ່ຽວເຂົ້າມາທ່ຽວຊົມສະຖານທ່ຽວຊົມຢ່າງຫລວງຫລາຍໃນແຕ່ລະມື້ ຊຶ່ງຕົນເອງເປັນພະນັກງານນໍາທ່ຽວ ກໍມີໜ້າທີ່ແນະນໍາສະຖານທີ່ສໍາຄັນແຕ່ລະຈຸດ ທີ່ມີທັງໝົດ 8 ຈຸດ, ໃນນັ້ນຈຸດທໍາອິດແມ່ນວັງປາເຊື່ອມ ເນື່ອງຈາກວ່າ ເປັນຈຸດທໍາອິດທີ່ເຂົ້າມາດ້ານເທິງຂອຖໍ້າຈະເປັນຫີນຍ່ອຍທີ່ສວຍງາມ ແລະ ດ້ານລຸ່ມຈະເປັນວັງນໍ້າທີ່ມີປາເຊື່ອມຈໍານວນຫລາຍ ຈຶ່ງໃສ່ຊື່ວ່າ: “ວັງປາເຊື່ອມ”,ຈຸດທີສອງ ແມ່ນວັງພະລືສີ ,ຈຸດທີສາມຖໍ້າຂອງພະຍານາກ, ວັງຂອງພະຍານາກ, ຈຸດທີ 5 ວັງຂອງເທວະດາ,ຈຸດທີ 6 ແມ່ນຊ້າງ ສາມຫົວ,ຈຸດທີ 7 ແມ່ນ ປ່າຫິມະພານ  ແລະ ຈຸດສຸດທ້າຍ ກໍຈະເປັນກະດູກສັນຫລັງຂອງພະຍານາກ ທີ່ມີການຈໍາລອງເພື່ອໃຫ້ເປັນຈຸດທ່ຽວຊົມຂອງນັກທ່ອງທ່ຽວ ບອກໄດ້ເລີຍວ່າ ແຕ່ລະຈຸດນັ້ນ ຈະມີຄວາມສວຍງາມທີ່ແຕກຕ່າງກັນໄປ.

KPL