ຂປລ. ຫລວງພະບາງ ສ້າງຕັ້ງຂຶ້ນກ່ອນໜ້າ ນີ້ປະມານ 1.200 ກວ່າປີ, ເປັນເມືອງຫລວງເກົ່າຂອງ ອານາຈັກລາວລ້ານຊ້າງ ໂດຍ ໄດ້ປ່ຽນຊື່ເອີ້ນຫລາຍຄັ້ງຄື: ເມືອງຊວາ, ຊຽງດົງ, ຊຽງທອງ ແລະ ເມືອງຫລວງພະບາງ ໃນປັດຈຸບັນ. ການທີ່ໃສ່ຊື່ເມືອງຫລວງພະບາງ ນັ້ນແມ່ນ ພະເຈົ້າຟ້າງຸ່ມມະຫາລາດ ໄດ້ນຳເອົາພະບາງ ເຊິ່ງເປັນອົງພະພຸດທະຮູບ ທີ່ສັກສິດ, ເປັນມິ່ງບ້ານ- ຂວັນເມືອງມາສະຖິດໄວ້ເມືອງຊຽງທອງ ໃນສະໄໝກ່ອນ ແລະ ດ້ວຍຄວາມ ສັດທາ-ເຊື່ອຖື ຢ່າງ ແຮງກ້າ ຂອງປະຊາຊົນຊາວ ຫລວງພະບາງ ຈຶ່ງໄດ້ ປ່ຽນຊື່ ເອີ້ນຂອງເມືອງຕາມຊື່ຂອງອົງພະບາງ ເປັນ ເມືອງຫລວງພະບາງ ມາເຖິງທຸກວັນນີ້. ຍ້ອນເຄີຍເປັນເມືອງຫລວງເກົ່າ ຂອງອານາຈັກລາວລ້ານຊ້າງ, ຫລວງພະບາງ ຈຶ່ງ ຄວາມໂດດເດັ່ນ ທາງດ້ານວັດທະນະທຳ, ປະຫວັດສາດ ແລະ ທຳມະຊາດ ເຊິ່ງສະແດງອອກເຖິງ ວິຖີການດຳລົງຊີວິດຂອງຊາວເມືອງ ໂດຍສ ເພາະແມ່ນການສືບທອດ ຂະນົບທຳນຽມ, ຮີດຄອງປະເພນີ, ສິລະປະວັນນະຄະດີ, ການປຸກ ສ້າງອາຄານ- ສະຖານທີ່, ພະພຸດທະຮູບ, ການແຕ້ມ, ຄວັດ-ແກະສະຫລັກຕ່າງໆ,ລວມທັງການຮັກສາສິ່ງແວດລ້ອມ ຈຶ່ງເຮັດໃຫ້ຕົວເມືອງຫລວງພະບາງ ໄດ້ຮັບການຮັບຮອງຈາກອົງການອຸຍແນັສໂກ ໃຫ້ເປັນເມືອງ ມໍລະດົກຂອງໂລກ ນັບແຕ່ວັນທີ 9 ທັນວາ ປີ 1995 ເປັນຕົ້ນມາ.

ຄວາມເອກອ້າງທະນົງໃຈ, ຄວາມປິຕິຍິນດີ ແລະ ຄວາມພາກພູໃຈຂອງປວງຊົນລາວ ທັງຊາດຕໍ່ເມືອງມໍລະດົກ ຫລວງພະບາງນັ້ນ ບໍ່ໄດ້ເປັນພຽງຄຸນຄ່າທາງຈິດໃຈ ເທົ່ານັ້ນ ຫາກຍັງນໍາຊື່ສຽງ ແລະ ຖານະບົດບາດ ຂອງ ສປປ ລາວ ໃຫ້ຊາວໂລກໄດ້ຮັບຮູ້ ແລະ ໄດ້ເຫັນເມືອງຫລວງພະບາງ ຕັ້ງຢູ່ເກາະ ຫລື ເອີ້ນວ່າດອນນ້ອຍກໍວ່າໄດ້ ທ່າມກາງສາຍນໍ້າຄານ ແລະ ແມ່ນໍ້າຂອງ ໂອບອ້ອມຫລໍ່ຫລອມ ໃຫ້ເປັນເອກະລັກແບບໜຶ່ງ ບໍ່ຄືໃຜໃນພາກເໜືອ ຂອງ ສປປ ລາວ. ພ້ອມນັ້ນ, ແຂວງຫລວງພະບາງ ເຕັມໄປດ້ວຍສະຖານທີ່ທ່ອງທ່ຽວທາງດ້ານທໍາມະຊາດ, ປະຫວັດສາດ, ວັດທະນະທໍາອັນດີງາມ ແລະ ວິຖີດໍາລົງຊີວິດແບບດັ້ງເດີມ ຂອງຊາວເມືອງ ເປັນຕົ້ນ: ວັດຊຽງທອງ, ວັດວິຊຸນ,ຫໍພິພິທະພັນຫລວງພະບາງ (ພະຣາຊະວັງເກົ່າ), ພະທາດພູສີ, ວັດໃໝ່, ວັດທາດຫລວງວັດແສນ, ວັດຊຽງແມນ, ວັດໂພນເພົາ, ຕະຫລາດກາງຄືນ, ຕະຫລາດເຊົ້າ, ຕະຫລາດໂພສີ, ສູນວາງສະແດງຊົນເຜົ່າວິທະຍາ, ສູນຫັດຖະກໍາ(ອອກພົບຕົກ), ສະໜາມກ໊ອບ ຫລວງພະບາງ, ບ້ານຜານົມ, ບ້ານຈ່ານ, ບ້ານຊ່າງໄຫ, ຖໍ້າຕິ່ງ (ປາກ ອູ), ຕາດກວາງຊີ, ແຄ້ມຊ້າງ, ຕາດແສ້, ໜອງຂຽວ-ເມືອງງອຍເກົ່າ ແລະ ອື່ນໆ. ໃນອະອີດ, ແຂວງຫລວງພະບາງ ເຄີຍເປັນນະຄອນຫລວງຂອງລາວ, ເປັນແຂວງທີ່ມີຈຸດພິເສດ ແຕກຕ່າງຈາກແຂວງອື່ນໆ ເຊິ່ງອຸດົມສົມບູນ ແລະ ຮັ່ງມີ ໄປດ້ວຍວັດວາອາຮາມ ປູສະນິຍະສະຖານ, ວັດຖຸບູຮານ ແລະ ສະຖາປັດຕະຍະກໍາ ອັນເກົ່າແກ່ຈົນກາຍ ເປັນຄັງສາງທີ່ມີຄວາມສໍາຄັນ ໃນການເກັບມ້ຽນ ແລະ ປົກປັກຮັກສາ ວັດຖຸສິ່ງຂອງເຫລົ່ານັ້ນໄວ້ ເຊິ່ງລວມທັງວັດທະນະທໍາ, ຮີດຄອງປະເພນີ ແລະ ແບບແຜນດໍາລົງຊີວິດ ກໍຍັງຄົງຮັກສາໄວ້ເປັນຢ່າງດີ.

ປັດຈຸບັນຫລວງພະບາງ ນັບວ່າເປັນນະຄອນແຫ່ງມົນສະເໜ່ຂອງນັກທ່ອງທ່ຽວ ເພາະແຂກທີ່ເດີນ ທາງມາຍັງດິນແດນແຫ່ງນີ້ ລ້ວມແຕ່ມີຄວາມປະທັບໃຈກັບໄມຕີຈິດມິດຕະພາບຂອງຊາວເມືອງ, ທີ່ມີຄວາມຍິ້ມແຍ້ມແຈ່ມໃສ ໂອບເອື້ອອາລີຕໍ່ ແຂກທີ່ມາຢ້ຽມຢາມ, ມີຂະນົບທຳນຽມປະເພນີ ທີ່ງົດງາມ ຈຶ່ງເຮັດໃຫ້ຫລວງພະບາງເປັນຈຸດ ໝາຍປາຍທາງຂອງນັກທ່ອງທ່ຽວນາໆປະເທດ, ເປັນເມືອງທີ່ມີຄວາມອຸດົມສົມບູນ ທາງດ້ານສະຖານທີ່ທ່ອງທ່ຽວ ຫລາຍທີ່ສຸດຂອງ ສປປ ລາວ ເຊິ່ງປະກອບມີແຫລ່ງທ່ອງທ່ຽວທັງໝົດ 228 ແຫ່ງ, ໃນນີ້ ມີແຫລ່ງທ່ອງທ່ຽວທາງທຳມະຊາດ 108 ແຫ່ງ, ແຫຼ່ງທອງທ່ຽວທາງວັດທະນະທຳ 86 ແຫ່ງ ແລະ ແຫລ່ງທ່ອງທ່ຽວ ທາງປະຫວັດສາດ 34 ແຫ່ງ. ເມື່ອທ່ານເດີນທາງມາຍັງຫລວງພະບາງ ສິ່ງທີ່ພາດບໍ່ໄດ້ກໍຄືການຂຶ້ນທ່ຽວຊົມພະທາດພູສີ ທີ່ຕັ້ງເດັ່ນສະງ່າຢູ່ກາງເມືອງຫລວງພະບາງ, ເມື່ອຂຶ້ນໄປແລ້ວທ່ານຈະສາມາດຫລຽວເຫັນທິວທັດທຳມະຊາດຂອງເມືອງຫລວງພະບາງ ໄດ້ຢ່າງເຕັມຕາ, ທ່ຽວຊົມວັດຊຽງທອງ ເຊິ່ງເປັນວັດທີ່ສວຍງາມທີ່ສຸດ, ຊົມຫໍພິພິທະພັນແຫ່ງຊາດຫລວງພະບາງ, ດຶມດຳ ກັບອາກາດບໍລິສຸດທີ່ນ້ຳຕົກຕາດກວາງຊີ, ທ່ຽວຊົມເຄື່ອງຫັດຖະກຳເຄື່ອງປັ້ນດິນເຜົາບ້ານຈ່ານ , ຊົມຫັດຖະກຳເຈ້ຍສາ ບ້ານຊ່າງຄ້ອງ, ລອງເຮືອຊົມຖ້ຳຕິ່ງ, ແລ້ວມາຢ້ຽມຊົມຕະຫລາດກາງຄືນ, ຕື່ນເຊົ້າມາໃສ່ບາດແຄມທາງ ແລະ ອືື່ນໆ ເຊິ່ງນີ້ກໍເປັນພຽງການ ແນະນຳກິດຈະກຳບາງສ່ວນ ທີ່ພາດບໍ່ໄດ້ເມື່ອທ່ານ ມາຍັງຫລວງພະບາງ ດິນແດນແຫ່ງອາລິຍະທຳແຫ່ງນີ້.

ນອກຈາກຈະມີສະຖານ ທີ່ທ່ອງທ່ຽວ ທີ່ສວຍງາມຂຶ້ນຊື່ລະດັບໂລກແລ້ວ ຫລວງພະບາງ ຍັງມີສະຖານ ທີ່ພັກຜ່ອນຢ່ອນໃຈທີ່ສະດວກສະບາຍ ໄວ້ຄອຍຮອງຮັບແຂກທີ່ມາທ່ຽວຊົມ ສະອາດຈົບງາມ ໄດ້ມາດຕະຖານສາກົນ ເຊິ່ງຫລວງພະບາງ ມີໂຮງແຮມທັງໝົດ 90 ກວ່າແຫ່ງ, ເຮືອນພັກ 300 ກວ່າແຫ່ງ ແລະ ຮ້ານອາຫານ 300 ກວ່າແຫ່ງ, ມີບໍລິສັດທ່ອງທ່ຽວ 90 ກວ່າບໍລິສັດ. ສຳລັບໃນຕົ້ນປີ 2026 ຜ່ານມານີ້  ສປປ ລາວ ໄດ້ ຮັບລາງວັນມາດຕະຖານການທ່ອງທ່ຽວອາຊຽນ ທີ່ຈັດຂຶ້ນຢູ່ປະເທດຟິລິບປິນ ໃນນັ້ນ ສປປ ລາວ ກໍໄດ້ຮັບຫລາຍກວ່າ 20 ລາງວັນ  ແລະ ແຂວງຫລວງພະບາງ ກໍເປັນອີກໜຶ່ງແຂວງທີ່ໄດ້ຮັບລາງວັນ ມາດຕະຖານໂຮງແຮມອາຊຽນ ຄື: ໂຮງແຮມເດິແກຣນຫລວງພະບາງ ແລະ ໂຮງແຮມຢູຫລວງພະບາງ; ມາດຕະຖານເມືອງທ່ອງທ່ຽວສະອາດອາຊຽນ ຄື:​ນະຄອນຫລວງພະບາງ,​ ລາງວັນການທ່ອງທ່ຽວແບບຍືນຍົງອາຊຽນ ຄື: ຫໍພິພິທະພັນແຫ່ງຊາດ ແຂວງຫລວງພະບາງ ເປັນລາງວັນສໍາລັບຜະລິດຕະພັນການທ່ອງທ່ຽວໃນຕົວເມືອງ ແລະ ລາງວັນປະເພດສະຖານທີ່ຈັດງານເທສະການ ຄື: ໂຮງແຮມເດິແກຣນ ຫລວງພະບາງ.

ເຖິງແນວໃດກໍຕາມ, ຖ້າທ່ານໄດ້ໄປທ່ຽວຊົມດິນແດນເມືອງ ມໍລະດົກໂລກແຫ່ງນີ້ ເພື່ອໄປເປີດ ຫູເປີດຕາໃຫ້ຫາຍ ຈາກຄວາມເຄັ່ງຕຶງ, ຄວາມອິດເມື່ອຍນໍາວຽກນໍາງານ ກໍຢ່າລືມໄປຊີມລົດຊາດອາຫານພື້ນເມືອງແຊບໆ ອັນເປັນເອກະ ລັກສະເພາະ ຂອງແຂວງຫລວງພະບາງ ທີ່ມີຊື່ສຽງໂດ່ງດັງ ເຊັ່ນ: ເອາະຫລາມ, ແຈ່ວບອງ, ໄຄແຜ່ນ ແລະ ໄສ້ອົ່ວແຊບໆນໍາອີກ ເຊິ່ງທັງໝົດເຫລົ່ານີ້ ໄດ້ກາຍເປັນມົນສະເໜ່ ອັນໜຶ່ງທີ່ດຶງດູດຈິດໃຈ ບັນດານັກທ່ອງທ່ຽວອີກດ້ວຍ. ດັ່ງມີຄໍາຂວັນປະຈໍາຂອງແຂວງ ເວົ້າວ່າ:  “ຫລວງພະບາງເມືອງງາມອາຮາມຮຸ່ງ ເມືອງນຸ່ງສິ້ນໄໝ ຂວັນໃຈນັກທ່ອງທ່ຽວ ເມືອງກ້ຽວຄໍາຫວານ ຕໍານານເມືອງຂັບທຸ້ມ ງາມພູຕັ້ງກາງເມືອງ ເລືອງລືວັດທະນະທໍາ ເອາະຫລາມໃສ່ສະຄານ ງາມຊ່ວງເຮືອເດືອນເກົ້າ ວັດເກົ່າແກ່ມາກມີ ຕາດກວາງຊີ, ຖໍ້າຕິ່ງເປັນ ມິ່ງເມືອງມໍລະດົກໂລກ”.

ໂດຍ:ແສງສະຫວັນ

KPL