ຂປລ. ໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ໃນວັນທີ 18 ມິຖຸນາ 2025   ນີ້, ທ່ານ ສຳລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ສະເໜີຮ່າງກົດໝາຍວ່າດ້ວຍສາມັນສຶກ ສະບັບສ້າງໃໝ່. ຈາກນັ້ນ, ບັນດາສະມາຊິກສະພາແຫ່ງຊາດ (ສສຊ) ໄດ້ສຸມໃສ່ປະກອບຄຳຄິດຄຳເຫັນຢ່າງກົງໄປກົງມາ ເຊິ່ງໂດຍລວມແລ້ວ ແມ່ນເຫັນດີເປັນເອກະພາບ ທາງດ້ານໂຄງສ້າງ ແລະ ເນື້ອໃນ ຂອງຮ່າງກົດໝາຍສະບັບນີ້, ແຕ່ຍັງມີ ສສຊ ບາງທ່ານ ສະເໜີ ໃຫ້ປັບປຸງ, ຕັດອອກ, ຕື່ມໃສ່ບາງເນື້ອໃນຢູ່ບາງໝວດ, ບາງມາດຕາ ທີ່ເຫັນວ່າຍັງບໍ່ທັນຖືກຕ້ອງ, ສອດ ຄ່ອງ, ຮັດກຸມ ເທົ່າທີ່ຄວນ ເພື່ອເຮັດໃຫ້ຮ່າງກົດໝາຍສະບັບນີ້ ຖືກຕ້ອງ, ຮັດກຸມ ສາມາດນຳໄປຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ  ປະສິດສິຜົນ. ພ້ອມນີ້, ສສຊ ຍັງໄດ້ສະເໜີໃຫ້ລັດຖະບານ ສຸມທຶນຮອນ ເຂົ້າໃສ່ການພັດທະນາ ລະບົບການສຶກສາ ໃຫ້ຫລາຍຂຶ້ນກວ່າເກົ່າ ໂດຍສະເພາະ ຢູ່ເຂດຫ່າງໄກສອກຫລີກ.

​ທ່ານ ທັນຕາ ກອງຜາລີ ສສຊ ປະຈໍາເຂດເລືອກຕັ້ງ 18 ແຂວງໄຊສົມບູນ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ສ້າງຮ່າງກົດໝາຍສະບັບນີ້ ເຊິ່ງເຫດຜົນ ແລະ ຄວາມຈໍາເປັນໃນການສ້າງຮ່າງກົດໝາຍສະບັບນີ້ ແນໃສ່ຫລຸດຜ່ອນອັດຕາການປະລະຂອງນັກຮຽນ ແລະ ເພີ່ມຄວາມຮັບຜິດ ຊອບຂອງ ພໍ່, ແມ່ ຫລື ຜູ້ປົກຄອງ, ຊຸມຊົນ ແລະ ສັງຄົມ ສົ່ງເສີມລູກຫລານ ໃນເກນອາຍຸໃຫ້ເຂົ້າຮຽນ ໂດຍສະເພາະ ແມ່ນການສຶກສາພາກບັງຄັບ, ທັງຊຸກຍູ້ ແລະ ສົ່ງເສີມການລົງທຶນທັງພາກລັດ ແລະ ເອ ກະຊົນ ເຂົ້າໃສ່ວຽກງານສາມັນສຶກສາໃຫ້ຫລາຍຂຶ້ນ, ທັງເຮັດໃຫ້ການຄຸ້ມຄອງ, ບໍລິຫານວຽກງານສາ ມັນສຶກສາ ມີຄວາມເປັນເອກະພາບ, ມີປະສິດທິພາບ ແລະ ປະສິດທິຜົນ, ທັງຮັບປະກັນຄຸນນະພາບການສຶກສາ ສອດຄ່ອງ ກັບສະພາບການປ່ຽນແປງໃນໄລຍະໃໝ່.

ໂອກາດ​ນີ້, ທ່ານ ທັນຕາ ກອງຜາລີ ຍັງໄດ້​ໃຫ້​ສໍາພາດ​ຕໍ່​ສື່​ມວນ​ຊົນ ຕໍ່​ກັບ​ຮ່າງ​ກົດໝາຍ​ດັ່ງກ່າວ​ເຊິ່ງທ່ານ​ໄດ້ສະເໜີໃຫ້ ລັດຖະບານ ສຸມທຶນຮອນ ເຂົ້າໃສການພັດທະນາລະບົບການສຶກສາ ຢູ່ ສປປ ລາວ ໃຫ້ຫລາຍຂຶ້ນກວ່າເກົ່າ ໂດຍສະເພາະ ພັດທະນາພື້ນຖານໂຄງລ່າງດ້ານການສຶກສາ ເຂດຫ່າງໄກສອກຫລີກ ເປັນຕົ້ນ ອາຄານຮຽນ, ທີ່ພັກຄູ-ນັກຮຽນ, ຊຸກຍູ້ສົ່ງເສີມອາຫານທ່ຽງໃນໂຮງຮຽນ ແລະ ອື່ນໆ ເພື່ອເຮັດໃຫ້ລະບົບການສຶກສາ ຢູ່ ສປປ ລາວ ກໍຄື ຢູ່ເຂດຫ່າງໄກສອກຫລີກ ໄດ້ຮັບການພັດທະນາ ແນໃສ່ຫລີກລ່ຽງການປະລະການຮຽນ ໃຫ້ຫລຸດລົງເທື່ອລະກ້າວ.  ພ້ອມນີ້, ລັດຕ້ອງສ້າງເງື່ອນໄຂ ຮັບປະກັນໃຫ້ພົນລະເມືອງລາວ ໄດ້ເຂົ້າເຖິງສາມັນສຶກສາ ຢ່າງສະເໜີພາບ ແລະ ທົ່ວເຖິງ. ໃນໄລຍະຜ່ານມາ ເຖິງວ່າກົດໝາຍວ່າດ້ວຍການສຶກສາ ໃນປີ 2015 ໄດ້ກໍານົດວ່າ ລັດຕ້ອງຈັດສັນງົບປະມານ ໃຫ້ຂະແໜງການສຶກສາໃຫ້ເພີ່ມຂຶ້ນຈົນບັນລຸ 18% ຂອງລາຍຈ່າຍງົບປະມານແຫ່ງລັດ ກໍຕາມ ແຕ່ການປະຕິບັດຕົວຈິງຜ່ານມາໄດ້ແຕ່ 13-14% ຂອງລາຍຈ່າຍງົບປະມານປະຈໍາປີເທົ່ານັ້ນ. ບັນຫານີ້ ຕ້ອງບຸກທະລຸໃຫ້ໄດ້ ແລະ ກໍານົດໃຫ້ແຈ້ງຢູ່ໃນກົດໝາຍສະບັບນີ້.

ທ່ານ ທັນຕາ ກອງຜາລີ ຍັງໃຫ້ຮູ້ອີກວ່າ: ສະເພາະ ສະພາບການສຶກສາຢູ່ພາຍໃນແຂວງໄຊສົມ ບູນ ຕົນເອງໄດ້ລົງພົບປະປະຊາຊົນຢູ່ຫລາຍເມືອງ ​ເຊິ່ງບັນຫາສໍາຄັນຫລາຍທີ່ສຸດ ແມ່ນເລື່ອງງົບປະມານ ການສຶກສາ ໃນການບໍລິຫານໂຮງຮຽນຕ່າງໆ ແມ່ນບໍ່ພຽງພໍ, ຂາດງົບປະມານສ້ອມແປງ ໂຕະ-ຕັ່ງ ທີ່ເປ່ເພ, ອາຄານຮຽນທີ່ເກົ່າ ​ແລະ ພື້ນຖານໂຄງລ່າງຕ່າງໆ ໂຄງການອາຫານກາງເວັນຂອງນັກຮຽນ ກໍບໍ່ໄດ້ຮັບການຊ່ວຍເຫລືອ ຍ້ອນວ່າຍັງກຽມເງື່ອນໄຂຕ່າງໆບໍ່ທັນໄດ້. ສຳລັບ ບັນຫາການປະລະການຮຽນ ຕົ້ນຕໍ ແມ່ນເກີດຈາກຄວາມທຸກຍາກຂາດເຂີນ ຂອງບາງຄອບຄົວ. ສະນັ້ນ, ລັດຖະບານ ແລະ ທຸກພາກ ສ່ວນໃນສັງຄົມ ຕ້ອງໄດ້ພ້ອມກັນເຮັດແນວໃດ ໃຫ້ວຽກງານການສຶກສາ ໄດ້ຮັບການພັດທະນາ ແລະ ບຸກທະລຸ ເພື່ອໃຫ້ລູກຫລານຂອງພວກເຮົາ ໄດ້ຮັບການສຶກສາທຸກທົ່ວໜ້າ ບໍ່ໃຫ້ປະປ່ອຍໃຜໄວ້ຂ້າງຫລັງ.

ຂ່າວ: ທະນູທອງ

KPL