ຂປລ. ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ  IX ໃນວັນທີ 13 ມິຖຸນາ 2025 ນີ້, ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ໄດ້ລາຍງານການສະຫລຸບຕີລາຄາ ການໂຄສະນາເຜີຍແຜ່ກົດໝາຍ ຂອງລັດຖະບານ ເຊິ່ງກົດໝາຍທີ່ຢູ່ໃນຄວາມຮັບຜິດຊອບຂອງລັດຖະບານ ມີທັງໝົດ 147 ສະບັບ. ໃນນັ້ນ, ໄດ້ໂຄສະນາເຜີຍແຜ່ 143 ກົດໝາຍ, ຍັງ 4 ກົດໝາຍທີ່ຫຍັງບໍ່ທັນໄດ້ເຜີຍແຜ່ ເຊິ່ງການໂຄສະນາເຜີຍແຜ່ກົດໝາຍ ແມ່ນຂັ້ນຕອນທຳອິດຂອງ ການຈັດຕັ້ງປະຕິບັດກົດໝາຍ ແລະ ມີບົດບາດສໍາຄັນຕໍ່ການບັງຄັບໃຊ້ກົດໝາຍ ໃຫ້ໄດ້ຮັບຜົນດີ ແລະ ເປັນຮູບປະທຳ.

ທ່ານ ໄພວີ ສີບົວລິພາ ໄດ້ໃຫ້ຮູ້ວ່າ: ຜ່ານການສັງຮວມຕີລາຄາການ ໂຄສະນາເຜີຍແຜ່ກົດໝາຍ ຂອງແຕ່ລະຂະແໜງການ ພາຍຫລັງປັບປຸງລັດຖະທຳມະນູນ ປີ 2015 ເປັນຕົ້ນມາ ເຫັນວ່າ ແຕ່ລະຂະແໜງການ ແຕ່ສູນກາງຮອດທ້ອງຖິ່ນ ໄດ້ຖືເອົາການໂຄສະນາເຜີຍແຜ່, ສຶກສາອົບຮົມສ້າງສະຕິເຄົາລົບກົດໝາຍ ເປັນວຽກງານໜຶ່ງທີ່ມີຄວາມສໍາຄັນ ເພາະເປັນການໂຄສະນາເຜີຍແຜ່ ແນວທາງນະໂຍບາຍ ທີ່ໄດ້ຜັນຂະຫຍາຍ ມາເປັນຫລັກການ, ລະບຽບການ ແລະ ມາດຕະການລະອຽດ ໃນທຸກຂົງເຂດວຽກງານ; ກະຊວງ, ອົງການ ຕະຫລອດຮອດອົງການປົກຄອງທ້ອງຖິ່ນ ໄດ້ເອົາໃຈໃສ່ຈັດຕັ້ງປະຕິບັດວຽກງານດັ່ງກ່າວ ຢ່າງແຂງແຮງ ແລະ ເລິກເຊິ່ງ ເຮັດໃຫ້ພະນັກງານ-ລັດຖະ ກອນ, ກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ປະຊາຊົນລາວບັນດາເຜົ່າ ມີສະຕິຕື່ນຕົວເຄົາລົບ ແລະ ປະຕິບັດກົດໝາຍສູງຂຶ້ນ, ສັງຄົມມີຄວາມສະເໝີພາບ, ສະຫງົບ, ເປັນລະບຽບຮຽບຮ້ອຍ ແລະ ຍຸຕິທໍາ ໂດຍພື້ນ ຖານ.

ປັດຈຸບັນ, ກົດໝາຍທີ່ຢູ່ໃນຄວາມຮັບຜິດຊອບຂອງລັດຖະບານ ມີທັງໝົດ 147 ສະບັບຄື: ຫ້ອງວ່າການສໍານັກງານນາຍົກລັດຖະມົນຕີ ມີ 1 ສະບັບ; ກະຊວງພາຍໃນ 5 ສະບັບ; ກະຊວງຍຸຕິທໍາ 10 ສະບັບ; ກະຊວງການຕ່າງປະເທດ 5 ສະບັບ; ກະຊວງປ້ອງກັນປະເທດ 5 ສະບັບ; ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ 10 ສະບັບ; ກະຊວງປ້ອງກັນຄວາມສະຫງົບ 9 ສະບັບ; ກະຊວງສຶກສາທິການ ແລະ ກິລາ 6 ສະບັບ; ກະຊວງອຸດສະຫະກຳ ແລະ ການຄ້າ 12 ສະບັບ; ກະຊວງພະລັງງານ ແລະ ບໍ່ແຮ່ 3 ສະບັບ; ກະຊວງການເງິນ 16 ສະບັບ; ກະຊວງແຜນການ ແລະ ການລົງທຶນ 4 ສະບັບ; ກະຊວງກະສິກຳ ແລະ ປ່າໄມ້ 10 ສະບັບ; ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ 5 ສະບັບ; ກະຊວງສາທາລະນະສຸກ 13 ສະບັບ; ກະຊວງໂຍທາທິການ ແລະ ຂົນສົ່ງ 11 ສະບັບ; ກະຊວງເຕັກໂນໂລຊີ ແລະ ການສື່ສານ 10 ສະບັບ; ກະຊວງແຮງງານ ແລະ ສະຫວັດດີການສັງຄົມ 6 ສະບັບ ແລະ ທະນະຄານ ແຫ່ງ ສປປ ລາວ 6 ສະບັບ. ໃນ 147 ກົດໝາຍດັ່ວກ່າວ, ໄດ້ໂຄສະນາເຜີຍແຜ່ 143 ກົດໝາຍ. ໃນນີ້, ກົດໝາຍທີ່ຍັງບໍ່ໄດ້ໂຄສະນາ ມີ 4 ສະບັບ ຄື: ກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ, ພິພິຕະພັນ, ວິຈິດສິນ, ການພັດທະນາສີມືແຮງງານ (ກົດໝາຍວ່າດ້ວຍການພັດທະນາສີມືແຮງງານ ແມ່ນສ້າງໃໝ່ ຊຶ່ງໄດ້ປະກາດໃຊ້ໃນວັນທີ 23 ມັງກອນ 2025 ຕາມ ລັດຖະດໍາລັດຂອງປະທານປະເທດ).

ທ່ານ ໄພວີ ສີບົວລິພາ ຍັງໃຫ້ຮູ້ອີກວ່າ: ການໂຄສະນາເຜີຍແຜ່ກົດໝາຍ ແມ່ນວຽກງານໜຶ່ງທີ່ສໍາຄັນ ເປັນການຈັດຕັ້ງຜັນຂະຫຍາຍແນວທາງຂອງພັກ, ເປັນກະບອກສຽງທີ່ແຫລມຄົມຂອງ ພັກ-ລັດ, ນໍາໃຊ້ເຂົ້າໃນການປຸກລະດົມຂົນຂວາຍປວງຊົນລາວທັງຊາດ ໃຫ້ມີຄວາມເຂົ້າໃຈ, ເຊື່ອໝັ້ນຕໍ່ການຄຸ້ມຄອງ, ບໍລິຫານຂອງລັດ, ເປັນເຈົ້າການປະຕິບັດລັດຖະທຳມະນູນ, ກົດໝາຍ, ມີຄວາມຕື່ນຕົວປະກອບສ່ວນເຂົ້າໃນພາລະກິດ ປົກປັກຮັກສາ ແລະ ພັດທະນາປະເທດຊາດ; ເຮັດໃຫ້ພົນລະເມືອງມີສະຕິຕື່ນຕົວ, ມີຄວາມສົນໃຈ ແລະ ນໍາໃຊ້ກົດໝາຍເຂົ້າໃນການດໍາລົງຊີວິດ, ມີສະຕິເຄົາລົບ ແລະ ປະຕິບັດກົດໝາຍຂອງລັດສູງຂຶ້ນເປັນກ້າວໆ ຮັບປະກັນຄວາມສະເໝີພາບຕໍ່ໜ້າກົດໝາຍ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທໍາ ໂດຍພື້ນຖານ; ຍົກສູງບົດບາດຂອງອົງການຈັດຕັ້ງ ພັກ, ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ເພື່ອຕອບໂຕ້ການໃສ່ຮ້າຍປ້າຍສີ ຂອງກຸ່ມຄົນບໍ່ຫວັງດີ ທີ່ຫວັງສ້າງຄວາມປັ່ນປ່ວນ ແລະ ອື່ນໆ.

ຂ່າວ: ທະນູທອງ

ພາບ: ເກດສະໜາ

KPL