*ນັກທຸລະກິດລາວຜູ້ຂຶ້ນຊື່ຊຸບຊີວິດໄມ້ເສດເຫລືອ ແລະ ໄມ້ຕາຍແລ້ວໃນກາງປ່າດົງ, ທົ່ງໄຮ່ນາຮ້ົວສວນຈາກທໍາມະຊາດໃຫ້ຟື້ນຊີບຄືນໃໝ່ຈົນກາຍເປັນຂຸມຊັບອັນລໍ້າຄ່າ ຢືນຢູ່ແຖວໜ້າຂອງປະເທດສະມາຊິກອາຊຽນກໍວ່າໄດ້ນັ້ນຄື: ຫໍພິພິທະພັນສິລະປະລາວ, ນັກທຸລະກິດລາວ ທ່ານນີ້ບໍ່ແມ່ນຄົນອື່ນຄົນໄກ, ຫລາຍ ທ່ານອາດຮູ້ແລ້ວ ແລະ ບາງທ່ານອາດຍັງບໍ່ຮູ້, ທ່ານ ພິຊິດ ໄຊຍະທິດ, ຜູ້ກໍ່ຕັ້ງ ແລະ ປະທານຫໍພິພິທະພັນສິລະປະລາວບອກວ່າຕົນເອງຈົກເງິນລົງທຶນກວ່າ 50 ລ້ານໂດລາ ສ້າງຫໍພິພິທະພັນສິລະປະລາວແຫ່ງໃໝ່ທີ່ໃຫຍ່ທີ່ສຸດໃນໂລກ ຫວັງໃຫ້ກາຍເປັນສະຖານທີ່ທ່ອງທ່ຽວທາງວັດທະນະທຳແຫ່ງໃໝ່ຂອງປະເທດດຶງດູດນັກທ່ອງທ່ຽວ, ສ້າງລາຍໄດ້ໃຫ້ກັບທຸລະກິດໃນພື້ນທີ່ ແລະ ສ້າງວຽກເຮັດງານທໍາ. ຫລ້າສຸດ, ພິທີເປີດນຳໃຊ້ຫໍພິພິທະພັນສິລະປະລາວ ມີຂຶ້ນໃນວັນທີ 6 ມັງກອນ 2025, ໃຫ້ກຽດເຂົ້າຮ່ວມໂດຍທ່ານ ສອນໄຊ ສິພັນດອນ ນາຍົກລັດຖະມົນຕີແຫ່ງ ສປປ ລາວ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ສວນສະຫວັນ ວິຍະເກດ ລັດຖະມົນຕີກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ພິຊິດ ໄຊຍະທິດ ຜູ້ກໍ່ຕັ້ງ ແລະ ປະທານຫໍພິພິທະພັນສິລະປະລາວ, ບັນດາການນຳພັກ-ລັດ ແລະ ແຂກຖືກເຊີນເຂົ້າຮ່ວມ.

    ພິພິທະພັນສິລະປະລາວດັ່ງກ່າວ ຕັ້ງຢູ່ໃນເນື້ອທີ່ກວ່າ 80 ເຮັກຕາ ບ້ານໂນນສະອາດ, ເມືອງໄຊທານີ ນະຄອນຫລວງວຽງຈັນ ເຊິ່ງປະກອບມີອາຄານນໍາສະເໜີຂໍ້ມູນກ່ຽວກັບຫໍພິພິທະພັນ, ອາຄານຕ້ອນຮັບ, ອາຄານວາງສະແດງງານສິລະປະ-ວັດທະນະທໍາຕາມເທດສະການຕ່າງໆ, ຫ້ອງໂຖງພັກຜ່ອນຊົມທິວທັດ, ອາຄານອະເນກປະສົງ, ອາຄານສະແດງງານສິລະປະໄມ້ແກະສະຫລັກ ແລະ ຮູບແຕ້ມ, ຮ້ານຂາຍເຄື່ອງທີ່ລະນຶກ, ໂຮງແຮມ, ລີສອດ, ອາຄານວາງສະແດງສິນຄ້າ, ຮ້ານອາຫານ, ເຄື່ອງດື່ມ, ນໍ້າຕົກຈໍາລອງ ແລະ ອື່ນໆ.

    ໂອກາດດັ່ງກ່າວ, ທ່ານ ສອນໄຊ ສີພັນດອນ ນາຍົກລັດຖະມົນຕີກ່າວວ່າ: ການເປີດພິພິທະພັນສິລະປະລາວຄັ້ງນີ້ ບໍ່ເປັນພຽງການເປີດສະຖານທີ່ທ່ອງທ່ຽວແຫ່ງໃໝ່ເທົ່ານັ້ນ ແຕ່ຍັງເປັນການສົ່ງເສີມບົດບາດຄວາມສຳຄັນຂອງປະເທດທາງ ດ້ານເສດຖະກິດ-ສັງຄົມ ແລະ ເປີດປະຕູສູ່ອະນາຄົດທ່ີສົດໃສຂອງສິລະປະວັດທະນະທຳລາວ, ພິພິທະພັນແຫ່ງນີ້ ຈະເປັນສູນກາງເສດຖະກິດໃນຮູບແບບການທ່ອງທ່ຽວທາງວັດທະນະທຳ ເຊິ່ງຈະຊ່ວຍສ້າງວຽກເຮັດງານທຳສ້າງລາຍໄດ້ໃຫ້ກັບປະຊາຊົນໃນທ້ອງຖິ່ນ ແລະ ກະຕຸ້ນໃຫ້ມີການລົງທຶນໃໝ່ໃນພາກບໍລິການ ແລະ ການທ່ອງທ່ຽວ, ທ່ານນາຍົກກ່າວຕື່ມວ່າ: “ພິພິທະພັນແຫ່ງນີ້ເປັນສັນຍະລັກແຫ່ງຄວາມຫວັງຄວາມມີສີໄມ້ລາຍມື ແລະ ຄວາມຮູ້ຄວາມສາມາດຂອງຄົນລາວ ເຊິ່ງເປັນສິ່ງຢັ້ງຢືນວ່າສິລະປະລາວສາມາດປະກົດຕົວ ແລະ ຄົງຕົວໃນເວທີໂລກໄດ້ຢ່າງພາກພູມໃຈ”. ທ່ານ ພິຊິດ ໄຊຍະທິດ ກ່າວວ່າ ໄມ້ທ່ອນ ຫລື ເຫງົ້າໄມ້ທີ່ນໍາມາໃຊ້ໃນການແກະສະຫລັກທ່ີນຳມາສະແດງນັ້ນແມ່ນເຮັດຂຶ້ນ ພາຍໃຕ້ແຜນຍຸດທະສາດການພັດທະນາແບບຍືນຍົງ ແລະ ເຕີບໂຕສີຂຽວຂອງພັກ ແລະ ລັດຖະບານ.

    ປະທານຫໍພິພິທະພັນສິລະປະລາວກ່າວວ່າ: “ຂ້າພະເຈົ້າຂໍຢັ້ງຢືນ ວ່າໄມ້ທ່ອນ ຫລື ເຫງົ້າໄມ້ທີ່ນໍາມາໃຊ້ໃນການແກະສະຫລັກຂອງພວກເຮົານັ້ນ ລ້ວນແລ້ວແຕ່ແມ່ນໄມ້ນອນຂອນຕາຍ, ເປັນເສດໄມ້ຈາກພື້ນທີ່ນໍ້າຖ້ວມທີ່ຕົກຄ້າງໃນໂຄງການສ້າງເຂື່ອນໄຟຟ້າຕ່າງໆ ຫລື ເຫງົ້າໄມ້ທີ່ເກັບມາຈາກທ່ົງໄຮ່ທົ່ງນາຂອງປະຊາຊົນ ໂດຍໄມ້ເຫລົ່ານີ້ຄັ້ງໜຶ່ງຖືວ່າເປັນໄມ້ເສດເຫລືອ ຫລື ໄມ້ທີ່ບໍ່ມີຄຸນຄ່າສູງພໍປານໃດ. ແຕ່ເມື່ອຖືກນໍາມາປະດິດສ້າງຫັນປ່ຽນໃຫ້ກາຍເປັນຜົນງານ ສິລະປະກຳທີ່ງົດງາມແລ້ວມັນໄດ້ກາຍເປັນຊັບສິນອັນລໍ້າຄ່າ”. ທ່ານ ພິຊິດ ກ່າວຕື່ມອີກວ່າ: ຂ້າພະເຈົ້າເຊື່ອວ່າ: ຫໍພິພິທະພັນສິລະປະລາວແຫ່ງນີ້ຈະກາຍເປັນແຫລ່ງເສີມສ້າງວັດທະນະທຳທີ່ສໍາຄັນ ເຊິ່ງຈະຊ່ວຍອະນຸລັກ ແລະ ສົ່ງເສີມມໍລະດົກດ້ານສິລະປະຂອງລາວ ພ້ອມທັງເປີດໂອກາດໃຫ້ນັກສິລະປະກອນໃນທ້ອງຖິ່ນ ໄດ້ມີໂອກາດສະແດງຜົນງານຂອງເຂົາເຈົ້າ.

     ຫໍພິພິທະພັນນີ້ ຈະກາຍເປັນແມ່ເຫລັກດຶງດູດນັກທ່ອງທ່ຽວ, ສ້າງລາຍໄດ້ໃຫ້ກັບທຸລະກິດໃນພື້ນທີ່ ແລະ ສ້າງວຽກເຮັດງານທໍາໃຫ້ຫລາຍພາກສ່ວນ ເຊັ່ນ: ການບໍລິການ, ການຄ້າຂາຍຍ່ອຍ, ງານສິລະປະກຳ ແລະ ຜູ້ປະກອບການອື່ນໆ ສາມາດສ້າງວຽກເຮັດງານທຳ ແລະ ມີລາຍຮັບ, ສໍາລັບພິພິທະພັນເອງກໍ່ຈະສ້າງວຽກເຮັດງານທໍາແບບໂດຍກົງໄດ້ 300 ຫາ 400 ຄົນ, ຫໍພິພິທະພັນແຫ່ງນີ້ ຈະກາຍເປັນສູນກາງເຕົ້າໂຮມຄວາມສາມັກຄີ, ເປັນສະຖານທີ່ໜຶ່ງໃຫ້ຜູ້ຄົນຈາກທຸກແຫ່ງຫົນມາພົບປະສົນທະນາ, ແລກປ່ຽນ ບົດຮຽນປະສົບການ, ຄວາມຮູ້ທາງປະຫວັດສາດ ແລະ ວັດທະນະທຳ ພ້ອມທັງເປັນຈະເປັນແຫລ່ງຮຽນຮູ້ທີ່ສໍາຄັນ, ສາມາດຈັດກິດຈະກຳຫລາຍຮູບແບບເປັນຕົ້ນແມ່ນ: ການຝຶກອົບຮົມ, ສຳມະນາ, ເທສະການ ວາງສະແດງສິລະປະກຳໃຫ້ແກ່ໄວໜຸ່ມ-ເຍົາວະຊົນ, ເປັນແຮງບັນດານໃຈໃຫ້ແກ່ເຂົາເຈົ້າໃນການພັດທະນາຕົນເອງອີກດ້ວຍ, ສິລະປະກຳໂດຍສະເພາະການແກະສະຫລັກໄມ້ແມ່ນຮາກຖານສໍາຄັນໜຶ່ງຂອງວັດທະນະທໍາລາວເຮົາ. ມັນໄດ້ສະທ້ອນໃຫ້ເຫັນເຖິງຄວາມງົດງາມ, ຝີມືອັນປະນີດລະອຽດອ່ອນ, ຄວາມສະຫລັບສັບຊ້ອນທາງວິຈິດສິນທີ່ແຝງໄປດ້ວຍຄວາມໝາຍອັນເລິກເຊິ່ງ, ໄດ້ບັນຍາຍເຖິງວິຖີຊີວິດ, ຄວາມສັດທາ, ຄວາມຝັນ, ຄວາມມຸ່ງມາດປາຖະໜາຂອງຊາວລາວ ແລະ ຄວາມງົດງາມດັ່ງກ່າວນັ້ນໄດ້ຖືກຖ່າຍທອດໃຫ້ເປັນຜົນງານທີ່ສາມາດສຳຜັດ ແລະ ຈັບຕ້ອງໄດ້ ນະທີ່ຫໍພິພິທະພັນແຫ່ງນີ້,“ພາສາພາບ” ທີ່ຖ່າຍທອດຄວາມຝັນ, ຄວາມມຸ່ງຫວັງ ແລະ ການປະດິດສ້າງໃໝ່ຂອງຍຸກສະໄໝຍັງສະທ້ອນໃຫ້ເຫັນຄວາມຊຳນິຊຳນານ ແລະ ຄວາມພະຍາຍາມປະດິດສ້າງສິ່ງທີ່ມີຄຸນຄ່າໃຫ້ແກ່ສັງຄົມ ແລະ ສືບຕໍ່ເປັນມໍລະດົກຕົກທອດໃຫ້ແກ່ລູກຫລານຮຸ່ນຫລັງອີກດ້ວຍ.

    ຫໍພິພິທະພັນແຫ່ງສິລະປະອັນລືຊື່ແຫ່ງນີ້, ໂດຍພິຊິດເປັນຜູ້ຊຸບຊີ ວິດຂອງຮາກໄມ້ ຕໍໄມ້ທີ່ຜູ້ຄົນສ່ວນໃຫຍ່ບໍ່ເຫັນຄ່າໃຫ້ກາຍມາເປັນງານສິລະປະແກະສະຫລັກຈົນບໍ່ສາມາດປະເມີນມູນຄ່າໄດ້ ແລະ ປັດຈຸບັນມີວັດຖຸພັນຕ່າງໆ 30.000 ກ່ວາສິ້ນສ່ວນທີ່ວາງສະແດງຢູ່ໃນພິພິທະພັນດັ່ງກ່າວ ກາຍເປັນແລນມາກແຫ່ງໃໝ່ຂອງເມືອງລາວ.

ໂດຍ: ເກີດຂວັນໃຈ ມາລີຈັນສີ

KPL