ຂປລ. ໂດຍມີ ທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີພະອາຈານໃຫຍ່ມະຫາເວດ ມະເສໄນ ປະທານສູນກາງອົງການພຸດທະສາສະໜາສໍາພັນ ແຫ່ງ ສປປ ລາວ, ພະອາຈານໃຫຍ່ ອິນຊູນ (Yin Shun) ປະທານສະມາຄົມພຸດທະສາສະໜາ ແຫ່ງ ນະຄອນເສີນເຈີ້ນ, ເຈົ້າອະທິການວັດຫົງຟ້າ ສປ ຈີນ, ມີບັນດາຜູ້ແທນພະເຖຣານຸເຖຣະ ຈາກ 29 ປະເທດ ແລະ ເຂດແຄວ້ນເຂົ້າຮ່ວມ. ການຈັດກອງປະຊຸມຄັ້ງນີ້ ເພ່ືອສືບຕໍ່ຈັດຕັ້ງປະຕິບັດຖະແຫລງການກອງປະຊຸມໂຕະມົນພຸດທະສາສະໜາໜານໄຫ່ ຄັ້ງທີ X ໃຫ້ມີຜົນເປັນຮູບປະທໍາ; ເພື່ອແລກປ່ຽນບົດຮຽນການຈັດຕັ້ງປະຕິບັດຫລັກທໍາຄໍາສອນຂອງພຸດທະສາສະໜາ, ສົ່ງເສີມຄວາມສາມັກຄີ, ຮັກສາ ແລະ ເສີມຂະຫຍາຍຄວາມຫລາກຫລາຍທາງວັດທະນະທໍາ, ພ້ອມທັງສົ່ງເສີມສັນຕິພາບ ແລະ ການພັດທະນາຮ່ວມກັນຢ່າງຍືນຍົງ, ທັງເປັນເວທີສາກົນໜຶ່ງທີ່ສຳຄັນທາງພຸດທະສາສະໜາ ແລະ ສ້າງຄວາມເຂົ້າອົກເຂົ້າໃຈລະຫວ່າງພຸດທະສາສະໜາດ້ວຍກັນ ແລະ ພະສົງເພື່ອຄົ້ນຄວ້າພະທຳຄຳສອນ ແລະ ຕິດພັນກັບການສ້າງຄວາມເຂົ້າໃຈໃຫ້ພຸດທະສາສະນິກະຊົນໃຫ້ຮູ້ຈັກ ແລະ ປະຕິບັດຕາມພະທຳຄຳສອນຂອງພະພຸດທະສາສະໜາ, ທັງເປັນການສືບທອດມໍລະດົກທາງດ້ານ ສາສະໜາ ແລະ ວັດທະນະທຳໃຫ້ເລິກເຊິ່ງ ເປັນຮູບປະທຳເປັນຕົ້ນເວທີສົນທະນາດ້ານການສຶກສາ, ການແລກປ່ຽນຂອງພະໜຸ່ມ ແລະ ໂຄງການການກຸສົນຕ່າງໆ. ສິ່ງເຫລົ່ານີ້, ໄດ້ເປັນສ່ວນໜຶ່ງທີ່ສຳຄັນຕາມຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ແລະ ເຊື່ອມໂຍງ-ເຊື່ອມ ຈອດລະຫວ່າງ ສປປ ລາວ-ສປ ຈີນ ເພື່ອສົ່ງເສີມເສັ້ນທາງແຫ່ງສັນຕິພາບ ມິດຕະພາບ, ສ້າງຄວາມຈະເລີນຮຸ່ງເຮືອງ, ປົກປັກຮັກສາວັດທະນະທຳ, ອາລິຍະທຳ ແລະ ຮີດຄອງປະເພນີອັນດີງາມໃຫ້ແກ່ຄົນຮຸ່ນຫລັງສືບຕໍ່ຕະຫລອດໄປ.

     ໂອກາດນ້ີ, ທ່ານ ກິແກ້ວ ໄຂຄໍາພິທູນ ໄດ້ຂຶ້ນກ່າວເປີດກອງປະຊຸມໂດຍມີບາງຕອນວ່າ: ກອງປະຊຸມຄັ້ງນີ້ ຈັດຂຶ້ນພາຍໃຕ້ຫົວຂໍ້: “ຕ້ົນກຳເນີດອັນດຽວກັນ, ຮ່ວມປະນິທານດຽວກັນ, ສູ່ຄວາມຮຸ່ງເຮືອງສີວິໄລຮອບດ້ານ”  ເພ່ືອສ່ົງເສີມການປືກສາຫາລື ແລະ ແລກ ປ່ຽນວັດທະນະທຳລະຫວ່າງກັນໂດຍການເປັນເຈ້ົາພາບຮ່ວມຂອງສູນກາງອົງການພຸດທະສາສະໜາສຳພັນ ແຫ່ງ ສປປ ລາວ, ສູນກາງແນວລາວສ້າງຊາດ ແລະ ພາກສ່ວນທ່ີກ່ຽວຂ້ອງຂອງ ສປປ ລາວຮ່ວມກັບສະມາຄົມພຸດທະສາສະ ໜານະຄອນເສີນເຈີ້ນ ແລະ ວັດ ຫົງຟ້າ ສປ ຈີນ. ກອງປະຊຸມຈັດຂຶ້ນໃນທ່າມກາງບັນຍາກາດສະເຫລີມສະຫລອງວັນສ້າງຕ້ັງສາຍພົວພັນການທູດ ລາວ-ຈີນ, ຈີນ- ລາວ ຄົບຮອບ 65 ປີ ແລະ ເປັນປີທ່ີສອງປະເທດຍົກລະດັບສາຍພົວພັນເປັນຄູ່ຮ່ວມຊາຕາກໍາ ລາວ-ຈີນ ທ່ີເຂ້ັມແຂງໜຽວແໜ້ນໃນທຸກສະພາບການຂອງຍຸກໃໝ່ລະຫວ່າງສອງພັກ, ທັງເປັນປີແຫ່ງມິດຕະພາບ ລາວ-ຈີນ, ປີທ່ອງທ່ຽວລາວ-ຈີນ. ກອງປະຊຸມດັ່ງກ່າວ, ຈັດຂຶ້ນມາແຕ່ປີ 2016 ເປັນຕົ້ນມາ ຊຶ່ງໄດ້ຈັດຂຶ້ນທີ່ນະຄອນເສີນເຈີ້ນ ສປ ຈີນ, ນະຄອນພະນົມເປັນປະເທດກຳປູເຈຍ, ນະຄອນໂຄລອມໂບ ປະເທດສີລັງກາ, ນະຄອນບາງກອກ ປະເທດໄທ, ນະຄອນກາດມັນດຸ ປະເທດເນປານ. ສໍາລັບກອງປະຊຸມຄັ້ງນີ້, ທີ່ໄດ້ຈັດຂຶ້ນຢູ່ ສປປ ລາວ ເພື່ອສົ່ງເສີມຄວາມສາມັກຄີປອງດອງລະຫວ່າງ 3 ນິກາຍຫລັກຂອງພຸດທະສາສະໜາ ເພື່ອສ້າງເວທີສາກົນສຳລັບການແລກປ່ຽນທີ່ກວ້າງຂວາງ, ກວມລວມ ແລະ ຮ່ວມມືເຊ່ິງກັນ ແລະ ກັນ ເພ່ືອສ້າງປະຊາຄົມສາກົນດ້ານພຸດທະສາສະໜາ, ສ້າງອະນາຄົດຮ່ວມກັນຂອງມວນມະນຸດ; ທັງເປັນການສືບທອດມໍລະດົກທາງດ້ານສາສະໜາ ແລະ ວັດທະນະທຳໃຫ້ເລິກເຊິ່ງເປັນຮູບປະທຳເປັນຕົ້ນເວທີສົນທະນາດ້ານການສຶກສາ, ການແລກປ່ຽນຂອງພະໜຸ່ມ ແລະ ໂຄງການການກຸສົນຕ່າງໆທີ່ຕິດພັນ. 

     ພະອາຈານໃຫຍ່ ມະຫາເວດ ມະເສໄນ ໄດ້ຕີລາຄາສູງ ແລະ ສະແດງຄວາມປິຕິຍິນດີທີ່ໄດ້ເປັນເຈົ້າພາບຮ່ວມຈັດກອງປະຊຸມໂຕະມົນພຸດທະສາສະໜາໜານໄຫ່ ຄ້ັງທີ 11 ຢູ່ນະຄອນຫລວງວຽງຈັນ ຊ່ຶງເປັນນິມິດໝາຍອັນສໍາຄັນຄັ້ງປະຫວັດສາດ ເປັນການຮ່ວມມືທາງດ້ານພະພຸດທະສາສະໜາ ແລະ ວັດທະນະທຳຂອງອົງການພຸດທະສາສະໜາ ແຫ່ງ ສປປ ລາວ ແລະ ສະມາຄົມພຸດທະສາສະໜາ ແຫ່ງ ສປ ຈີນ ກໍຄື ສະມາຄົມພຸດທະສາສະໜານະຄອນເສີນເຈີ້ນ ແລະ ວັດຫົງຟ້າ ສປ ຈີນ. ພະອາຈານໃຫຍ່ຍັງໄດ້ຍົກໃຫ້ເຫັນການພົວພັນຮ່ວມມື, ການແລກປ່ຽນບົດຮຽນ, ແລກປ່ຽນການສຶກສາສົງ, ແລກປ່ຽນທັດສະນະສຶກສາ ແລະ ການມືກັນຮອບດ້ານລະຫວ່າງອົງການພຸດທະສາສະໜາສຳພັນ ແຫ່ງ ສປປ ລາວ ແລະ ສະມາຄົມພຸດທະສາສະໜານະຄອນເສີນເຈີ້ນ ແລະ ວັດຫົງຟ້າ ສປ ຈີນ ຕື່ມອີກ.

    ໃນໂອກາດນ້ີ, ກອງປະຊຸມຍັງໄດ້ຮັບຟັງການອ່ານສານອວຍພອນກອງປະຊຸມດັ່ງກ່າວ ຈາກທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຕື່ມອີກ.

ຂ່າວ: ທະນູທອງ; ພາບ: ເກດສະໜາ

KPL