ຂປລ
ຂປລ. ສະມາຄົມນັກຂ່າວແຫ່ງ ສປປ ລາວ ຈັດຝຶກອົບຮົມສ້າງຄວາມເຂັ້ມແຂງ ໃຫ້ແກ່ສື່ມວນຊົນ ໃນການເປັນຄູຝຶກນັກຂ່າວ ພາຍໃຕ້ຫົວຂໍ້ “ການລາຍງານຂ່າວບັນຫາສີຂຽວ” ໃນວັນທີ 14 ຕຸລາ ຜ່ານມາ ໂດຍການເຂົ້າຮ່ວມຂອງ ທ່ານ ສະຫວັນຄອນ ລາຊມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ອະດີດຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ພາກສ່ວນກ່ຽວຂ້ອງ ເຂົ້າຮ່ວມ
ຂປລ. ສະມາຄົມນັກຂ່າວແຫ່ງ ສປປ ລາວ ຈັດຝຶກອົບຮົມສ້າງຄວາມເຂັ້ມແຂງ ໃຫ້ແກ່ສື່ມວນຊົນ ໃນການເປັນຄູຝຶກນັກຂ່າວ ພາຍໃຕ້ຫົວຂໍ້ “ການລາຍງານຂ່າວບັນຫາສີຂຽວ” ໃນວັນທີ 14 ຕຸລາ ຜ່ານມາ ໂດຍການເຂົ້າຮ່ວມຂອງ ທ່ານ ສະຫວັນຄອນ ລາຊມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ອະດີດຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ພາກສ່ວນກ່ຽວຂ້ອງ ເຂົ້າຮ່ວມ
ຊຸດອົບຮົມໃນຄັ້ງນີ້, ແມ່ນໜຶ່ງໃນກິດຈະກຳຫລັກຂອງໂຄງການ ສ້າງຄວາມເຂັ້ມແຂງໃຫ້ແກ່ສື່ມວນຊົນ, ຈຸດປະສົງຂອງຊຸດອົບຮົມຄູຝຶກໃນຄັ້ງນີ້ ເພື່ອບັນລຸຕາມແຜນຍຸດທະສາດ ຂອງສະມາຄົມນັກຂ່າວແຫ່ງ ສປປ ລາວ ແລະ ແຜນການດຳເນີນ ກິດຈະກຳຂອງໂຄງການແກມຊິວ ໃນການສ້າງຄວາມອາດສາມາດ ໃຫ້ແກ່ຜູ້ທີ່ເຮັດວຽກ ຂະແໜງຖະແຫລງຂ່າວ-ສື່ມວນຊົນ ໃນທົ່ວປະເທດ ໃຫ້ກາຍເປັນຄູຝຶກນັກຂ່າວໃນອະນາຄົດ. ພ້ອມນັ້ນ, ຍັງຈະໄດ້ສືບຕໍ່ເຂົ້າຮ່ວມການເຄື່ອນໄຫວກິດຈະກຳ ການຝຶກອົບຮົມຕ່າງໆ ທີ່ຈະໄດ້ຈັດຂຶ້ນໂດຍສະມາ ຄົມນັກຂ່າວແຫ່ງ ສປປ ລາວ ຕະຫຼອດໄລຍະຂອງໂຄງການ. ການຝຶກອົບຮົມຈະດໍາເນີນໄປເປັນເວລາ 5 ວັນຈຶ່ງຈະສຳເລັດ, ສິດສອນໂດຍຊ່ຽວຊານຂອງໂຄງການ ຊຶ່ງຈະເນັ້ນໜັກທັງພາກທິດສະດີ, ພາກປະຕິບັດ ແລະ ດ້ານເຕັກນິກຕ່າງໆ ທີ່ກ່ຽວຂ້ອງກັບວຽກງານສື່.
ໂຄງການແກມຊິວ ໄດ້ຖືກອະນຸມັດ ແລະ ເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງ ຖວທ ຕາງໜ້າໂດຍ ກົມສື່ມວນຊົນ ແລະ ອົງການແຄຣ ນານາຊາດ ປະຈຳ ສປປ ລາວ ໂດຍໄດ້ມອບໝາຍໃຫ້ ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ ນານາຊາດ ປະຈຳ ສປປ ລາວ ເປັນຜູ້ດຳເນີນການປະຕິບັດ ກິດຈະກຳຂອງໂຄງການ ຊຶ່ງມີ 2 ເປົ້າໝາຍຫລັກຄື: ສື່ມວນຊົນຂອງລັດ ແລະ ສື່ພາກສັງຄົມທີ່ໄດ້ລົງທະບຽນ ຖືກຕ້ອງຕາມກົດໝາຍ ສປປ ລາວ ຈະໄດ້ຮັບການຍົກລະດັບ ທັກສະດ້ານວິຊາຊີບ ລວມທັງການນຳໃຊ້ເຕັກໂນໂລຊີ ແບບດີຈິຕອນ ແລະ ສື່ແບບໃໝ່ ເພື່ອເຮັດໃຫ້ປະຊາຊົນ ໄດ້ຮັບຂໍ້ມູນຂ່າວສານ ທີ່ມີຄຸນນະພາບ ໂດຍຜ່ານການລາຍງານ ທີ່ມີຄວາມຮັບຜິດຊອບ ແລະ ເປັນມືອາຊີບກ່ຽວກັບການພັດທະນາສີຂຽວ; ບັນດາຜູ້ເຂົ້າຮ່ວມ ຈາກອົງການຈັດຕັ້ງທາງສັງຄົມ ທີ່ເຮັດວຽກກ່ຽວກັບ ການພັດທະນາສີຂຽວ ຊຶ່ງລະບຸຢູ່ໃນກິດຈະກຳ, ຜູ້ນໍາໃຊ້ສື່ສັງຄົມອອນລາຍທົ່ວໄປ, ຜູ້ສ້າງວິດີໂອ ແລະ ຮູບເງົາໄດ້ຍົກລະດັບຄວາມຮູ້ ແລະ ຄວາມສາມາດຂອງຕົນ ໃນການປະກອບສ່ວນສ້າງນະໂຍບາຍ, ຕິດຕາມ ແລະ ຊຸກຍູ້ວຽກງານການພັດທະນາສີຂຽວ ທີ່ມີຜົນກະທົບຕໍ່ຊຸມຊົນ ລວມທັງການນຳໃຊ້ ເຕັກໂນໂລຊີດີຈິຕອນ ແລະ ສື່ແບບໃໝ່ຢ່າງສ້າງສັນ.
ຝຶກອົບຮົມຄັ້ງນີ້, ຈະດໍາເນີນໄປເປັນເວລາ 5 ວັນຈຶ່ງຈະສຳເລັດ, ສິດສອນໂດຍຊ່ຽວຊານຂອງໂຄງການ ຊຶ່ງຈະເນັ້ນໜັກທັງພາກທິດສະດີ, ພາກປະຕິບັດ ແລະ ດ້ານເຕັກນິກຕ່າງໆ ທີ່ກ່ຽວຂ້ອງກັບວຽກງານສື່.
ຂ່າວ-ພາບ: ພູວັນ
KPL