ຂປລ
ຂປລ. ຄະນະໂຄສະນາອົບຮົມສູນກາງພັກ ປປ ລາວ ຈັດຕັ້ງພິທີປະດັບຫລຽນໄຊ, ຫລຽນກາ ແລະ ມອບໃບຍ້ອງຍໍ ໃຫ້ບັນດາສະຫາຍທີ່ມີຜົນງານ, ຄຸນງາມຄວາມດີ ໃນການເສີມສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ
ຂປລ. ຄະນະໂຄສະນາອົບຮົມສູນກາງພັກ ປປ ລາວ ຈັດຕັ້ງພິທີປະດັບຫລຽນໄຊ, ຫລຽນກາ ແລະ ມອບໃບຍ້ອງຍໍ ໃຫ້ບັນດາສະຫາຍທີ່ມີຜົນງານ, ຄຸນງາມຄວາມດີ ໃນການເສີມສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍຄື ຄະນະໂຄສະນາອົບຮົມສູນກາງພັກ ປະຊາຊົນ ປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໂອກາດສະເຫລີມສະຫລອງ ສອງວັນປະຫວັດສາດ ລາວ-ຫວຽດ ນາມ ຄື: ວັນເຊັນສົນທິສັນຍາມິດຕະພາບ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022) ກໍຄື ບັ້ນສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ປີ 2022.
ພິທີດັ່ງກ່າວຈັດຂຶ້ນໃນວັນທີ 25 ກັນຍາ 2024 ຢູ່ນະຄອນຫລວງວຽງຈັນ ໂດຍ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ ປະດັບຫລຽນໄຊອິດສະຫລະ ຊັ້ນ III ໃຫ້ ສະຫາຍ ລ້າຍ ຊວັນ ໂມນ ແລະ ທັງເປັນຜູ້ ຕາງໜ້າຮັບຫລຽນໄຊອິດສະຫລະ ຊັ້ນ III ໃຫ້ການນໍາ 3 ສະຫາຍ ຂອງຄະນະໂຄສະນາສຶກສາ ສູນກາງພັກກອມມູນິດຫວຽດນາມ ທີ່ບໍ່ໄດ້ມາຮ່ວມ. ພ້ອມນີ້, ສະຫາຍ ຫງວຽນ ເຄ່ວ ເລິມ ຫົວໜ້າກົມຂໍ້ມູນຂ່າວສານ ແລະ ຮ່ວມມືສາກົນ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ຕາງໜ້າຮັບໃບຍ້ອງຍໍ ຂອງກົມກອງ ແລະ ບຸກຄົນ ໃຫ້ຄະນະໂຄສະນາ ສຶກສາສູນກາງພັກກອມມູນິດຫວຽດ ນາມ.
ຈາກນັ້ນ, ສະຫາຍ ລ້າຍ ຊວັນ ໂມນ ກໍໄດ້ປະດັບຫລຽນໄຊເອກະລາດ ຊັ້ນ II ໃຫ້ ສະຫາຍ ລາວປາວຊົງ ນະວົງໄຊ ກໍາມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ. ພ້ອມນີ້, ຍັງໄດ້ປະດັບຫລຽນໄຊເອກະລາດ ຊັ້ນ III ຈໍານວນ 3 ສະຫາຍ, ສະຫາຍ ຄໍາວິສັນ ແກ້ວສຸວັນ ອະດີດຫົວໜ້າກົມ (ຜູ້ຊ່ວຍວຽກຄະນະ ຄອສພ) ພະນັກງານບໍານານໍ ໄດ້ຮັບການປະດັບຫລຽນໄຊເອກະລາດ ຊັ້ນ III, ປະດັບຫລຽນໄຊມິດຕະພາບ ຈໍານວນ 12 ສະຫາຍ, ແລະ ຫລຽນກາມິດຕະພາບ ຈໍານວນ 11 ສະຫາຍ.
KPL
