ຂປລ. ວິທະຍຸກະຈາຍສຽງແຫ່ງຊາດລາວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ອົງການອຸຍນີເຊັບ ຈັດກອງປະຊຸມປຶກສາຫາລື ແລະ ສະເຫລີມສະຫລອງ 20 ປີ ແຫ່ງການຮ່ວມມື ໃນການສ້າງຄວາມເຂັ້ມແຂງໃຫ້ຊາວໜຸ່ມລາວ ​ໃນ​ການຜະລິດສື່ ສໍາລັບ ວິທະຍຸ ແລະ ສື່ສັງຄົມອອນລາຍ ໃນວັນທີ 3 ມິຖຸນາ 2024 ເມືອງຊໍາເໜືອ ແຂວງຫົວພັນ ເພື່ອລະດົມຄວາມຄິດເຫັນ ກ່ຽວກັບສິ່ງທ້າທາຍ ແລະ ວິທີແກ້ໄຂບັນຫາຕ່າງໆ ທີ່ສົ່ງຜົນກະທົບຕໍ່ຊີວິດຂອງເດັກນ້ອຍ ແລະ ໄວໜຸ່ມໃນປັດຈຸບັນ ​ໂດຍການເປັນປະທານຂອງທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ​ມີຕົວແທນເດັກ ແລະ ໄວໜຸ່ມ ຈາກ 17 ແຂວງ ແລະ ນະຄອນຫລວງວຽງຈັນ ເຂົ້າຮ່ວມ.

ທ່ານ ໂພສີ ແກ້ວມະນີວົງ  ໄດ້ກ່າວວ່າ: ສື່ໄວໜຸ່ມລາວ ແມ່ນໂຄງການທີ່ມີປະສິດທິຜົນສູງ ໃນການກໍ່ສ້າງຄວາມສາມາດ ໃຫ້ເດັກ ແລະ ໄວໜຸ່ມລາວ ໃນການໂຄສະນາ ບັນຫາຕ່າງໆ ທີ່ມີຜົນກະທົບຕໍ່ເຂົາເຈົ້າ ​ໂດຍ​ສະ​ເພາະ ບັນຫາສຸຂະພາບ, ສັກຢາກັນພະຍາດ, ໂພຊະນາການ, ການສຶກສາ, ວຽກງານສຸຂະອະນາໄມ, ສະພາບແວດລ້ອມ, ວຽກງານປົກປ້ອງເດັກ ແລະ ຊ່ວຍປຸກລະດົມ ໃຫ້ໄວໜຸ່ມ ປະກອບສ່ວນ ເຂົ້າໃນການປັບປຸງຊຸມຊົນຂອງເຂົາເຈົ້າ. ພ້ອມ​ທັງສະແດງຄວາມຂອບໃຈ ອົງການອຸຍ​ນີເຊັບ ​ແລະ ຊົມເຊີຍ ຜົນງານຂອງໂຄງການສື່ໄວໜຸ່ມ ໃນໄລຍະ 20 ປີຜ່ານມາ ທີ່ສ້າງໂອກາດໃຫ້ໄວໜຸ່ມລາວ ໄດ້ຮັບການພັດທະນາ ໂຕເອງຫລາຍຢ່າງ ໃນວຽກງານດ້ານສື່ສານມວນຊົນ ແລະ ຫວັງວ່າອົງການດັ່ງກ່າວ ຈະສືບຕໍ່ສະໜັບສະໜູນ ເພື່ອໃຫ້ໂອກາດເດັກ ແລະ ໄວໜຸ່ມ ໃນການພັດທະນາຕົນເອງ ສືບຕໍ່ດຳເນີນຕໍ່ໄປ.

ທ່ານ ນາງ ໝັ້ນ ເພັງຄັດຕິຍະ ຫົວໜ້າ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຫົວພັນ ໄດ້ກ່າວວ່າ: ຂ້າພະເຈົ້າ ໄດ້ຕິດຕາມການເຄື່ອນໄຫວ ຂອງທິມງານ ສື່ໄວໜຸ່ມ ແລະ ໄດ້ເຫັນການໂຄສະນາ ຜ່ານວິທະຍຸໄວໜຸ່ມ ແລະ ເຟສ ຂອງສື່ໄວໜຸ່ມ ໃນ 18 ແຂວງ, ​ເຊິ່ງເຫັນວ່າ ສື່ໄວໜຸ່ມ ໄດ້ປະກອບສ່ວນຢ່າງຫ້າວຫັນ ໃນການໂຄສະນາ ເພື່ອປັບປຸງ ຊີວິດການເປັນຢູ່ ຂອງແມ່ຍິງ ແລະ ເດັກ ໃນແຂວງຂອງຕົນ, ​ເຊິ່ງກອງປະຊຸມຄັ້ງ​ນີ້ ຈະ​ເຮັດ​ໃຫ້​ໄວ​ໜຸ່ມ ​ເປັນ​ກະບອກ​ສຽງ ​ເພື່ອຊ່ວຍໂຄສະນາ ວຽກງານການທ່ອງທ່ຽວແຂວງຫົວພັນ ເພື່ອໃຫ້ປະຊາຊົນທັງພາຍໃນ ແລະ ຕ່າງປະເທດ ໄດ້ຮູ້ຈັກຫລາຍຂຶ້ນ ແລະ ມາຢ້ຽມຢາມ​ແຂວງຫົວພັນຫລາຍຂຶ້ນ.

ທ່ານ ໄຊມອນ ນາເຊີ ຫົວໜ້າພະແນກ ໂຄສະນາ ແລະ ສື່ສານມວນຊົນ ຂອງອົງການອຸຍນີເຊັບ ປະຈໍາ ສປປ ລາວ ໄດ້ກ່າວວ່າ: ຈຸດຖຸປະສົງ ຂອງກອງປະຊຸມໃນຄັ້ງນີ້ ເພື່ອປຶກສາຫາລື ກ່ຽວກັບສິ່ງທ້າທາຍ ຫລື ບັນຫາທີ່ເດັກ ແລະ ໄວໜຸ່ມ ໃນ ສປປ ລາວ ກຳລັງຜະເຊີນຢູ່ ລວມທັງສິ່ງທີ່ກຳລັງເປັນບັນຫາໃນຄອບຄົວ ແລະ ສັງຄົມ, ​ເຊິ່ງເນື້ອໃນທັງໝົດໃນການປຶກສາຫາລືດັ່ງກ່າວ ຈະໄດ້ນຳໄປປະກອບເຂົ້າໃນແຜນງານ ການຮ່ວມມື ລະຫ່ວາງລັດຖະບານລາວ , ອົງການອຸຍນີເຊັບ ແລະ ຄູ່ຮ່ວມງານ. ໃນປັດຈຸບັນ ຕົວແທນໄວໜຸ່ມ ແມ່ນເຮັດໜ້າທີ່ທີ່ສຳຄັນ ໃນການກະຈາຍຂໍ້ມູນຂ່າວສານ ເພື່ອໂຄສະນາວຽກງານຕ່າງໆ ໂດຍສະເພາະ ວຽກງານສາທາລະນະສຸກ ແລະ ການເປັນຢູ່ທີ່ດີຂອງໄວໜຸ່ມພ້ອມກັບຊຸມຊົນ.

KPL