ຂປລ
ໃນວັນທີ 12 ຕຸລາ 2026 ຜ່ານມາ, ຢູ່ກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ຈັງ ອິກບົ່ງ (Jang Ik-bong) ຮອງປະທານສະພາເມືອງຊອງຈູ (Seongju County Council Vice Chairman) ແລະ ຂະແໜງການທີ່ກ່ຽວຂ້ອງຈາກເມືອງຊອງຈູ ສ ເກົາຫຼີ ເພື່ອປຶກສາຫາລື ແລະ ທົບທວນຄືນການຈັດຕັ້ງປະຕິບັດງານໃນການຈັດສົ່ງແຮງງານລະດູການ, ພ້ອມທັງສະເໜີທິດທາງການສືບຕໍ່ຮ່ວມມື ລະຫວ່າງ ກົມການຈັດຫາງານ, ກະຊວງ ຮສສ ແລະ ເມືອງຊອງຈູ ໃຫ້ມີຄວາມຮັດກຸມ ແລະ ມີປະສິດທິພາບຍິ່ງຂຶ້ນ.
ໂອກາດດັ່ງກ່າວ, ທ່ານຮອງລັດຖະມົນຕີກະຊວງ ຮສສ ຍັງໄດ້ສະເໜີຕໍ່ຝ່າຍເມືອງຊອງຈູ ເພື່ອພິຈາລະນາ 2 ບັນຫາສຳຄັນ ຄື: ດ້ານສະຫວັດດີການ ແລະ ຄວາມປອດໄພ: ໃນລະດູຮ້ອນຂອງ ສ ເກົາຫຼີ ຂໍໃຫ້ເມືອງຊອງຈູ ຊ່ວຍຕິດຕາມການເຮັດວຽກຂອງແຮງງານຢ່າງໃກ້ຊິດ, ຫຼີກເວັ້ນການໃຫ້ແຮງງານເຮັດວຽກກາງແຈ້ງດົນເກີນໄປ ເພື່ອປ້ອງກັນຄວາມສ່ຽງຈາກພາວະຮີດສະໂຕກ (Heatstroke) ພ້ອມທັງສະເໜີໃຫ້ສະໜອງນ້ຳດື່ມ, ພັດລົມນ້ອຍ ຫຼື ເສື້ອທີ່ມີພັດລົມລະບາຍອາກາດໃຫ້ແກ່ແຮງງານ. ດ້ານການຄັດເລືອກ ແລະ ເງື່ອນໄຂແຮງງານ: ເນື່ອງຈາກເມືອງຊອງຈູ ມີຄວາມຕ້ອງການແຮງງານຊາຍເປັນສ່ວນໃຫຍ່ ເຮັດໃຫ້ການສະໜອງແຮງງານມີຂໍ້ຈຳກັດ, ຈຶ່ງສະເໜີໃຫ້ພິຈາລະນາເພີ່ມເກນອາຍຸແຮງງານຊາຍເປັນ 45 ປີ, ເພດຍິງເປັນ 40 ປີ, ພ້ອມທັງເພີ່ມໂກຕ້າແບບຄູ່ຜົວ-ເມຍ ເນື່ອງຈາກແຮງງານຊາຍສ່ວນໃຫຍ່ມີຄວາມຕ້ອງການໄປເຮັດວຽກເປັນຄູ່ຫຼາຍກວ່າ.
ເມືອງຊອງຈູ ໄດ້ລິເລີ່ມລົງນາມບົດບັນທຶກຄວາມເຂົ້າໃຈ (MOU) ກ່ຽວກັບການຮ່ວມມືດ້ານການຈັດສົ່ງແຮງງານລະດູການຮ່ວມກັບກົມການຈັດຫາງານ ໃນວັນທີ 20 ພະຈິກ 2023 ແລະ ໄດ້ເລີ່ມຈັດສົ່ງແຮງງານລາວ ໄປເຮັດວຽກຕາມລະດູການຢູ່ເມືອງຊອງຈູ ນັບແຕ່ປີ 2024 ເປັນຕົ້ນມາ. ຜ່ານການຈັດຕັ້ງປະຕິບັດຕົວຈິງ ຕົວເລກການຈັດສົ່ງແຮງງານ ປີ 2024 ສາມາດຈັດສົ່ງແຮງງານທັງໝົດ 153 ຄົນ (ບໍ່ມີແຮງງານໂຕນ/ຜິດລະບຽບ), ປີ 2025 ຈັດສົ່ງແຮງງານທັງໝົດ 1.292 ຄົນ (ໂຕນໜີ 1 ຄົນ) ແລະ ປີ 2026 ຈັດສົ່ງແຮງງານທັງໝົດ 1.333 ຄົນ (ໂຕນໜີ 6 ຄົນ). ແຮງງານທີ່ຖືກຄັດເລືອກ ແລະ ຈັດສົ່ງສ່ວນຫຼາຍແມ່ນຜູ້ທີ່ມີປະສົບການໃນຂະແໜງການກະສິກຳ-ປູກຝັງ ໂດຍໄດ້ເນັ້ນໃສ່ການຄັດເລືອກ ແລະ ສຳພາດແຮງງານບັນດາເມືອງໃນແຂວງ.
ຜ່ານການຈັດຕັ້ງປະຕິບັດຜ່ານມາ ເຫັນວ່າ: ເມືອງຊອງຈູ ເປັນເມືອງທີ່ມີຄວາມຕ້ອງການແຮງງານຈາກ ສປປ ລາວ ເພີ່ມຂຶ້ນຫຼາຍ ໂດຍສະເພາະແມ່ນແຮງງານເພດຊາຍ. ນອກຈາກນີ້, ນາຍຈ້າງສ່ວນໃຫຍ່ຢູ່ເມືອງຊອງຈູ ໄດ້ປະຕິບັດຕາມລະບຽບເງື່ອນໄຂການນຳໃຊ້ແຮງງານເປັນຢ່າງດີ, ມີການຕິດຕາມເບິ່ງແຍງແຮງງານຢ່າງໃກ້ຊິດ ເຮັດໃຫ້ຫຼຸດຜ່ອນບັນຫາຂໍ້ຂັດແຍ່ງລະຫວ່າງນາຍຈ້າງ ແລະ ຜູ້ອອກແຮງງານລາວ ໄດ້ຢ່າງມີປະສິດທິຜົນ, ພ້ອມທັງມີຄວາມຕ້ອງການນຳໃຊ້ແຮງງານເກົ່າທີ່ມີປະສົບການເປັນສ່ວນໃຫຍ່.
ຂໍ້ມູນ-ພາບ: ຂ່າວສານ ຮສສ
KPL
