ຂປລ
ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ເປິດບັ້ນຝຶກອົບຮົມການປະເມີນຜົນການປະຕິບັດວຽກງານຂອງພະນັກງານ-ລັດຖະ ກອນ ໃຫ້ແກ່ພະນັກງານຫ້ອງການ ແລະ ບັນດາກົມອ້ອມຂ້າງ ສຊປລ ໃນວັນທີ 14 ຕຸລາ 2026 ໂດຍການເປັນປະທານ ແລະ ກ່າວເປີດຂອງທ່ານ ທອງລີ ສີສຸລິດ ກຳມະການສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ.
ຂປລ. ໃນພິທີ, ທ່ານ ທອງລີ ສີສຸລິດ ໄດ້ຍົກໃຫ້ເຫັນວ່າ: ການປະເມີນຜົນການປະຕິບັດວຽກງານຂອງພະນັກງານລັດຖະກອນບ່ໍພຽງແຕ່ການຕື່ມແບບຟອມ ຫລື ການໃຫ້ຄະແນນປະຈຳປີເທົ່ານັ້ນ, ແຕ່ແມ່ນເຄື່ອງມືສຳຄັນໃນການຍົກສູງຄຸນນະພາບການເຮັດວຽກ, ສ້າງລະບຽບວິໄນ, ຄວາມຮັບຜິດຊອບ ແລະ ສ້າງຄວາມເປັນທຳໃນການຄຸ້ມຄອງພະນັກງານ, ພ້ອມທັງຕ້ອງຫັນຈາກການປະເມີນຕາມຄວາມຮູ້ສຶກໄປສູ່ການປະເມີນທີ່ມີຫລັກຖານ, ມາດຖານ ແລະ ສາມາດກວດສອບໄດ້.
ໂອກາດນ້ີ, ທ່ານ ທອງລີ ສີສຸລິດ ໄດ້ເນັ້ນ 4 ບັນຫາສຳຄັນ ຄື: ການປະເມີນຕ້ອງອີງໃສ່ໜ້າທ່ີ ທ່ີໄດ້ຮັບມອບໝາຍ, ຄຸນນະພາບຂອງວຽກ, ຄວາມທັນເວລາ ແລະ ຜົນສໍາເລັດທ່ີສາມາດພິສູດໄດ້, ຕ້ອງແຍກໃຫ້ອອກລະຫວ່າງຜູ້ທ່ີເຮັດວຽກດີ, ມີຄວາມຄິດລິເລ່ີມ ແລະ ກ້າຮັບຜິດຊອບກັບຜູ້ທີ່ເຮັດວຽກພຽງແຕ່ໃຫ້ຜ່ານໄປແຕ່ລະມື້; ຕ້ອງເອົາລະບຽບວິໄນ ແລະ ຄວາມຮັບຜິດຊອບ ເປັນເກນສໍາຄັນໃນການປະເມີນ. ພະນັກງານທີ່ດີນັ້ນ, ບໍ່ພຽງແຕ່ມີຄວາມຮູ້ ຫລື ຄວາມສາມາດ, ແຕ່ຕ້ອງມີລະບຽບວິໄນ, ມີຈິດໃຈຮັບໃຊ້, ຮູ້ຈັກປະສານງານ ແລະ ຮັບຜິດຊອບຕໍ່ວຽກທີ່ໄດ້ຮັບມອບໝາຍ, ພວກເຮົາຕ້ອງລິເລີ່ມປ່ຽນວັດທະນະທຳການເຮັດວຽກຈາກການລໍຖ້າຄໍາສັ່ງໄປສູ່ການເຮັດວຽກຢ່າງມີແຜນການ, ມີຄວາມກະຕືລືລົ້ນ ແລະ ມີຄວາມຮັບຜິດຊອບຕ່ໍຜົນສໍາເລັດ; ການປະເມີນບໍ່ແມ່ນວຽກ ຂອງພະແນກຈັດຕັ້ງ ຫລື ຜູ້ສັງຮວມຂໍ້ມູນເທົ່ານັ້ນ, ຫົວໜ້າກົມຕ້ອງເປັນຜູ້ຕິດຕາມ, ຊີ້ນຳ ແລະ ປະເມີນຜົນງານຂອງພະນັກງານພາຍໃນກົມຂອງຕົນຢ່າງເປັນປົກກະຕິ, ບໍ່ຄວນລໍຖ້າໃຫ້ຮອດທ້າຍປີ ແລ້ວຈຶ່ງມາປະເມີນໂດຍອາໄສຄວາມຊົງຈຳ ຫລື ຄວາມຮູ້ສຶກສ່ວນຕົວ ແລະ ຕ້ອງຊົມເຊີຍຜູ້ທີ່ເຮັດດີ, ກ້າຊີ້ໃຫ້ເຫັນຂ້ບົກຜ່ອງ ແລະ ກ້າຮັບຜິດຊອບຕ່ໍຜົນການປະເມີນຂອງຕົນ; ຜົນການປະເມີນຕ້ອງນໍາໄປສູ່ການປັບປຸງ ແລະ ພັດທະນາພະນັກງານຢ່າງແທ້ຈິງ, ຜົນການປະເມີນຕ້ອງເປັນຂໍ້ມູນສໍາຄັນໃນການພິຈາລະນາຍ້ອງຍໍ, ສົ່ງເສີມ, ຝຶກອົບຮົມ, ຈັດວາງ ແລະ ພັດທະນາພະນັກງານຕາມລະບຽບການ. ສໍາລັບຜູ້ທີ່ຍັງມີຂໍ້ຈຳກັດຕ້ອງມີການແນະນໍາ, ຊ່ວຍເຫລືອ ແລະ ກຳນົດແຜນບຳລຸງສ້າງທີ່ຈະແຈ້ງ.
ຈຸດປະສົງຂອງການປະເມີນບ່ໍແມ່ນເພ່ືອຊອກຫາຄວາມຜິດຂອງພະນັກງານ, ແຕ່ເພື່ອສ້າງພະນັກງານໃຫ້ດີຂຶ້ນ ແລະ ສ້າງອົງການຈັດຕັ້ງໃຫ້ເຂັ້ມແຂງຂຶ້ນ. ຊຸດຝຶກອົບຮົມຄັ້ງນີ້ຈະດຳເນີນໄປເປັນເວລາ 3 ວັນ, ຜູ້ເຂ້ົາຮ່ວມຈະໄດ້ສຶກສາບັນດານິຕິກຳທີ່ກ່ຽວຂ້ອງ, ຮຽນຮູ້ວິທີການປະເມີນ ແລະ ຝຶກປະຕິບັດລະບົບສັງລວມຜົນການປະເມີນ ເພື່ອນຳເອົາຄວາມຮູ້ທີ່ໄດ້ຮັບໄປຈັດຕັ້ງປະຕິບັດຕົວຈິງໃນອົງການຈັດຕັ້ງຂອງຕົນໃຫ້ມີປະສິດທິພາບສູງຂຶ້ນ.
ພາບ: ອ່າຍຄໍາ
KPL
