ຮອງລັດຖະມົນຕີ ກະຊວງການຕ່າງປະເທດ ເຄື່ອນໄຫວວຽກງານ ຢູ່ດ່ານສາກົນລານຕຸ້ຍ ເມືອງຍອດອູ

10/05/2024 15:27
Email Print 534
ຂປລ ຂປລ. ໃນວັນທີ 8 ພຶດສະພາ 2024 ຜ່ານມາ, ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການ ຕ່າງປະເທດ ພ້ອມດ້ວຍຜູ້ຕາງໜ້າຈາກ ຂະແໜງການທີ່ກ່ຽວຂ້ອງຂອງສູນກາງ ລົງເຄື່ອນໄຫວພົບປະເຮັດວຽກຮ່ວມ ກັບ ທ່ານ ຄໍາເຫລັກ ໃຈອີສານ, ຮອງເຈົ້າແຂວງຜົ້ງສາລີ

ຂປລ. ໃນວັນທີ 8 ພຶດສະພາ 2024 ຜ່ານມາ, ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການ ຕ່າງປະເທດ ພ້ອມດ້ວຍຜູ້ຕາງໜ້າຈາກ ຂະແໜງການທີ່ກ່ຽວຂ້ອງຂອງສູນກາງ ລົງເຄື່ອນໄຫວພົບປະເຮັດວຽກຮ່ວມ ກັບ ທ່ານ ຄໍາເຫລັກ ໃຈອີສານ, ຮອງເຈົ້າແຂວງຜົ້ງສາລີ, ພ້ອມດ້ວຍຜູ້ຕາງໜ້າຈາກຂະແໜງການ ກ່ຽວຂ້ອງຂອງ ແຂວງຜົ້ງສາລີ ເພື່ອຮ່ວມກັນລົງກວດກາ, ເກັບກຳຂໍ້ມູນ ແລະ ປະຊຸມປຶກສາຫາລື ກ່ຽວກັບ ຄວາມພ້ອມຂອງດ່ານ ສາກົນລານຕຸ້ຍ ເມືອງຍອດອູ ແຂວງຜົ້ງສາລີ ເພື່ອກະກຽມຄວາມພ້ອມ ໃນການເປີດເປັນດ່ານສາກົນ ຢ່າງສົມບູນ.

ການລົງໄປກວດກາ, ເກັບກໍາຂໍ້ມູນຂອງເຈົ້າໜ້າທີ່ເບື້ອງລາວ ຢູ່ດ່ານດັ່ງກ່າວໃນຄັ້ງນີ້, ເປັນການປະຕິບັດ ຕາມກົດໝາຍ ວ່າດ້ວຍຊາຍແດນແຫ່ງຊາດ; ດໍາລັດວ່າດ້ວຍດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018 ພາກທີ II  ມາດຕາ 9, 10, 11, 13, 14  ແລະ 16  ແລະ ແຈ້ງການຂອງ ຫ້ອງວ່າການສໍານັກງານ ນາຍົກລັດຖະມົນຕີ ສະບັບເລກທີ 267/ຫສນຍ, ລົງວັນທີ 27 ກຸມພາ 2023 ເຫັນດີອະ ນຸມັດໃຫ້ບໍລິການດ່ານສາກົນລານຕຸ້ຍ ເມືອງຍອດອູ ແຂວງຜົ້ງສາລີ ຕາມການສະເໜີຂອງກະຊວງການຕ່າງປະເທດ ສືບຕໍ່ປັບປຸງໂຄງລ່າງພື້ນຖານ ເພື່ອເປີດເປັນດ່ານສາກົນຢ່າງສົມບູນແບບ. ດ່ານດັ່ງກ່າວ, ເປັນດ່ານຊາຍແດນ ລະ ຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ສາທະລະນະລັດ ປະຊາຊົນຈີນ, ມີເສັ້ນຊາຍແດນ ລະຫວ່າງ ລາວ-ຈີນ ຕັດຜ່ານ, ມີຫລັກໝາຍຊາຍແດນ ລາວ-ຈີນ ເລກທີ 7 ຕັ້ງຢູ່ບໍລິເວນດ່ານ, ຕັ້ງຢູ່ທິດຕາເວັນ ອອກຂອງເສັ້ນທາງບ້ານຫວຍອາຍ ເມືອງຍອດອູ ແຂວງຜົ້ງສາລີ ສປປ ລາວ ແລະ ບ້ານປ່າຄາ ສປ ຈີນ, ມີຄວາມສູງ 1024.9 ແມັດ.

ຜ່ານການລົງສໍາຫລວດ, ເກັບກໍາຂໍ້ມູນຢູ່ພື້ນທີ່ຕົວຈິງເຫັນວ່າ: ດ່ານດັ່ງກ່າວ, ເປັນຈຸດຍຸດທະສາດໃນການ ເຂົ້າ-ອອກດ່ານຊາຍແດນ ລະຫວ່າງ ສອງປະເທດ ແລະ ປະເທດທີສາມ, ເປັນປະຕູສູ່ຄວາມສີວິໄລ, ເຊິ່ງມີຄວາມ ສໍາຄັນ ໃນການປະກອບສ່ວນ ອຳນວຍຄວາມສະດວກ ຂອງການບໍລິການການຂົນສົ່ງສິນຄ້າ, ຜູ້ໂດຍສານ, ຍານພາຫະນະຕ່າງໆ, ນັກທ່ອງທ່ຽວ, ການເຂົ້າ-ອອກຂອງປະຊາຊົນ, ເປັນຈຸດທີ່ຈະສາມາດດຶງດູດນັກລົງທຶນເຂົ້າມາລົງທຶນ ໃນການພັດທະນາບໍລິເວນຊາຍແດນ ເພື່ອປະກອບສ່ວນ ສ້າງສາຍພົວພັນອັນດີ, ມິດຕະພາບທີ່ດີທີ່ມີມູນເຊື້ອມາ ຍາວນານ ຕາມທິດ 4 ດີ, ບັນດາປະເທດໃນພາກພື້ນ ແລະ ສາກົນ ແນໃສ່ເຮັດໃຫ້ການພັດທະນາ ເສດຖະກິດ ສັງຄົມແຫ່ງຊາດ ໃຫ້ມີການຂະຫຍາຍຕົວ ແລະ ຍືນຍົງ ໂດຍສະເພາະ ຊີວິດການເປັນຢູ່ ຂອງປະຊາຊົນ ແຂວງຜົ້ງສາລີ ກໍຄື ປະຊາຊົນລາວ ບັນດາເຜົ່າໃຫ້ມີຄວາມສົມບູນພູນສຸກຂຶ້້ນໄປເລື້ອຍໆ, ປະກອບສ່ວນເຂົ້າໃນພາລະກິດປົກປັກ ຮັກສາ ແລະ ສ້າງສາປະເທດຊາດໃຫ້ມີຄວາມຮຸ່ງເຮືອງສີວິໄລ.

ຕາມການລາຍງານຂອງແຂວງຜົ້ງສາລີ, ມາເຖິງປັດຈຸບັນ ເຫັນວ່າພື້ນຖານໂຄງລ່າງຂອງດ່ານ ໂດຍສະເພາະ ແຜນຜັງລວມຂອງດ່ານ, ເສັ້ນທາງຄົມມະນາຄົມມີຄວາມສະດວກ, ລານຈອດລົດຂົນສົ່ງສິນຄ້າກວ້າງຂວາງ ສາມາດ ຮອງຮັບລົດບັນທຸກຂົນສົ່ງ ສິນຄ້າໄດ້ຫລາຍຮ້ອຍຄັນຕໍ່ມື້, ມີຕຶກອາຄານຫ້ອງການຂອງຂະແໜງການຕ່າງໆ ຂອງເຈົ້າ ໜ້າທີ່ກວດກາ ຄົນເຂົ້າ-ອອກເມືອງ, ເຈົ້າໜ້າທີ່ພາສີ ແລະ ຂະແໜງການອື່ນ, ເຮືອນພັກພະນັກງານ, ລະບົບໄຟຟ້າ, ນໍ້າປະປາ ແລະ ດ້ານອື່ນໆເຫັນວ່າມີຄວາມພ້ອມແລ້ວ.

ໃນກອງປະຊຸມປຶກສາຫາລື ທ່ານຮອງລັດຖະມົນຕີ ກະຊວງການຕ່າງປະເທດ ໄດ້ຮັບຟັງການລາຍງານກ່ຽວ ກັບ ສະພາບການຈັດຕັ້ງປະຕິບັດໜ້າທີ່ ຂອງຄະນະຄຸ້ມຄອງດ່ານ ໃນໄລຍະຜ່ານມາ, ພ້ອມທັງຮັບຟັງການປະກອບ ຄວາມຄິດເຫັນ ຂອງບັນດາຜູ້ຕາງໜ້າ ຈາກຂະແໜງການທີ່ກ່ຽວຂ້ອງຂອງສູນກາງ ແລະ ທ້ອງຖິ່ນ ແລະ ກອງປະຊຸມກໍ ເຫັນດີເປັນເອກະພາບ ໃຫ້ມີການເປີດດ່ານດັ່ງກ່າວຄືນໃໝ່ ເພື່ອເຮັດໃຫ້ການພົວພັນ, ການຄ້າຂາຍ, ການຂົນສົ່ງສິນ ຄ້າ, ການທ່ອງທ່ຽວ, ການໄປມາຫາສູ່ ຂອງປະຊາຊົນ ລະຫວ່າງ ສອງປະເທດ ໄດ້ສືບຕໍ່ນັບມື້ດີຂຶ້ນໄປເລື້ອຍໆ. ພາຍຫລັງທີ່ມີການປີດດ່ານ ໃນໄລຍະທີ່ມີການແຜ່ລະບາດຂອງພະຍາດໂຄວິດ-19.

ໂອກາດນີ້, ທ່ານ ໂພໄຊ ໄຂຄໍາພິທູນ ຍັງໄດ້ໃຫ້ທິດຊີ້ນຳກ່ຽວກັບ ການກະກຽມຄວາມພ້ອມ ຂອງການເປີດ ດ່ານດັ່ງກ່າວຂຶ້ນເປັນດ່ານສາກົນ ຢ່າງສົມບຸນແບບ ແລະ ເປັນຮູບປະທໍາຄືນໃໝ່. ສະນັ້ນ, ສະເໜີໃຫ້ບັນດາຂະ ແໜງການທີ່ກ່ຽວຂ້ອງຂອງສູນກາງ ແລະ ແຂວງ ໃຫ້ມີການປະສານສົມທົບກັນໂດຍໄວ ເພື່ອກະກຽມປັບປຸງບູລະ ນະພື້ນຖານໂຄງລ່າງຂອງດ່ານ ຈໍານວນໜຶ່ງທີ່ເຫັນວ່າຍັງບໍ່ໄດ້ຕາມເງື່ອນໄຂ, ເພີ່ມຈໍານວນບຸກຄະລາກອນ ຂອງແຕ່ລະ ຂະແໜງການຄົບຕາມລະບຽບການ, ປະກອບເຄື່ອງມື ອຸປະກອນຮັບໃຊ້ ແລະ ດ້ານອື່ນໆໃຫ້ຄົບຖ້ວນ ຕາມມາດຕະ ຖານທີ່ໄດ້ກຳນົດໄວ້ໃນດຳລັດ 558/ລບ ວ່າດ້ວຍດ່ານຊາຍແດນ ແລະ ສະໜາມບິນສາກົນ ເພື່ອເຮັດໃຫ້ການບໍລິ ການ ແລະ ສິ່ງອໍານວຍຄວາມສະດວກດ້ານຕ່າງໆ ຢູ່ດ່ານດັ່ງກ່າວ ໃຫ້ມີປະສິດທິຜົນສູງ ແລະ ຮັບປະກັນການ ປະຕິບັດໜ້າທີ່ວຽກງານ ເພື່ອສະເໜີເປີດເປັນດ່ານສາກົນຮ່ວມກັນຄືນໃໝ່.

KPL

ຂ່າວອື່ນໆ

    • ລາວ ເປີດສາຍການບິນ ໃນພາກໃຕ້ລາວເຊື່ອມຈອດກັບຈີນການເມືອງ

      ລາວ ເປີດສາຍການບິນ ໃນພາກໃຕ້ລາວເຊື່ອມຈອດກັບຈີນ

      5/22/2024 7:11:56 PM

      ສປປ ລາວ ເປີດສາຍການບິນລະຫວ່າງປະເທດຈາກນະຄອນປາກເຊ ແຂວງຈໍາປາສັກ ໄປເຖິງກວາງໂຈ່ວ, ສປ ຈີນ ເພື່ອສົ່ງເສີມການທ່ອງທ່ຽວລາວ ແລະ ຍັງເປັນການຊຸກຍູ້ການພັດທະນາເສດຖະກິດ-ສັງຄົມພາຍໃນແຂວງດັ່ງກ່າວ ຈະສາມາດເຊື່ອມໂຍງເຊື່ອມຈອດພາກໃຕ້ຂອງ ສປປ ລາວ ກັບ ປະເທດ ກໍາປູເຈຍ, ໄທ, ຫວຽດນາມ.

    • ລັດຖະບານລາວ ປະດັບຫລຽນໄຊ ໃຫ້ ກົງສຸນກິດຕິມະສັກຂອງ ລາວ ປະຈຳ ລີບັງການເມືອງ

      ລັດຖະບານລາວ ປະດັບຫລຽນໄຊ ໃຫ້ ກົງສຸນກິດຕິມະສັກຂອງ ລາວ ປະຈຳ ລີບັງ

      5/22/2024 4:14:01 PM

      ຂປລ. ໃນວັນທີ 21 ພຶດສະພາ 2024 ຜ່ານມາ, ທ່ານ ສະເຫລີມໄຊ ກົມມະສິດ ຮອງນາ ຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບ ແລະ ຕາງໜ້າ ໃຫ້ລັດຖະບານລາວ ປະດັບຫລຽນໄຊມິດຕະພາບ ໃຫ້ແກ່ ທ່ານ ຊັກ ຢູເຊັບ ໂຮກາແຢມ (Mr. Jacques YOUSESEF HOKAYEM) ກົງສຸນກິດຕິມະສັກ ຂອງ ສປປ ລາວ ປະຈຳ ລີບັງ

    • ກຊສ ຫວນຄືນວັນສໍາຄັນຂອງພັກ ຂອງຊາດການເມືອງ

      ກຊສ ຫວນຄືນວັນສໍາຄັນຂອງພັກ ຂອງຊາດ

      5/22/2024 4:06:18 PM

      ຂປລ. ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ຈັດປາຖະກະຖາ ວັນຜ່າວົງປິດລ້ອມ ຂອງກອງພັນທີ 2 ວິລະຊົນ ທີ່ທົ່ງໄຫຫີນຊຽງຂວາງ ຄົບຮອບ 65 ປີ (18/5/1959-18/5/2024) ແລະ ວິລະກຳໂຕນຄຸກຢ່າງມະຫັດສະຈັນ ຂອງບັນດາຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 64 ປີ (24/5/1960-24/5/2024) ແລະ ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ (7/5/1954-7/5/2024) ໃນວັນທີ 22 ພຶດສະພາ 2024

    • ຜູ້ແທນອົງການ ອອປສ ເຂົ້າຢ້ຽມຂໍ່ານັບຮອງຫົວໜ້າ ອົງການໄອຍະການປະຊາຊົນສູງສຸດ ສສ ຫວຽດນາມການເມືອງ

      ຜູ້ແທນອົງການ ອອປສ ເຂົ້າຢ້ຽມຂໍ່ານັບຮອງຫົວໜ້າ ອົງການໄອຍະການປະຊາຊົນສູງສຸດ ສສ ຫວຽດນາມ

      5/22/2024 3:49:14 PM

      ຂປລ. ຕອນບ່າຍວັນທີ 21 ພຶດສະພາ 2024, ຄະນະຜູ້ແທນ ອົງການໄອຍະການປະຊາຊົນສູງສຸດ (ອອປສ) ແຫ່ງ ສປປ ລາວ ນໍາໂດຍ ສະຫາຍ ບຸນທ່ຽງ ວິໄລວົງ ຮັກສາການຫົວໜ້າຫ້ອງການອົງ ການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຄະນະ ໄດ້ເຂົ້າຢ້ຽມຂໍ່ານັບ ສະຫາຍ ຫງຽນ ກວາງຢຸ້ງ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໂອກາດເດີນທາງ ຢ້ຽມຢາມ ແລະ ເຮັດວຽກຢ່າງເປັນທາງການ ລະຫວ່າງ ວັນທີ 20-24 ພຶດສະພາ 2024 ທີ່ ສສ ຫວຽດນາມ.

    • ຫ້ອງການ ອອປສ ລາວ-ຫວຽດນາມ ຮ່ວມແລກປ່ຽນບົດຮຽນການເມືອງ

      ຫ້ອງການ ອອປສ ລາວ-ຫວຽດນາມ ຮ່ວມແລກປ່ຽນບົດຮຽນ

      5/22/2024 3:40:34 PM

      ຂປລ. ຄະນະຜູ້ແທນອົງການ ໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຄະນະຜູ້ແທນອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ພົບປະແລກປ່ຽນບົດຮຽນວຽກງານຫ້ອງການ, ວຽກງານ ຂ່າວທາງເວບໄຊ, ວາລະສານ ແລະ ຂ່າວໜັງສືພິມ ໃນວັນທີ 21 ພຶດສະພາ 2024 ຢູ່ຮ່າໂນ້ຍ ແຫ່ງ ສສ ຫວຽດນາມ

ads
ads

Top