ຂປລ
ຂປລ. ໃນວັນທີ 26 ເມສາ 2024 ນີ້, ກະຊວງການຕ່າງປະເທດ ຈັດກອງປະຊຸມສະຫລຸບວຽກງານກວດກາ ປະຈຳປີ 2023 ແລະ ທິດທາງແຜນການປີ 2024, ພ້ອມທັງເຜີຍແຜ່ເອກະສານທີ່ກ່ຽວຂ້ອງ ຈຳນວນໜຶ່ງ
ຂປລ. ໃນວັນທີ 26 ເມສາ 2024 ນີ້, ກະຊວງການຕ່າງປະເທດ ຈັດກອງປະຊຸມສະຫລຸບວຽກງານກວດກາ ປະຈຳປີ 2023 ແລະ ທິດທາງແຜນການປີ 2024, ພ້ອມທັງເຜີຍແຜ່ເອກະສານທີ່ກ່ຽວຂ້ອງ ຈຳນວນໜຶ່ງ ໂດຍການເປັນປະທານຂອງ ທ່ານ ບຸນເຫລືອ ພັນດານຸວົງ ຄະນະປະຈໍາພັກ, ປະທານຄະນະກວດກາພັກກະຊວງ, ຮອງລັດຖະມົນຕີກະຊວງການຕ່າງປະເທດ ແລະ ມີຄະນະພັກ-ຄະນະນໍາກະຊວງ, ບັນດາເລຂາໜ່ວຍພັກ, ບັນດາຄະນະກົມ, ສະມາຊິກພັກ, ພະນັກງານ-ລັດຖະກອນ ຂອງກະຊວງການຕ່າງປະເທດ ເຂົ້າຮ່ວມ.
ໂອກາດດັ່ງກ່າວ, ທ່ານ ນາງ ວິລິບ ບົວສີສະຫວັດ ຮອງຫົວໜ້າກົມກວດກາ ໄດ້ຍົກໃຫ້ເຫັນເຖິງການເຄື່ອນ ໄຫວວຽກງານກວດກາໃນໄລຍະ 1 ປີ ຜ່ານມາ ທັງດ້ານດີ, ດ້ານຄົງຄ້າງ ແລະ ບາງບົດຮຽນທີ່ຖອດຖອນໄດ້, ຜ່ານການເຄື່ອນໄຫວວຽກງານຕິດຕາມ, ກວດກາ ໃນໄລຍະ 1 ປີ ຜ່ານມາ ເຫັນວ່າ ຄະນະພັກແຕ່ລະຂັ້ນ, ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ຕໍ່ວຽກງານຕິດຕາມ, ກວດກາ, ເອົາໃຈໃສ່ຕໍ່ການສະ ກັດກັ້ນ ແລະ ຕ້ານການສໍ້ລາດບັງຫລວງ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ກົດໝາຍຂອງລັດ, ພ້ອມທັງໄດ້ຮັບການຮ່ວມມືເປັນຢ່າງດີ ຈາກບັນດາເປົ້າໝາຍຖືກກວດກາ ແລະ ພາກສ່ວນກ່ຽວຂ້ອງ ເຊິ່ງສາມາດຕີລາຄາໄດ້ວ່າ ສະພາບການພາຍໃນກະຊວງ ການຕ່າງປະເທດມີຄວາມສະຫງົບ, ການປະຕິບັດວຽກງານມີຄວາມໂປ່ງໃສ ແລະ ມີຄວາມສາມັກຄີເອກະພາບ ໃນການເຄື່ອນໄຫວວຽກງານຢ່າງຮອບດ້ານ, ສາມາດສະກັດກັ້ນປະກົດການຫຍໍ້ທໍ້ໄດ້ຢ່າງທັນການ ແລະ ໄດ້ຮັບຜົນດີ.
ພ້ອມກັນນີ້, ທ່ານ ນາງ ໄກມະນີ ອໍລະບູ ກໍາມະການຄະນະພັກກະຊວງ, ຮອງປະທານຄະນະກວດກາພັກກະຊວງ, ຫົວໜ້າກົມກວດກາ ໄດ້ເຜີຍແຜ່ ຄໍາສັ່ງແນະນໍາຂອງຄະນະເລຂາທິການສູນກາງພັກ, ສະບັບເລກທີ 169/ຄລສພ, ລົງວັນທີ 15 ສິງຫາ 2022 ກ່ຽວກັບການເພີ່ມທະວີ ການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນຂອງການກວດກາ; ຄຳແນະນຳຂອງຄະນະກວດກາສູນກາງພັກ, ສະບັບເລກທີ 379/ຄກສພ, ລົງວັນທີ 7 ພະຈິກ 2023 ກ່ຽວກັບການປັບປຸງ ການຈັດຕັ້ງ ຄະນະກວດກາພັກ ແລະ ອົງການກວດກາລັດແຕ່ລະຂັ້ນ; ຄຳແນະນຳຂອງອົງການກວດກາແຫ່ງລັດ, ສະບັບເລກທີ 331/ອກຫລ, ລົງວັນທີ 3 ຕຸລາ 2023 ກ່ຽວກັບການຈັດ ຕັ້ງປະຕິບັດກົດ ໝາຍວ່າດ້ວຍການກວດກາລັດ (ສະບັບປັບປຸງ).
ໃນຕອນທ້າຍ, ທ່ານ ບຸນເຫລືອ ພັນດານຸວົງ ໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ກອງປະຊຸມໂດຍໄດ້ເນັ້ນໜັກ ໃຫ້ຄະນະກວດກາພັກກະຊວງ ແລະ ບັນດາຜູ້ຮັບຜິດຊອບວຽກງານກວດກາ ແຕ່ລະຂັ້ນຂອງກະຊວງການຕ່າງປະເທດ ຕ້ອງໄດ້ຄົ້ນຄວ້າ ແລະ ກໍາແໜ້ນບັນດາພາລະບົດບາດ, ສິດ ແລະ ໜ້າທີ່ ລວມທັງບັນດານິຕິກຳທີ່ກ່ຽວຂ້ອງກັບວຽກງານກວດກາ, ວຽກງານຕ້ານ ແລະ ສະກັດກັ້ນການສໍ້ລາດບັງຫລວງ; ຫັນວຽກງານກວດກາໃຫ້ໄປຕາມກົດລະບຽບຂອງພັກ ແລະ ກົດໝາຍຂອງລັດ ແລະ ທິດຊີ້ນຳຂອງຂັ້ນເທິງເທື່ອລະກ້າວ; ຕ້ອງໄດ້ສືບຕໍ່ຖືເອົາວຽກງານສະກັດກັ້ນ ແລະ ຕ້ານການສໍ້ລາດບັງຫລວງ ເປັນວຽກງານໜຶ່ງທີ່ສຳຄັນ ແລະ ຍົກລະດັບວຽກງານດັ່ງກ່າວຂຶ້ນເທື່ອລະຂັ້ນ; ເພີ່ມທະວີການແກ້ໄຂຜົນ ການກວດກາໃຫ້ມີປະສິດຕິພາບ ແລະ ປະສິດຕິຜົນສູງຂຶ້ນກວ່າເກົ່າ ແລະ ຖືເອົາວຽກງານກວດກາ ເປັນໜຶ່ງໃນພາລະບົດບາດ ແລະ ແບບແຜນການນໍາພາທີ່ສຳຄັນ ຂອງພັກທີ່ຂາດບໍ່ໄດ້ ທັງເປັນຄວາມຮັບຜິດຊອບໂດຍກົງ ຂອງຄະນະພັກ-ຄະນະນໍາ ພ້ອມທັງຄົ້ນຄວ້າປັບປຸງກົນໄກ ການຕິດຕາມ-ກວດກາ ໃຫ້ຄົບຖ້ວນ, ມີຄວາມເຂົ້າໃຈເລິກເຊິ່ງຕໍ່ຄວາມສຳຄັນ ຂອງວຽກງານຕິດຕາມ-ກວດກາ.
ພາບ: ເກດສະໜາ
KPL