(ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ວັນທີ 20/01/1949-20/01/2024)

ສະຫາຍ ພົນຈັດຕະວາ ຄອນສະຫວັນ ມິ່ງຈໍາປາບານ ກໍາມະການຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ເຕັກນິກກອງທັບ ໄດ້ໃຫ້ສໍາພາດກັບນັກຂ່າວໜັງສືພິມກອງທັບ ເນື່ອງໃນໂອກາດກະກຽມສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ວັນທີ 20 ມັງກອນ 2024 ທີ່ຈະມາເຖິງນີ້ວ່າ: ແມ່ນວັນທີ່ມີຄວາມໝາຍສໍາຄັນ ຂອງບັນດາກໍາລັງ ປະກອບອາວຸດປະຊາຊົນລາວ ສຸດທີ່ມີຄວາມເບີກບານມ່ວນຊື່ນ ແລະ ເອກອ້າງທະນົງໃຈທີ່ຈະໄດ້ພ້ອມກັບທົ່ວພັກ, ທົ່ວປວງຊົນລາວ ບັນດາເຜົ່າໃນທົ່ວປະເທດ ສະເຫລີມສະຫລອງວັນສ້າງຕັ້ງ ກອງທັບປະຊາຊົນລາວຄົບຮອບ 75 ປີ ໃນທ່າມກາງບັນຍາກາດ ທີ່ປະຊາຊົນລາວໃນທົ່ວປະເທດ ພວມອອກແຮງແຂ່ງຂັນກັນ ປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ເຂົ້າສູ່ຊີ ວິດຕົວຈິງຢ່າງເລິກເຊິ່ງ ແລະ ກ້ວາງຂວາງ ອັນໄດ້ເຮັດໃຫ້ຊີວິດການເມືອງ, ເສດຖະກິດ, ວັດທະນະທໍາ-ສັງຄົມ ໄດ້ມີການປັບປຸງຂະຫຍາຍຕົວໄປ ສູ່ບາດກ້າວອັນໃໝ່ ແລະ ຍາດໄດ້ຜົນງານໄຊຊະນະຢ່າງຈົບງາມ ໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ກ່ອນໜ້ານີ້ 75 ປີໃນຂະບວນການຕໍ່ສູ້ກູ້ຊາດຂອງປະຊາຊົນລາວ ຕ້ານກັບການຮຸກຮານ ຂອງຈັກກະພັດລ່າເມືອງຂຶ້ນທັງເກົ່າ ແລະ ໃໝ່ ໄດ້ດໍາເນີນໄປຢ່າງຟົດຟື້ນ ແລະ ແຂງແຮງໃນຂອບເຂດທົ່ວປະເທດນັ້ນ, ໂດຍຕອບສະໜອງກັບ ຄວາມຮຽກຮ້ອງຕ້ອງການຂອງການຕໍ່ສູ້ກູ້ຊາດ, ປະຕິບັດຕາມຄໍາສັ່ງ ຂອງສູນກາງພັກກອມມູນິດອິນດູຈີນ, ກອງທັບລາວອິດສະຫລະ ຊຶ່ງເປັນຕົ້ນກໍາເນີດຂອງກອງທັບປະຊາຊົນລາວ ໃນປັດຈຸບັນກໍ່ໄດ້ຮັບການສ້າງຕັ້ງຂຶ້ນຢູ່ຕາແສງລາວຮຸ່ງພຽງສາ, ເມືອງຊຽງຄໍ້ ແຂວງຫົວພັນ ໃນວັນທີ 20 ມັງກອນ 1949 ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ບັນຊາໂດຍກົງ. ຕໍ່ເຫດການທາງດ້ານການເມືອງ ທີ່ມີຄວາມໝາຍປະຫວັດສາດດັ່ງກ່າວ ໄດ້ເປັນຂີດໝາຍແຫ່ງການຂະຫຍາຍຕົວໃໝ່ ທີ່ສະຫວ່າງ ສະໄຫວຂອງຊາດ ຊຶ່ງເປັນເທື່ອທໍາອິດໃນປະຫວັດສາດ ທີ່ປະຊາຊົນເຮົາ ໄດ້ມີກອງທັບຂອງຕົນ ເພື່ອສືບທອດມູນເຊື້ອຕໍ່ສູ້ອັນພິລະອາດຫານ ຂອງບັນພະບູລຸດລາວ, ສູ້ຮົບເພື່ອພາລະກິດປົດປ່ອຍ ປະຊາຊົນຊາວຜູ້ອອກແຮງງານບັນດາເຜົ່າ, ເພື່ອຄວາມເປັນເອກະລາດ ແລະ ອິດສະລະພາບແຫ່ງຊາດອັນແທ້ຈິງ; ບົນເສັ້ນທາງແຫ່ງການສ້າງຕັ້ງ ກອງທັບປະຊາຊົນລາວ ໄປສົມຄູ່ກັບ ການ ເຮັດໜ້າທີ່ສູ້ຮົບ ແລະ ສູ້ຮົບມີໄຊ ເຕີບໃຫຍ່ຂະຫຍາຍຕົວ ແລະ ຜ່ານຜ່າຄວາມຫຍຸ້ງຍາກ, ເສຍສະຫຼະນາໆປະການ ຕໍ່ສູ້ເພື່ອຊາດເພື່ອປະຊາຊົນ, ຕີຊະນະສັດຕູທີ່ຄວາມເຂັ້ມແຂງ ທາງດ້ານການທະຫານ ແລະ ທາງດ້ານເສດຖະກິດ ບໍ່ຈັກເທົ່າໃດທົບ ແຕ່ກອງທັບປະຊາຊົນລາວ ພາຍໃຕ້ການນໍາພາຂອງພັກ ກໍ່ສາມາດປົດປ່ອຍປະເທດຊາດ, ສືບຕໍ່ປົກປັກຮັກສາ ແລະ ສ້າງສາພັດທະນາປະ ເທດຊາດ ສົມກັບຄໍາເວົ້າທີ່ວ່າ: “ກອງທັບວິລະຊົນຂອງຊາດລາວວິລະຊົນ, ຄົນລາວພິລະອາດຫານ”.

ສະຫາຍ ພົນຈັດຕະວາ ຄອນສະຫວັນ ມິ່ງຈໍາປາບານ ຍັງໃຫ້ຮູ້ຕື່ມອີກວ່າ: ຕະຫຼອດໄລຍະເວລາກວ່າເຄິ່ງສະຕະວັດແຫ່ງການຕໍ່ສູ້ມີໄຊ ຂອງກອງທັບປະຊາຊົນລາວ ພາຍໃຕ້ການນໍາພາຂອງພັກປະຊາຊົນປະຕິວັດລາວ ຜູ້ສືບທອດພາລະກິດປະຕິວັດອັນມີກຽດສະຫງ່າ ຂອງພັກກອມມູນິດອິນດູຈີນ ກອງທັບປະຊາຊົນລາວ ທັງສູ້ຮົບ ແລະ ທັງຂົນຂວາຍກໍ່ສ້າງຮາກຖານການ ເມືອງໃນບັນດາເງື່ອນໄຂອັນສຸດທີ່ຫຍຸ້ງຍາກ, ລໍາບາກ, ກອງທັບປະຊາຊົນລາວ ໄດ້ພ້ອມກັບປວງຊົນລາວບັນດາເຜົ່າໃນທົ່ວປະເທດ ດໍາເນີນການຕໍ່ສູ້ຢ່າງໜຽວແໜ້ນບໍ່ຍອມຈໍານົນ ແລະ ຕີຕ້ານອິດທິກໍາລັງປໍລະປັກທີ່ມາຮຸກຮານ ໃຫ້ປະລາໄຊລົງເຖິງແມ່ນວ່າ ພວກອິດທິກໍາລັງປໍລະປັກຈະມີເຕັກນິກວິທະຍາສາດ ການທະຫານທັນສະໄໝ, ເຂັ້ມແຂງທາງດ້ານເສດຖະກິດ ເໜືອກ່ວາເທົ່າໃດ ແຕ່ກອງທັບປະຊາຊົນລາວ ກໍ່ສາມາດຕີໃຫ້ພວກມັນປະລາໄຊລົງຢ່າງເຈັບແສບ ສະຖາປະນາປະເທດຊາດໄດ້ຢ່າງສົມບູນ.

KPL