ຂປລ
ຂປລ. ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ໃນໂອກາດເຂົ້າຮ່ວມ ກອງປະຊຸມດໍາເນີນຊີ ວິດການເມືອງ ພາຍໃນຄະນະບໍລິຫານງານພັກ ແຂວງສາລະວັນ ກາງສະໄໝ ທີ IX ເຊິ່ງຈັດຂຶ້ນໃນທ້າຍອາທິດຜ່ານມາ
ຂປລ. ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ໃນໂອກາດເຂົ້າຮ່ວມ ກອງປະຊຸມດໍາເນີນຊີ ວິດການເມືອງ ພາຍໃນຄະນະບໍລິຫານງານພັກ ແຂວງສາລະວັນ ກາງສະໄໝ ທີ IX ເຊິ່ງຈັດຂຶ້ນໃນທ້າຍອາທິດຜ່ານມາ ສະຫາຍ ພົອ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ໄດ້ໃຫ້ກຽດໂອ້ລົມ ໂດຍເນັ້ນໃຫ້ຄະນະບໍລິຫານງານພັກແຂວງສາລະວັນ ສືບຕໍ່ເຮັດວຽກງານສຶກສາອົມຮົມ ການເມືອງແນວຄິດໃຫ້ຕໍ່ເນື່ອງ ແລະ ເຖິງເປົ້າໝາຍ, ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ກຳແໜ້ນ ແລະ ຕ້ານສະກັດກັ້ນ ການ ເຄື່ອນໄຫວຂອງກຸ່ມຄົນບໍ່ດີ ທີ່ຫວັງກໍ່ຄວາມບໍ່ສະຫງົບຢູ່ຮາກຖານ ແລະ ບໍລິເວນຕ່າງໆ ຮັບປະກັນເຮັດໃຫ້ສະພາບພາຍໃນແຂວງ ມີຄວາມສະຫງົບໜັກແໜ້ນ.
ພ້ອມກັນນີ້, ໃຫ້ສືບຕໍ່ເຮັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ແກ້ໄຂຄວາມທຸກຍາກຂອງປະຊາຊົນ ຕິດພັນກັບວຽກງານ 3 ສ້າງຂອງພັກ, ເພີ່ມທະວີປັບປຸງລະບົບການ ເມືອງ ແຕ່ຂັ້ນແຂວງລົງຮອດຮາກຖານ ໃຫ້ໜັກແໜ້ນເຂັ້ມແຂງ, ພັດທະນາດ້ານວັດທະນະທຳ-ສັງຄົມ ໃຫ້ຄຽງຄູ່ກັບການພັດທະນາ ທາງດ້ານເສດຖະກິດ, ເພີ່ມທະວີການນໍາພາ-ຊີ້ນຳ ສ້າງພະນັກງານໃຫ້ມີແນວຄິດໜັກແໜ້ນ, ເຂັ້ມແຂງ, ຈົ່ງຮັກພັກດີ, ມີຄວາມກະຕືລືລົ້ນຕໍ່ໜ້າທີ່ວຽກງານ, ຍຶດໝັ້ນ ແລະ ປະຕິບັດຢ່າງເຂັ້ມງວດ 5 ຫລັກການ 3 ທິດນໍາໃນການກໍ່ສ້າງພັກ, ປະຕິບັດຫລັກການລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ບຸກຄົນຮັບຜິດຊອບ, ເພີ່ມທະວີວຽກງານກວດກາພັກ, ກວດກາລັດ ແລະ ການກວດສອບ, ປັບປຸງອົງການຈັດຕັ້ງມະຫາຊົນຂອງພັກ ແລະ ສ້າງເງື່ອນໄຂໄດ້ເຄື່ອນໄຫວຖືກຕ້ອງ ຕາມພາລະບົດບາດເປັນຢ່າງດີ.
ຄະນະບໍລິຫານງານພັກແຂວງ ຕ້ອງຍົກສູງຄວາມສາມາດນໍາພາ ຄວາມເປັນແບບຢ່າງນຳໜ້າ ຕໍ່ການແກ້ໄຂບັນຫາຕົວຈິງ ເພື່ອສືບຕໍ່ສ້າງຄວາມເຊື່ອໝັ້ນ ແລະ ຄວາມໄວ້ວາງໃຈຈາກປະຊາຊົນ, ສືບຕໍ່ປະຕິບັດແນວທາງການຕ່າງປະເທດ ຍາດແຍ່ງເອົາການສະໜັບສະໜູນພັດທະນາແຂວງ ແລະ ພ້ອມກັນຈັດຕັ້ງຜັນຂະຫຍາຍເນື້ອໃນຈິດໃຈກອງປະຊຸມຄັ້ງນີ້ ໃຫ້ປະສົບຜົນສໍາເລັດ ແລະ ມີໝາກຜົນຕົວຈິງ.
ຂ່າວ: ກິນດາວັນ ອ້ວນນາຄູ
KPL
