ຂປລ.ນາງສາວ ຈິນຕະນາ ຄິດາພອນ(ຕາໂຕ) ໄດ້ຮັບແຕ່ງຕັ້ງເປັນນາງສາວລາວ (Miss Earth Laos) ເພື່ອເປັນຕົວແທນໃຫ້ແກ່ ແມ່ຍິງລາວ ເຂົ້າຮ່ວມແຂ່ງຂັນໃນເວທີລະດັບໂລກ (Miss Earth 2022) ໃນທ້າຍເດືອນຕຸລາ 2022 ນີ້, ຢູ່ປະເທດຟີລິບປິນ. ນາງ ຈິນຕະນາ ຄິດາພອນ ສູງ 168 ຊັງຕີແມັດ, ຈົບການສຶກສາຈາກມະຫາວິທະຍາໄລແຫ່ງຊາດລາວ ເຊິ່ງໃນໄລຍະຜ່ານມາ ເຄີຍແຂ່ງຂັນ ມິດເວີ 2018 (Miss world 2018), ລາວຊຸບເປີໂມເດວ 2019 (Lao super model 2019), ພ້ອມນີ້ຍັງຜ່ານເວທີເດີນແບບ, ຖ່າຍແບບ ມາແລ້ວຫລາຍເວທີ.

ພິທີຖະແຫລງຂ່າວໄດ້ຈັດຂຶ້ນໃນວັນທີ 12 ຕຸລາ 2022 ຜ່ານມາ ຢູ່ໂຮງແຮມລາວເທວ ໂດຍທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ນະຄອນ ຫລວງວຽງຈັນ(ນວ) ເຊິ່ງມີບຸກຄົນໃນວົງການບັນເທິງ, ດາລາ, ນາງງາມ, ນັກຮ້ອງ, ນັກສະ ແດງ, ນາຍແບບ, ລວມທັງຜູ້ໃຫ້ການສະໜັບສະໜູນ ເຂົ້າຮ່ວມ. ການແຕ່ງຕັ້ງ MISS EARTH LAOS ໄປປະກວດໃນເວທີສາກົນ ຄັ້ງນີ້ ເປັນການຊຸກຍູ້ສົ່ງເສີມແມ່ຍິງລາວໄດ້ສະແດງຄວາມຮູ້ຄວາມສາມາດ, ທັກສະຕ່າງໆ ລວມໄປເຖິງການເຜີຍແຜ່ ວັດທະນະທຳ, ຮີດຄອງປະເພນີຂອງຊາດລາວ ອອກສູ່ສາຍຕາຂອງສາກົນ ເປັນຕົ້ນແມ່ນການແຕ່ງກາຍ, ກິລິຍາ, ມາລະຍາດທີ່ບົ່ງບອກເຖິງຄວາມເປັນລາວ ແລະ ໂຄງ ການດັ່ງກ່າວ ເປັນອີກໂຄງການໜຶ່ງທີ່ຊຸກຍູ້ສົ່ງເສີມເສີມ ການປົກປັກຮັກສາສິ່ງແວດລ້ອມ ແລະ ອື່ນໆ.

ໂອກາດດັ່ງກ່າວ, ນາງ ຈິນຕະນາ ຄິດາພອນ ກ່າວວ່າ: ຕົນຮູ້ສຶກຕື່ນເຕັ້ນ ແລະ ດີໃຈຫລາຍ ທີ່ໄດ້ເປັນຕົວແທນໃຫ້ແມ່ຍິງລາວ ໃນທົ່ວປະເທດ ໄປຮ່ວມແຂ່ງຂັນໃນເວທີສາກົນ, ພ້ອມທັງ ຢືນຢັນວ່າ ຈະເຮັດໜ້າທີ່ໃຫ້ດີທີ່ສຸດ ໃນການເປັນຕົວແທນຂອງແມ່ຍິງລາວ ນຳເອົາວັດທະນະທໍາ, ຮີດຄອງປະເພນີອັນດີງາມ ຂອງ ສປປ ລາວ ໄປເຜີຍແຜ່ ໃຫ້ທົ່ວໂລກ ໄດ້ຮັບຮູ້ ສປປ ລາວ ຫລາຍຂຶ້ນ.

    ສໍາລັບ ຊ່ອງທາງການຕິດຕາມ ແລະ ໃຫ້ການສະໜັບສະໜູນໃນການເຂົ້າຮ່ວມແຂ່ງຂັນ Miss Earth 2022 ສາມາດຕິດຕາມໄດ້ທີ່ ເພຈ TatoJintanaKdp ແລະ ເພຈ Miss Earth Laos.

ພາບ: ເກດສະໜາ

KPL