ຂປລ.ທີ່ນະຄອນຫລວງວຽງຈັນ, ວັນທີ 29 ມິຖຸນາ 2022, ອົງການພັດທະນາສາກົນຂອງ ສະຫະ ລັດອາເມລິກາ (USAID) ໂດຍການ​ສະ​ໜັບ​ສະ​ໜູນຈາກ ອົງການຢູນິເຊັບ ໄດ້ມອບອຸປະກອນລະບົບ ຄວາມເຢັນເກັບຮັກສາວັກຊີນ ເເລະ ອຸປະກອນໄອທີ ມູນຄ່າປະມານ 150.000 ໂດລາສະຫະລັດ ໃຫ້ເເກ່ ກະຊວງສາທາລະນະສຸກ ເພື່ອຊ່ວຍຜັນ ຂະຫຍາຍວຽກງານ ສັກວັກຊີນກັນພະຍາດ ໂຄວິດ-19 ໃນ ສປປ ລາວ ໂດຍສະເພາະ ໃນຊຸມຊົນຫ່າງໄກສອກຫລີກ. ໃຫ້ກຽດເຂົ້າຮ່ວມຂອງ ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ, ທ່ານ ຄາເລີນຮີວ ວ່າການເເທນຜູ້ຕາງໜ້າອົງການ USAID ປະຈໍາ ສປປ ລາວ ເເລະ

ທ່ານນາງ ຣິເອະ ທາເຄຊຶ ວ່າການເເທນຫົວຫນ້າພະແນກສຸຂະພາບ

, ອົງການຢູນິເຊັບປະຈໍາ ສປປ ລາວ. ອຸປະກອນລະບົບຄວາມເຢັນ ເກັບຮັກສາວັກຊີນ ທີ່ໄດ້ມອບ ໃນຄັ້ງນີ້ ປະກອບມີ: ກ່ອງເຢັນເກັບຮັກສາວັກຊີນ ຈຳນວນ 135 ກ່ອງ ເພື່ອຊ່ວຍໃນການຂົນສົ່ງ ວັກຊີນຈາກສາງ, ພ້ອມດ້ວຍ ກ່ອງບັນຈຸວັກຊີນ ເເບບບໍ່ຕ້ອງການແຊ່ແຂງຈຳນວນ

2.000 ກ່ອງ ເພື່ອຊ່ວຍພະນັກງານ ສາທາລະນະສຸກ ໃນການຂົນສົ່ງວັກຊີນ ໄປຈຸດສັກວັກຊີນຕ່າງໆ. ນອກຈາກນີ້, ກ່ອງເຢັນ ຍັງສາມາດນຳໃຊ້ ເພື່ອເກັບຮັກສາວັກຊີນ ໃນກໍລະນີສູກເສີນ ໂດຍສະເພາະ ໃນກໍລະນີຕູ້ເຢັນ ເກັບວັກຊີນບໍ່ເຮັດວຽກ. ຂະນະທີ່, ອຸປະກອນໄອທີ ປະກອບມີ: ເຄື່ອງແທັບເລັດ 245 ໜ່ວຍ ເເລະ ຊຸດຄອມພິວເຕີ ເພື່ອດຳເນີນງານ ຢູ່ຈຸດສັກວັກຊີນ ໃນການສະໜັບສະໜູນ ພະນັກງານ ສາທາລະນະສຸກ ເຂົ້າເຖິງ​ສື່ການຮຽນ ເເລະ ພັດທະນາທັກສະເເບບດີຈີຕອນ.

ທ່ານດຣ. ພອນປະເສີດ ອຸນາພົມ ໄດ້ສະເເດງຄວາມຂອບໃຈໄປຍັງ ອົງການ USAID ເເລະ ລັດຖະບານ ສະຫະລັດອາເມລິກາ ສຳລັບການຊ່ວຍເຫລືອໃນຄັ້ງນີ້, ພ້ອມດ້ວຍ ອົງການຢູນິເຊັບ ທີ່ໄດ້ໃຫ້ການສະໜັບສະໜູນ ເເກ່ວຽກງານສັກວັກຊີນ ໃນໄລຍະການເເຜ່ລະບາດ ຂອງພະຍາດໂຄວິດ-19. ການຊ່ວຍເຫລືອ ຈາກຄູ່ຮ່ວມມືສາກົນ ເຮັດໃຫ້ສປປ ລາວ ສາມາດບັນລຸອັດຕາ ປົກຄຸມການສັກວັກຊີນ ໄດ້ຫລາຍພໍສົມຄວນ ເເລະ ການສະໜັບສະໜູນຈາກ ອົງການ USAID ເປັນການປະກອບສ່ວນ ອັນສຳຄັນໃຫ້ແກ່ວຽກງານ ເພື່ອຮັບປະກັນ ວ່າເດັກນ້ອຍ, ແມ່ ແລະ ທຸກຄອບຄົວ ສາມາດເຂົ້າເຖິງ ການບໍໍລິການສັກວັກຊີນໄດ້. ທັງໝົດນີ້ ກໍເພື່ອກ້າວໄປສູ່ການບັນລຸເປົ້າໝາຍ ການໃຫ້ວັກຊີນກັນພະຍາດ ໂຄວິດ-19 ໃນທົ່ວປະເທດ.

ທ່ານ ຄາ ເລີນ ຮີວ ກ່າວວ່າ: ອຸປະກອນທີ່ໄດ້ມອບໃນມື້ນີ້ ຈະຊ່ວຍສະໜັບສະໜູນ ກະຊວງສາທາລະນະສຸກ ໃນການເສີມສ້າງລະບົບ ຄວາມເຢັນສຳລັບ ການຂົນສົ່ງວັກຊີນ ແລະ ລະບົບຂໍ້ມູນ ທີ່ເປັນໂຄງສ້າງໃຫ້ເເກ່ ວຽກງານສັກວັກຊີນ ທັງໝົດຂອງ ສປປ ລາວ, ພ້ອມທັງໄດ້ສະເເດງຄວາມ ຊົມເຊີຍ ກະຊວງສາທາ ລະນະສຸກ ໃນການຮັບມືກັບພະຍາດ ໂຄວິດ-19 ແລະ ເນັ້ນໜັກເຖິງຄວາມສຳຄັນ ຂອງການຮ່ວມມືກັນ ໃນການຮັບມືກັບພະຍາດດັ່ງກ່າວ.

ທ່ານນາງ ຣິເອະ ທາເຄຊຶ ກໍໄດ້ກ່າວວ່າ: ວັກຊີນນັ້ນມີບົດບາດ ອັນສຳຄັນຕໍ່ການຫຼຸດຜ່ອນ ຈຳນວນ ກໍລະນີເຈັບປ່ວຍຮ້າຍເເຮງ ເເລະ ເສຍຊີວິດ ຈາກໂຄວິດ-19 ໃນປະຈຸບັນ ເເລະ ບັນດາອຸປະກອນທີ່ໄດ້ມອບນັ້ນ ຈະຊ່ວຍຮັບປະກັນ ໃຫ້ທຸກຄົນສາມາດ ເຂົ້າເຖີງວັກຊີນໄດ້ ໂດຍສະເພາະ ຜູ້ທີ່ມີຄວາມສ່ຽງທີ່ສຸດ.

ເນື້ອໃນ: ຂປລ