ຂປລ
ຂປລ. ໂຄງການເຊື່ອມສານວຽກງານຮັກສາສຸຂະພາບ, ໂພຊະນາການ, ນໍ້າສະອາດ ແລະ ສຸຂານາໄມ ເຊິ່ງໄດ້ດຳເນີນໂຄງການຮ່ວມກັນລະຫວ່າງ ອົງການແພລນສາກົນ ປະຈຳລາວ ແລະ ກະຊວງສາທາລະນະສຸກ ໂດຍໄດ້ຮັບການຮ່ວມມືກັບ ພະແນກສາທາລະນະສຸກແຂວງ ແລະ ຫ້ອງການສາທາລະນະສຸກເມືອງໃນ ແຂວງສາລະວັນ ແລະ ແຂວງອຸດົມໄຊ
ຂປລ. ໂຄງການເຊື່ອມສານວຽກງານຮັກສາສຸຂະພາບ, ໂພຊະນາການ, ນໍ້າສະອາດ ແລະ ສຸຂານາໄມ ເຊິ່ງໄດ້ດຳເນີນໂຄງການຮ່ວມກັນລະຫວ່າງ ອົງການແພລນສາກົນ ປະຈຳລາວ ແລະ ກະຊວງສາທາລະນະສຸກ ໂດຍໄດ້ຮັບການຮ່ວມມືກັບ ພະແນກສາທາລະນະສຸກແຂວງ ແລະ ຫ້ອງການສາທາລະນະສຸກເມືອງໃນ ແຂວງສາລະວັນ ແລະ ແຂວງອຸດົມໄຊ ໄດ້ຈັດຕັ້ງປະຕິບັດແຕ່ປີ 2014 ແລະ ຈະສິ້ນສຸດໂຄງການໃນເດືອນມິຖຸນາ 2025. ໂຄງການດັ່ງກ່າວ, ໄດ້ປັບປຸງດ້ານສຸຂະພາບ, ສຸຂາພິບານ, ແລະ ໂພຊະນາການຢ່າງຫລວງຫລາຍໃນ 4 ເມືອງຫລັກ ຄື: ເມືອງສາລະວັນ, ຕະໂອຍ (ແຂວງສາລະວັນ) ແລະ ເມືອງຮຸນ, ປາກແບງ (ແຂວງອຸດົມໄຊ) ສາມາດຊ່ວຍປັບປຸງສຸຂະພາບ ຂອງປະຊາຊົນຫລາຍພັນຄົນໃຫ້ດີຂຶ້ນ.
ທ່ານ ນາງ ແຄໂຣ ໂມແທນສັນ, ຜູ້ອຳນວຍການ ອົງການແພລນສາກົນ ປະຈຳລາວ ໄດ້ກ່າວໃນກອງປະຊຸມສະຫລຸບໂຄງການ ຢູ່ແຂວງສາລະວັນ ເມື່ອບໍ່ດົນນີ້ວ່າ: ໂຄງການດັ່ງກ່າວ, ໄດ້ສ້າງຄວາມເຂັ້ມແຂງ ໃຫ້ແກ່ບັນດາພະນັກງງານສາທາລະ ນະສຸກປະຈຳສຸກສາລາ ກ່ຽວກັບການດູແລສຸຂະພາບແມ່ ແລະ ເດັກ ໂດຍຮັບປະກັນວ່າວຽກງານດັ່ງກ່າວ ຈະເຂົ້າເຖິງຄວາມຕ້ອງການ ຂອງຊຸມຊົນໃຫ້ຫລາຍເທົ່າທີ່ຈະຫລາຍໄດ້; ການຮັບປະກັນໃຫ້ແມ່ຍິງທີ່ເກີດລູກ ໄດ້ຮັບການດູແລກ່ອນເກີດ ຫລື ການຝາກທ້ອງຢ່າງໜ້ອຍ 4 ຄັ້ງ ແມ່ນຄວາມສຳຄັນອັນດັບຕົ້ນໆຂອງການຖືພາ. ນອກຈາກນີ້, ຍັງເນັ້ນໃສ່ການຮັບປະກັນວ່າ ການເກີດລູກໄດ້ຮັບການຊ່ວຍເຫລືອ ຈາກແພດໝໍຜູ້ຊ່ຽວຊານ, ການໃຫ້ຄວາມຮູ້ແກ່ຊຸມຊົນ ກ່ຽວກັບວິທີການລ້ຽງດູເດັກ ແລະ ການຫລຸດຜ່ອນການຂາດ ສານອາຫານ ໃນເດັກທີ່ມີອາຍຸຕໍ່າກວ່າ 2 ປີ ເຊິ່ງຄວາມພະຍາຍາມດັ່ງກ່າວ, ໄດ້ສ້າງຜົນປະໂຫຍດໃຫ້ແກ່ປະຊາຊົນ ໃນ 272 ບ້ານ ແລະ ສຸກສາລາ 40 ແຫ່ງໃນ 4 ເມືອງເປົ້າໝາຍຂອງແຂວງສາລະວັນ ແລະ ອຸດົມໄຊ ແບບຍາວນານ.
ການນຳໃຊ້ຮູບແບບຊຸມຊົນເປັນເຈົ້າການ ໃນດ້ານສຸຂານາໄມ (CLTS+), ການສື່ສານເພື່ອປ່ຽນແປງພຶດຕິກຳທາງສັງຄົມ, ແລະ ເຄື່ອງມືຕິດຕາມຄວາມສະເໝີພາບດ້ານສຸຂານາໄມ ໄດ້ຊ່ວຍໃຫ້ບ້ານດັ່ງກ່າວ, ໄດ້ຮັບການລຶບລ້າງການຖ່າຍຊະຊາຍ ແລະ ສ້າງສິ່ງແວດລ້ອມທີ່ສະອາດ ແລະ ປອດໄພຂຶ້ນ. ນັບແຕ່ມີວິດຖ່າຍ, ການດຳລົງຊີວິດກໍສະດວກສະບາຍຫລາຍຂຶ້ນ, ປະຊາຊົນພາຍໃນບ້ານ ເປັນພະຍາດຖອກທ້ອງຫລຸດລົງ ເຊິ່ງໂດຍລວມແລ້ວ ປະຊາຊົນມີສຸຂະພາບດີຂຶ້ນ ແລະ ບ້ານສະອາດຂຶ້ນ. ນອກຈາກນີ້, ຍັງໄດ້ປັບປຸງສຸກສາລາ ໂດຍເນັ້ນໃສ່ຄວາມສະ ອາດ, ຄວາມປອດໄພ, ແລະ ການເຂົ້າເຖິງບໍລິການແບບເປັນມິດ ສຳລັບແມ່ ແລະ ເດັກ, ລວມທັງກຸ່ມທີ່ມີຄວາມອ່ອນແອເຊັ່ນ: ຜູ້ພິການ.
ໃນໄລຍະດຳເນີນໂຄງການ ແມ່ນສາມາດສໍາເລັດການກໍ່ສ້າງ ແລະ ຕິດຕັ້ງອຸປະກອນ, ເຄື່ອງມືການແພດໃນ ສຸກສາລາ ແລະ ອາຄານ ແມ່ ແລະ ເດັກ ຈຳນວນ 40 ແຫ່ງ, ສໍາເລັດການກໍ່ສ້າງ ລະບົບນ້ຳສະອາດ ເພື່ອປັບປຸງການໃຊ້ນ້ຳຂອງຊຸມຊົນ 50 ແຫ່ງ, ສຳເລັດການການລຶບລ້າງການຖ່າຍຊະຊາຍ ແລະ ປະກາດເປັນບ້ານປອດຖ່າຍຊະຊາຍໄດ້ 272 ບ້ານ, ສຳເລັດການກໍ່ຕັ້ງ ແລະ ຝຶກອົບຮົມ ຄະນະກຳມະການຊຸມຊົນ ເປັນເຈົ້າການໃນດ້ານສຸຂານາໄມ ແລະ ຄຸ້ມຄອງນ້ຳສະອາດ ເພື່ອຮັບປະກັນຄວາມຍືນຍົງ.
ຂໍ້ມູນ-ພາບ: ອົງການແພລນສາກົນ ປະຈໍາລາວ
KPL
