ຂປລ
ຟີລິບປິນ ທີ່ເປັນປະເທດ ປະທານໝູນວຽນ ໄດ້ມອບສັນຍາ ຂອບເສດຖະກິດ ດິຈີຕອນ ອາຊຽນ ທີ່ລົງນາມ ຮຽບຮ້ອຍແລ້ວ ໃຫ້ແກ່ກອງເລຂາອາຊຽນ, ສັນຍາພາກພື້ນສະບັບນີ້ ສຸມໃສ່ອະທິປະໄຕດ້ານດິຈີຕອນ ແລະ ການໄຫລວຽນ ຂໍ້ມູນຂ້າມຊາຍແດນ ເຊິ່ງຄາດວ່າ ຈະມີຜົນບັງຄັບໃຊ້ ໃນຕົ້ນປີ 2027.

ຂປລ.ວິທະຍຸ ໂທລະພາບ ສູນກາງຈີນ, ເມື່ອບໍ່ດົນມານີ້, ຟີລິບປິນ ທີ່ເປັນປະເທດ ປະທານໝູນວຽນ ໄດ້ມອບສັນຍາ ຂອບເສດຖະກິດ ດິຈີຕອນ ອາຊຽນ ທີ່ລົງນາມ ຮຽບຮ້ອຍແລ້ວ ໃຫ້ແກ່ກອງເລຂາອາຊຽນ, ສັນຍາພາກພື້ນສະບັບນີ້ ສຸມໃສ່ອະທິປະໄຕດ້ານດິຈີຕອນ ແລະ ການໄຫລວຽນ ຂໍ້ມູນຂ້າມຊາຍແດນ ເຊິ່ງຄາດວ່າ ຈະມີຜົນບັງຄັບໃຊ້ ໃນຕົ້ນປີ 2027. ສ່ວນສັນຍາ ຍົກລະດັບເຂດການຄ້າເສລີ ຈີນ-ອາຊຽນ 3.0 ໄດ້ກຳນົດຈະມີຜົນບັງຄັບໃຊ້ ໃນວັນທີ 1 ທັນວາ ປີ 2026. ການຈັດລະບຽບການສອງສະບັບດັ່ງກ່າວ ເຮັດວຽກໄປໃນທິດທາງດຽວກັນ ຈະສ້າງພື້ນທີ່ໃໝ່ອ່ຽມ ໃຫ້ແກ່ການຮ່ວມມື ດ້ານເສດຖະກິດດິຈີຕອນ ໃນພາກພື້ນ ແລະ ສ້າງໂອກາດໃຫ້ແກ່ ການພັດທະນາ ຫລາຍຢ່າງ ທີ່ໜ້າຄອງຄອຍ. ສປ ຈີນ ແລະ ອາຊຽນ ເປັນຄູ່ຮ່ວມມື ດ້ານເສດຖະກິດ ການຄ້າ ທີ່ສຳຄັນຂອງກັນແລະກັນ, ການຄ້າທີ່ແຂງແກ່ນ ເປັນພື້ນຖານເຮັດໃຫ້ການຮ່ວມມື ດ້ານດິຈີຕອນ ສາມາດເດີນໄປໜ້າ ຢ່າງໝັ້ນຄົງຍາວນານ. ສປ ຈີນ ເປັນຄູ່ການຄ້າໃຫຍ່ທີ່ສຸດ ຂອງອາຊຽນ ເປັນເວລາ 17 ປີລຽນຕິດ ແລະ ອາຊຽນເປັນຄູ່ການຄ້າໃຫຍ່ທີ່ສຸດຂອງ ສປ ຈີນ ເປັນເວລາ 6 ປີລຽນຕິດ, ມູນຄ່າການຄ້າ ສອງຝ່າຍໃນປີ 2025 ບັນລຸເຖິງ 1.000 ກວ່າຕື້ໂດລາ, ເພີ່ມຂຶ້ນ 18 ເທົ່າເມື່ອທຽບໃສ່ໄລຍະເບື້ອງຕົ້ນ ຂອງການສ້າງຕັ້ງ ເຂດການຄ້າເສລີ ຈີນ-ອາຊຽນ. ການຍົກລະດັບ ເຂດການຄ້າເສລີ ຢ່າງຕໍ່ເນື່ອງ ໄດ້ສະແດງໃຫ້ເຫັນເຖິງ ການປ່ຽນແປງ ຂອງຈຸດສຸມການຮ່ວມມື ຄື: ສະບັບ 1.0 ເນັ້ນໃສ່ການຫລຸດຜ່ອນພາສີ ແລະ ເປີດຊ່ອງທາງ ນຳເຂົ້າ-ສົ່ງອອກສິນຄ້າ; ສະບັບ 2.0 ເນັ້ນໃສ່ ການເປີດກວ້າງການບໍລິການ ແລະ ການອະນຸມັດການລົງທຶນ; ສະບັບ 3.0 ໄດ້ຈັດເສດຖະກິດດິຈີຕອນ, ເສດຖະກິດສີຂຽວ ແລະ ການເຊື່ອມໂຍງ ເຊື່ອມຈອດຂອງຕ່ອງໂສ້ ການສະໜອງ ເຂົ້າໃນຂອບລະບຽບການ ເຮັດໃຫ້ການຮ່ວມມືຫັນຈາກການຈໍລະຈອນສິນຄ້າ ກ້າວໄປສູ່ການເຊື່ອມໂຍງດ້ານກົດລະບຽບໃນລະດັບສູງກວ່າເກົ່າ. ສິ່ງທີ່ໜ້າຄອງຄອຍທີ່ສຸດ ແມ່ນການຮ່ວມກັນກ້າວ ໄປຂ້າງໜ້າ ທາງດ້ານການບໍລິຫານ ດິຈີຕອນລະດັບພາກພື້ນ. ພາຍໃຕ້ ສະຖານະການທີ່ກະແສຝືນໂລກາພິວັດ ເງີຍໜ້າຂຶ້ນ ແລະ ຄວາມສ່ຽງຈາກພູມສາດ ການເມືອງກຳລັງກະທົບຕ່ອງໂສ້ອຸດສາຫະກຳທົ່ວໂລກ, ເສດຖະກິດອາຊຽນຍັງຄົງຮັກສາຄວາມໜຽວແໜ້ນທີ່ເຂັ້ມແຂງ, ສືບຕໍ່ຮັກສາອັດຕາການເຕີບໂຕທີ່ໄວສົມຄວນ ແລະ ຍັງຄົງເປັນຫົວຈັກຂອງການເຕີບໂຕ ທີ່ສຳຄັນຂອງທົ່ວໂລກ. ສັນຍາຂອບເສດຖະກິດ ດິຈີຕອນ ອາຊຽນ ເຄົາລົບອະທິປະໄຕ ດ້ານດິຈີຕອນ ຂອງບັນດາປະເທດ ສະມາຊິກ ອາຊຽນ ຢ່າງເຕັມທີ່, ສະແຫວງຫາການໄຫລວຽນ ຂໍ້ມູນຂ້າມຊາຍແດນ ພາຍໃຕ້ ເງື່ອນໄຂທີ່ປອດໄພ ແລະ ສາມາດຄວບຄຸມໄດ້; ສ່ວນເຂດການຄ້າເສລີຈີນ-ອາຊຽນ ສະບັບ 3.0 ກວມເອົາ 9 ຂົງເຂດ ເຊັ່ນ: ການຄ້າເອເລັກໂຕຣນິກ, ປັນຍາປະດິດ, ການຫັນເປັນດິຈີຕອນຂອງວິສາຫະກິດ ຂະໜາດກາງ ແລະ ນ້ອຍ ເປັນຕົ້ນ. ຂອບສອງຢ່າງດັ່ງກ່າວຊ່ວຍຊູຍູ້ໜູນກັນ, ຫຼຸດຜ່ອນຊ່ອງຫວ່າງດ້ານລະບຽບການພາຍໃນພາກພື້ນເທື່ອລະກ້າວ, ຫຼຸດຜ່ອນຕົ້ນທຶນວິສາຫະກິດ ໃນການດຳເນີນທຸລະກິດດິຈີຕອນ ຂ້າມຊາຍແດນ, ເຮັດໃຫ້ຜົນປະໂຫຍ ດ້ານດິຈີຕອນໄຫລໄປສູ່ ອົງປະກອບຕະຫລາດ ຈຳນວນຫລວງຫລາຍ ໂດຍສະເພາະ ແມ່ນວິສາຫະກິດຂະໜາດກາງ, ຂະໜາດນ້ອຍ ແລະ ຈຸນລະວິສາຫະກິດ ທີ່ມີຄວາມຫຍຸ້ງຍາກ ໃນການຫັນເປັນດິຈີຕອນ. ນອກນີ້, ການປະສານງານ ດ້ານການປະດິດສ້າງໃໝ່ໃນຫລາກ ຫລາຍຂົງເຂດ ກໍໜ້າຄອງຄອຍ ເຊັ່ນດຽວກັນ. ສິ່ງທີ່ໜ້າສົນໃຈຄື: ກ່ອນໜ້ານີ້ບໍ່ດົນ, ສປ ຈີນ ແລະ ອາຊຽນ ໄດ້ປະກາດ ຢ່າງເປັນທາງການວ່າ: ກຳນົດເອົາປີ 2027 ເປັນ “ປີການຮ່ວມມື ດ້ານປັນຍາປະດິດຈີນ-ອາຊຽນ” ເຊິ່ງເປັນການກົດປຸ່ມ ເລັ່ງການປະດິດສ້າງໃໝ່ ດ້ານດິຈີຕອນໃນພາກພື້ ແລະ ເປັນຂີດໝາຍ ສະແດງໃຫ້ເຫັນວ່າ: ການຮ່ວມມືດ້ານດິຈີຕອນ ຂອງສອງຝ່າຍ ໄດ້ຫັນຈາກການຄ້າ ເອເລັກໂຕຣນິກ, ການເຊື່ອມຈອດ ດ້ານພື້ນຖານໂຄງລ່າງ ກ້າວເຂົ້າສູ່ໄລຍະໃໝ່ ແຫ່ງການເສີມສ້າງ ຂີດຄວາມສາມາດ ດ້ວຍປັນຍາປະດິດຢ່າງເລິກເຊິ່ງ. ຈາກເຕັກໂນໂລຊີ 5G, ຄລາວຄອມພິວຕິ້ງ, ການເງິນຂ້າມຊາຍແດນ ຈົນຮອດຜະລິດຕະພັນບັນເທີງດິຈີຕອນທີ່ໄດ້ຮັບຄວາມນິຍົມຢ່າງກວ້າງຂວາງ, ຮູບແບບການຊ່ວຍຊູກຍູ້ໜູນກັນ ດ້ວຍທ່າແຮງຂອງແຕ່ລະຝ່າຍ ນັບມື້ນັບຊັດເຈນ ຄື: ອາຊຽນ ມີກຸ່ມຊາວເນັດໜຸ່ມຈຳນວນ ຫລວງຫລາຍ ແລະ ມີຕະຫຼາດການບໍລິໂພກ ທີ່ຂະຫຍາຍຕົວຢ່າງຟົດຟຶ້ນ; ສປ ຈີນ ມີປະສົບການຢ່າງອຸດົມສົມບູນ ໃນການປະຍຸກໃຊ້ດິຈີຕອນ, ລະບົບນິເວດການຄ້າເອເລັກໂຕຣນິກ ແລະ ແຜນການແກ້ໄຂແບບດິຈີຕອນ. ໃນອະນາຄົດ, ຜະລິດຕະພັນກະສິກຳທີ່ມີເອກະລັກພິເສດຂອງອາຊີຕາເວັນອອກສຽງໃຕ້ສາມາດເຂົ້າເຖິງຜູ້ບໍລິໂພກຂອງຈີນຜ່ານການຄ້າເອເລັກໂຕຣນິກຂ້າມຊາຍແດນ, ເຄື່ອງມືດິຈີຕອນຊ່ວຍພໍ່ຄ້າທ້ອງຖິ່ນສຳເລັດການຫັນເປັນອອນລາຍ, ປັນຍາປະດິດຈະທຳລາຍກຳແພງພາສາ ຢ່າງມີປະສິດທິພາບ ແລະ ປັບປຸງຂັ້ນຕອນການຄ້າຂ້າມຊາຍແດນໃຫ້ດີຂຶ້ນ, ປັນຍາປະດິດສ້າງພະລັງຂັບເຄື່ອນ ໃຫ້ແກ່ການຍົກລະດັບ ຂອງກະສິກຳ, ການແພດ, ວັດທະທະທຳ, ການທ່ອງທ່ຽວ ແລະອື່ນໆ, ໝາກຜົນການປະດິດສ້າງໃໝ່ຕ່າງໆ ຈະແຕກດອກອອກຜົນ ແລະ ສ້າງຜົນປະໂຫຍດໃຫ້ແກ່ປະຊາຊົນໃນພາກພື້ນ. ໃນອະນາຄົດ, ຄຽງຄູ່ກັບການເຊື່ອມຕໍ່ ດ້ານກົດລະບຽບ ເຂົ້າສູ່ລວງເລິກ ແລະ ໄດ້ຮັບການຈັດຕັ້ງປະຕິບັດຕົວຈິງ, ຈຸດຕິດຂັດດ້ານການເຊື່ອມໂຍງ ເຊື່ອມຈອດດິຈີຕອນ ໄດ້ຖືກແກ້ໄຂຢ່າງຕໍ່ເນື່ອງ, ຄວາມສາມາດບົ່ມຊ້ອນດ້ານເຕັກໂນໂລຊີ ຈະຫັນເປັນແຮງຂັບເຄື່ອນ ການເຕີບໂຕຢ່າງແທ້ຈິງ. ສປ ຈີນ ແລະ ອາຊຽນ ຮ່ວມມືກັນຂຸດຄົ້ນ ເສັ້ນທາງດິຈີຕອນ ບໍ່ພຽງແຕ່ຈະສືບຕໍ່ ກະຕຸ້ນເສດຖະກິດ ຂອງພາກພື້ນເທົ່ານັ້ນ, ຍັງຈະສະໜອງແບບ ຢ່າງໃຫ້ແກ່ ບັນດາປະເທດກຳລັງພັດທະນາ ໃນການຄົ້ນຫາ ເສັ້ນທາງ ການພັດທະນາດິຈີຕອນ ທີ່ສ້າງຜົນປະໂຫຍດຢ່າງທົ່ວເຖິງ ແລະ ເປັນເຈົ້າຕົນເອງ, ຮ່ວມກັນເຮັດໃຫ້ໝາກຜົນ ແຫ່ງການເປີດກວ້າງ ແລະ ຮ່ວມມືຂອງອາຊີ-ປາຊີຟິກ ນັບມື້ ນັບໃຫຍ່ຫລວງກວ່າເກົ່າ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL