ຂປລ
ປກສ ເມືອງໂຂງ ທຳລາຍອາວຸດລ່າເນື້ອ ແລະ ວັດຖຸຕ້ອງຫ້າມ 258 ກະບອກ ເພື່ອຮັກສາຄວາມສະຫງົບໃນທ້ອງຖິ່ນ
ແຫຼ່ງຂ່າວຈາກແຂວງຈຳປາສັກ ໃຫ້ຮູ້ວ່າ: ຫ້ອງການຕາແສງດອນໂຂງ ເມືອງໂຂງ ແຂວງຈຳປາສັກ ຈັດພິທີທຳລາຍອາວຸດລ່າເນື້ອ ແລະ ວັດຖຸຕ້ອງຫ້າມຈຳນວນຫຼາຍລາຍການ ເປັນຕົ້ນ ປືນແກັບ, ປືນອັດລົມດັດແປງ, ປືນດັດແປງຍິງລູກແວງ ແລະ ອຸປະກອນຊັອດປາ ໃນວັນທີ 12 ພະຈິກ 2026 ໂດຍມີ ທ່ານ ສາທິດ ປັດສາພັນ ເລຂາຄະນະບໍລິຫານງານພັກເມືອງໂຂງ, ພ້ອມດ້ວຍຫ້ອງການທີ່ກ່ຽວຂ້ອງ ແລະ ອຳນາດການປົກຄອງບ້ານອ້ອມຂ້າງໃນຕາແສງດອນໂຂງ ເຂົ້າຮ່ວມ.
ໂອກາດນີ້, ທ່ານ ພັນໂທ ທອງຄູນ ໃສສະຫວັດ ຮອງຫົວໜ້າກອງບັນຊາການ ປກສ ເມືອງໂຂງ, ຄະນະຮັບຜິດຊອບການລະດົມທ້ອນໂຮມອາວຸດ ໄດ້ຍົກໃຫ້ເຫັນວ່າ: ກອງບັນຊາການ ປກສ ເມືອງ ໄດ້ປະສານສົມທົບກັບພາກສ່ວນກ່ຽວຂ້ອງ ເພື່ອເຄື່ອນໄຫວເກັບກູ້ ແລະ ທ້ອນໂຮມອາວຸດລ່າເນື້ອ ແລະ ວັດຖຸຕ້ອງຫ້າມທຸກຊະນິດທີ່ເປັນອັນຕະລາຍ ແລະ ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ເນື່ອງຈາກການນຳໃຊ້ອາວຸດປືນ ແລະ ອາວຸດລ່າເນື້ອຢ່າງຊະຊາຍໂດຍບໍ່ຄຳນຶງເຖິງກົດໝາຍ ໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງພົນລະເມືອງ ເປັນຕົ້ນ ການນຳໃຊ້ເຂົ້າໃນການນາບຂູ່, ປຸ້ນຈີ້ຊີງຊັບ ແລະ ຄາດຕະກຳ ຊຶ່ງສົ່ງຜົນກະທົບຢ່າງໃຫຍ່ຫຼວງຕໍ່ຄວາມເປັນລະບຽບຮຽບຮ້ອຍຂອງສັງຄົມ. ຜ່ານການຈັດຕັ້ງປະຕິບັດໃນປີ 2025-2026 ຜ່ານມາ ກອງບັນຊາການ ປກສ ເມືອງ ພ້ອມດ້ວຍພາກສ່ວນກ່ຽວຂ້ອງ ສາມາດກັກຢຶດ ແລະ ຮິບໂຮມວັດຖຸຕ້ອງຫ້າມນຳມາທຳລາຍໃນພິທີຄັ້ງນີ້ ປະກອບມີ: ປະເພດອາວຸດລ່າເນື້ອ ແລະ ວັດຖຸລະເບີດ (ລວມ 258 ກະບອກ), ປືນແກັບ 157 ກະບອກ, ປືນອັດລົມດັດແປງ 28 ກະບອກ, ປືນດັດແປງຍິງລູກແວງ 4 ກະບອກ. ໃນນີ້, ໄດ້ຈາກປະຊາຊົນສະໝັກໃຈນຳມາມອບຕໍ່ເຈົ້າໜ້າທີ່ 155 ກະບອກ, ໄດ້ຈາກການມ້າງລາຍຄະດີ 29 ກະບອກ ແລະ ປະເພດອຸປະກອນໝໍ້ຊັອດປາ 16 ເຄື່ອງ.
ພິທີທຳລາຍອາວຸດຄັ້ງນີ້ ສະທ້ອນໃຫ້ເຫັນເຖິງຄວາມພະຍາຍາມສືບຕໍ່ບັງຄັບໃຊ້ລະບຽບກົດໝາຍ, ການຄຸ້ມຄອງອາວຸດ ແລະ ການຫ້າມນຳໃຊ້ອຸປະກອນທີ່ຜິດກົດໝາຍ ເພື່ອຮັກສາຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍຢູ່ໃນທ້ອງຖິ່ນ.
ຂ່າວ-ພາບ: ພຸດທະສິນ ວົງວິໄລທອງ
KPL
