ລົງນາມສັນຍາພັດທະນາໂຄງການໄຟຟ້າລົມ ວິລະອາດສະພອນ ຂະໜາດ 1.275 ເມກາວັດ ຢູ່ສະຫວັນນະເຂດ

18/11/2026 21:28
ຂປລ ຂປລ. ລັດຖະບານ ສປປ ລາວ ແລະ ຜູ້ພັດທະນາໂຄງການປະ ກອບມີ ບໍລິສັດ ນາແສງວາໂຍ ລົງທຶນ ແລະ ພັດທະນາຊັບພະຍາກອນທົດແທນ ຈຳກັດ ແລະ ບໍລິສັດ UPC Vietnam (Singapore) Pte. Ltd. ໄດ້ລົງນາມໃນສັນຍາການພັດທະນາໂຄງການ (PDA) ໄຟຟ້າພະລັງງານລົມ ວິລະອາດສະພອນ ຢູ່ແຂວງສະຫວັນນະເຂດ.

ພິທີລົງນາມຈັດຂຶ້ນໃນວັນທີ 17 ພະຈິກ 2026 ທີ່ໂຮງແຮມແລນມາກ ນະຄອນຫລວງວຽງຈັນ.

ພິທີລົງນາມຈັດຂຶ້ນໃນວັນທີ 17 ພະຈິກ 2026 ທີ່ໂຮງແຮມແລນມາກ ນະຄອນຫລວງວຽງຈັນ ໂດຍມີ ທ່ານ ນາງ ພອນວັນ ອຸທະວົງ ຮອງປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ, ພ້ອມດ້ວຍຜູ້ຕາງໜ້າຈາກລັດຖະບານ, ສະພາແຫ່ງຊາດ, ບັນດາກະຊວງ, ຄະ ນະກຳມະການ, ກົມກອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຄໍາສະຫວາດ ບຸນວິໄລ ຜູ້ອຳນວຍການ ບໍລິສັດ ນາແສງວາໂຍ ລົງທຶນ ແລະ ພັດທະນາຊັບພະຍາກອນທົດແທນ ຈຳກັດ .

ທ່ານ ຄໍາສະຫວາດ ບຸນວິໄລ ຜູ້ອຳນວຍການ ບໍລິສັດ ນາແສງວາໂຍ ລົງທຶນ ແລະ ພັດທະນາຊັບພະຍາກອນທົດແທນ ຈຳກັດ ໄດ້ກ່າວວ່າ: ສັນຍາ PDA ສະບັບນີ້ເປັນການສືບຕໍ່ຈາກບົດບັນທຶກຄວາມເຂົ້າໃຈ (MOU) ທີ່ລົງນາມໃນວັນທີ 13 ພະຈິກ 2023 ໂດຍກຳນົດກອບການຮ່ວມມືໃນການສຶກສາ ແລະ ກະກຽມພັດທະນາໂຄງການເປັນເວລາ 24 ເດືອນ ນັບແຕ່ວັນລົງນາມ ເພື່ອເປັນພື້ນຖານສຳລັບການຕັດສິນໃຈລົງທຶນໃນຂັ້ນຕໍ່ໄປ. ໂຄງການມີພື້ນທີ່ສຶກສາຢູ່ 3 ເມືອງ ຄື: ເມືອງວິລະບູລີ, ເມືອງອາດສະພອນ ແລະ ເມືອງພີນ ໂດຍມີກຳລັງການຕິດຕັ້ງລວມທີ່ຄາດໄວ້ປະມານ 1.275 ເມກາວັດ. ຂະໜາດ ແລະ ທີ່ຕັ້ງຂອງສິ່ງປຸກສ້າງຈະກຳນົດຕາມຜົນການປະເມີນຊັບພະຍາກອນລົມ, ສະພາບພື້ນທີ່, ຂໍ້ກຳນົດດ້ານສິ່ງແວດລ້ອມ-ສັງຄົມ ແລະ ຄວາມສາມາດໃນການເຊື່ອມຕໍ່ ແລະ ຈຳໜ່າຍໄຟຟ້າ. ໂຄງການມຸ່ງເນັ້ນນຳໃຊ້ທ່າແຮງລົມຂອງແຂວງສະຫວັນນະເຂດ ເພື່ອຜະລິດໄຟຟ້າສະອາດສະໜອງໃຫ້ຕະຫຼາດໃນພາກພື້ນ, ສົ່ງເສີມການຮ່ວມມືດ້ານພະລັງງານຂ້າມຊາຍແດນ ແລະ ສ້າງລາຍຮັບຈາກການສົ່ງອອກໃຫ້ແກ່ ສປປ ລາວ ເມື່ອມີເງື່ອນໄຂຄົບຖ້ວນ ແລະ ໂຄງ ການຖືກຈັດຕັ້ງປະຕິບັດ. ນອກນັ້ນ ຍັງຄາດວ່າຈະສ້າງວຽກເຮັດງານທຳ, ເພີ່ມຄວາມຕ້ອງການສິນຄ້າ ແລະ ບໍລິການທ້ອງຖິ່ນ ພ້ອມທັງສ້າງລາຍຮັບໃຫ້ແກ່ລັດຕາມລະບຽບການ.

ທ່ານ ແອນດຣູ ຊັດເທີແລນ ຜູ້ອຳນວຍການກຸ່ມບໍລິສັດ UPC Vietnam (Singapore) Pte. Ltd

ທ່ານ ແອນດຣູ ຊັດເທີແລນ ຜູ້ອຳນວຍການກຸ່ມບໍລິສັດ UPC Vietnam (Singapore) Pte. Ltd ກ່າວວ່າ: ໂຄງການນີ້ຈະຊ່ວຍເພີ່ມຄວາມໝັ້ນຄົງດ້ານພະລັງງານໃຫ້ແກ່ ສປປ ລາວ ໂດຍສະໜອງພະລັງງານສະອາດທີ່ຜະລິດພາຍໃນປະເທດ ແລະ ມີຄວາມໝັ້ນຄົງເຂົ້າສູ່ລະບົບຕາຂ່າຍໄຟຟ້າແຫ່ງຊາດ ພ້ອມສະໜັບສະໜູນເປົ້າໝາຍຂອງລາວໃນການກ້າວສູ່ການເປັນ “ໝໍ້ໄຟສີຂຽວແຫ່ງອາຊີຕາເວັນອອກສ່ຽງໃຕ້” (Green Battery of Southeast Asia).

ທ່ານກ່າວຕື່ມວ່າ ໃນດ້ານເສດຖະກິດ ໂຄງການນີ້ເປັນການລົງທຶນໂດຍກົງຈາກຕ່າງປະເທດໄລຍະຍາວທີ່ສຳຄັນ ໂດຍຄາດວ່າຈະສ້າງລາຍຮັບຈາກຄ່າພາກຫຼວງ ແລະ ພາສີອາກອນເຂົ້າງົບປະມານແຫ່ງຊາດຕະຫຼອດໄລຍະ 25 ປີຂ້າງໜ້າ. ສຳລັບປະຊາຊົນແຂວງສະຫວັນນະເຂດ ໂຄງການຈະສ້າງໂອກາດຈ້າງງານທີ່ຕ້ອງການທັກສະຫລາຍຮ້ອຍຕຳ ແໜ່ງໃນໄລຍະກໍ່ສ້າງ ແລະ ດຳເນີນງານ, ເພີ່ມໂອກາດໃຫ້ແກ່ທຸລະກິດ ແລະ ຜູ້ສະໜອງສິນຄ້າພາຍໃນປະເທດ ພ້ອມທັງລົງທຶນຢ່າງຍືນຍົງໃນພື້ນຖານໂຄງລ່າງຂອງຊຸມຊົນທ້ອງຖິ່ນ. ສິ່ງເຫລົ່ານີ້ຈະໄດ້ຮັບການສະ ໜັບສະໜູນເພີ່ມເຕີມຜ່ານຄຳໝັ້ນສັນຍາຂອງບໍລິສັດໃນການສະໜອງທຶນໃຫ້ແກ່ໂຄງການຄວາມຮັບຜິດຊອບຕໍ່ສັງຄົມ (CSR).

ທ່ານລະບຸວ່າ ໂຄງການທີ່ດີຕ້ອງອາໄສ 3 ປັດໄຈສຳຄັນ ຄື ຊັບພະຍາກອນ ທຳມະຊາດທີ່ອຸດົມສົມບູນ, ວຽກງານວິສະວະກຳທີ່ເຂັ້ມແຂງ ແລະ ການມີຄູ່ຮ່ວມມືທີ່ໜັກແໜ້ນ ເຊິ່ງໂຄງການວິລະອາດສະພອນມີຄົບທັງ 3 ປັດໄຈນີ້.
ພ້ອມກັນນັ້ນ, ບໍລິສັດຍັງໄດ້ໃຫ້ຄຳໝັ້ນສັນຍາວ່າ ຈະພັດທະນາໂຄງການດ້ວຍຄວາມໂປ່ງໃສ, ມີຄວາມຮັບຜິດຊອບ ແລະ ຍຶດຖືມາດຕະຖານສູງສຸດເທົ່າທີ່ຈະເປັນໄປໄດ້ ໂດຍຄຳນຶງເຖິງຜົນປະໂຫຍດໄລຍະຍາວຂອງປະຊາຊົນລາວ.
ໃນຂັ້ນຕໍ່ໄປ ຜູ້ພັດທະນາຈະສືບຕໍ່ວິເຄາະຂໍ້ມູນການວັດແທກລົມ, ປະເມີນຜົນຜະລິດໄຟຟ້າ, ສຳຫຼວດພູມສັນຖານ ແລະ ທໍລະນີວິທະຍາ ພ້ອມສຳເລັດການສຶກສາຄວາມເປັນໄປໄດ້ ແລະ ການອອກແບບພື້ນ ຖານ. ນອກນັ້ນ ຍັງຈະສຶກສາທາງເລືອກດ້ານກັງຫັນລົມ, ເສັ້ນທາງເຂົ້າໂຄງການ, ລະບົບໄຟຟ້າ ແລະ ສິ່ງປຸກສ້າງປະກອບ ຄວບຄູ່ກັບແຜນ ການເຊື່ອມຕໍ່, ການສົ່ງ ແລະ ຈຳໜ່າຍໄຟຟ້າ. ສ່ວນຈຸດເຊື່ອມຕໍ່ ແລະ ຕະຫລາດຮັບຊື້ໄຟຟ້າ ຈະກຳນົດຕາມຜົນການສຶກສາ, ຂໍ້ຕົກລົງ ແລະ ການອະນຸມັດທີ່ກ່ຽວຂ້ອງ.
KPL

ຂ່າວອື່ນໆ

ads
ads

Top