ຂປລ
ໂຮງຮຽນສອງພາສາ ລາວ-ຫວຽດນາມ ຫງວຽນຢູ ຈັດພິທີເປີດສົກຮຽນໃໝ່ 2026-2027 ຢ່າງເປັນທາງການຂຶ້ນໃນ ວັນທີ 14 ກັນຍາ 2026 ໂດຍມີ ທ່ານ ນາງ ນ້ຳທິບ ອິນທະວົງ ຜູ້ອຳນວຍການໂຮງຮຽນສອງພາສາ ລາວ-ຫວຽດນາມ ຫງວຽນຢູ, ທ່ານ ຫງວຽນ ມິງ ເຕີມ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳລາວ, ມີຜູ້ຕາງໜ້າຈາກກະຊວງສຶກສາທິການ ແລະ ກິລາ, ຜູ້ປົກຄອງ ແລະ ນ້ອງນັກຮຽນ ເຂົ້າຮ່ວມ.
ໃນໂອກາດນີ້, ທ່ານ ນາງ ນ້ຳທິບ ອິນທະວົງ ໄດ້ຍົກໃຫ້ເຫັນເຖິງຜົນສຳເລັດ ໃນສົກຮຽນຜ່ານມາ ຊຶ່ງສາມາດຍາດໄດ້ຜົນງານທີ່ໜ້າພາກພູມໃຈ ແລະ ເປັນຄັ້ງທຳອິດຂອງໂຮງຮຽນ ທີ່ໄດ້ຜົນງານອັນໂດດເດັ່ນ ເປັນຕົ້ນ ແມ່ນນັກຮຽນຈົບຊັ້ນທັງ 3 ຊັ້ນຮຽນ (ຊັ້ນປະຖົມ ປ5, ມັດທະຍົມຕອນຕົ້ນ ມ4 ແລະ ມັດທະຍົມຕອນປາຍ ມ7) ສາມາດຍາດໄດ້ປະກາສະນີຍະບັດແດງ ທັງໝົດ 16 ນ້ອງ, ອັດຕາສ່ວນນັກຮຽນສອບເສັງຈົບຊັ້ນ ຍາດໄດ້ຄະແນນ 9 ຂຶ້ນໄປທຸກວິຊາກວມ 10%, ໄດ້ຄະແນນຮອບດ້ານກວມ 70%, ນັກຮຽນເກັ່ງຂັ້ນນະຄອນຫຼວງ ສາມາດຍາດໄດ້ລາງວັນຊົມເຊີຍ 3 ນ້ອງ, ນັກຮຽນເກັ່ງຂັ້ນເມືອງ ໄດ້ຮັບລາງວັນທີ 2, ທີ 3 ແລະ ລາງວັນຊົມເຊີຍ 19 ນ້ອງ, ອັດຕາສ່ວນນັກຮຽນເລື່ອນຊັ້ນໃນທຸກຂັ້ນຮຽນ ບັນລຸໄດ້ 99,90%, ນັກຮຽນຊັ້ນ ມ7 ໄດ້ຮຽນຕໍ່ໃນລະດັບອາຊີວະສຶກສາ ແລະ ມະຫາວິທະຍາໄລ. ໃນນັ້ນ, ໄດ້ຮັບທຶນການສຶກສາຮູບແບບຕ່າງໆ ເພື່ອໄປຮຽນຕໍ່ມະຫາວິທະຍາໄລຢູ່ ສສ ຫວຽດນາມ ກວມ 50%, ຄູ-ອາຈານ ໄດ້ຮັບການຍ້ອງຍໍຄູດີເດັ່ນ ກວມ 85%, ຄູ-ອາຈານ ສາມາດນຳໃຊ້ພາສາຫວຽດນາມ ໄດ້ຢ່າງຄ່ອງແຄ້ວ ກວມ 50%. ນອກຈາກນີ້, ຍັງສາມາດຍາດໄດ້ລາງວັນດີເດັ່ນ ໃນກິດຈະກຳນອກຫຼັກສູດ ສິລະປະ-ກິລາ ໃນຂັ້ນເມືອງ-ນະຄອນຫຼວງ, ໄດ້ຮັບນາມມະຍົດໂຮງຮຽນ “ສີຂຽວ-ສະອາດ-ສິ່ງແວດລ້ອມດີ” ແລະ “ປອດສິ່ງເສບຕິດ” ຕິດຕໍ່ກັນຫຼາຍປີ. ນອກຈາກສົ່ງເສີມການຮຽນ-ການສອນແລ້ວ, ຍັງໄດ້ຈັດກິດຈະກຳສົ່ງເສີມສາຍພົວພັນຕ່າງປະເທດທີ່ສຳຄັນ ເຊັ່ນ: ການຕ້ອນຮັບຄະນະຜູ້ແທນສາກົນ, ຜູ້ນຳຂັ້ນສູງ, ໃຫ້ນັກຮຽນເຂົ້າຮ່ວມຕັ້ງຄ້າຍເຍົາວະຊົນລະດູຮ້ອນສາກົນ ແລະ ການເຂົ້າຮ່ວມກິດຈະກຳຊຸມຊົນ-ກິດຈະກຳສັງຄົມ. ຜົນງານເຫຼົ່ານີ້ ບໍ່ພຽງແຕ່ສະທ້ອນໃຫ້ເຫັນເຖິງຄວາມພະຍາຍາມຂອງຄະນະຄູ-ອາຈານ ແລະ ບຸກຄະລາກອນໃນໂຮງຮຽນເທົ່ານັ້ນ, ແຕ່ຍັງສະແດງໃຫ້ເຫັນເຖິງຄວາມໄວ້ວາງໃຈ, ຄຽງບ່າຄຽງໄຫຼ່ຂອງຜູ້ປົກຄອງ ແລະ ການນຳພາ-ຊີ້ນຳຢ່າງໃກ້ຊິດຈາກບັນດາການນຳທຸກຂັ້ນ.
ສຳລັບສົກຮຽນ 2026-2027 ເປັນສົກຮຽນທີ່ມີຄວາມສຳຄັນ ໃນການຈັດຕັ້ງປະຕິບັດແຜນຍຸດທະສາດການພັດທະນາໂຮງຮຽນ ໄລຍະ 2026-2032 ໂຮງຮຽນຈະສືບຕໍ່ຍຶດໝັ້ນ 3 ລັກສະນະ, 5 ຫຼັກມູນການສຶກສາ ແລະ 3 ເນື້ອໃນຂໍ້ແຂ່ງຂັນ ທີ່ກະຊວງສຶກສາທິການ ແລະ ກິລາ ວາງອອກ; ພ້ອມທັງເຊື່ອມຊຶມ ແລະ ຈັດຕັ້ງປະຕິບັດຕາມແນວທາງນະໂຍບາຍ ຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມ ກ່ຽວກັບການປະຕິຮູບການສຶກສາ ຢ່າງຮອບດ້ານຂອງຂະແໜງການສຶກສາຫວຽດນາມ ໃນປັດຈຸບັນ ຫັນປ່ຽນຈາກການຖ່າຍທອດຄວາມຮູ້ ໄປສູ່ການພັດທະນາຄຸນສົມບັດ ແລະ ຄວາມສາມາດ; ສົ່ງເສີມວິທະຍາສາດ, ເຕັກໂນໂລຊີ, ນະວັດຕະກຳ, ການຫັນເປັນດິຈິຕອນ ແລະ ສ້າງຊັບພະຍາກອນມະນຸດທີ່ມີຄຸນນະພາບສູງ; ຫັນເປັນມາດຕະຖານ, ທັນສະໄໝ ແລະ ເຊື່ອມໂຍງກັບພາກພື້ນ ແລະ ສາກົນ.
ສ່ວນທິດທາງແຜນການ ໄດ້ກຳນົດ 5 ຈຸດປະສົງ ແລະ ເປົ້າໝາຍສຳຄັນຕົ້ນຕໍ ຂອງສົກຮຽນ 2026-2027 ຄື: ຍົກສູງຄຸນນະພາບການສຶກສາຢ່າງແທ້ຈິງ; ສ້າງບຸກຄະລາກອນ ໃຫ້ມີຄວາມສາມາດ ແລະ ມີທັດສະນະໃນການປະຕິຮູບການສຶກສາ; ການຫັນເປັນດິຈິຕອນຢ່າງຮອບດ້ານ, ມຸ່ງໄປສູ່ຮູບແບບ ໂຮງຮຽນດິຈິຕອນ (Digital School) ທີ່ທັນສະໄໝ; ສ້າງວັດທະນະທຳໂຮງຮຽນ “ໂຮງຮຽນແຫ່ງຄວາມສຸກ”; ຍົກສູງຖານະບົດບາດ ແລະ ຊື່ສຽງ ຂອງໂຮງຮຽນ ຫງວຽນຢູ.
ຂ່າວ-ພາບ: ກິດຕາ
KPL
