ຂປລ. ໃນໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ຍົກໃຫ້ເຫັນເນື້ອໃນມະຕິຄົບຄະນະບໍລິຫານງານພັກ ສະໄໝXII ເປັນຕົ້ນແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາໃນໄລຍະ 6 ເດືອນຕົ້ນ ປີ 2026 ແມ່ນໄດ້ດໍາເນີນໃນສະພາບພາກພື້ນ ແລະ ສາກົນມີຄວາມທ້າທາຍສົມຄວນ ໂດຍສະເພາະຄວາມຂັດແຍ່ງທາງດ້ານການຄ້າ, ບັນຫາຄວາມບໍ່ສະຫງົບຢູ່ຕາເວັນອອກກາງ ທີ່ກະທົບໃສ່ເສດຖະກິດພາຍໃນຂອງປະເທດເຮົາ ເປັນຕົ້ນການສະໜອງນໍ້າມັນເຊື້ອໄຟບໍ່ພຽງພໍ, ລາຄານໍ້າມັນເຊື້ອໄຟ, ລາຄາສິນຄ້າ, ຄ່າຄອງຊີບສູງຂຶ້ນ ແລະ ໄພທໍາມະຊາດຕ່າງໆແຕ່ພາຍໃຕ້ການນຳພາ-ຊີ້ນຳຢ່າງໃກ້ຊິດຂອງສູງກາງພັກ ການພັດທະນາເສດຖະກິດ-ສັງຄົມຍັງສືບຕໍ່ດໍາເນີນໄປຢ່າງຕໍ່ເນື່ອງ, ສາມາດບັນລຸຄາດໝາຍທີ່ວາງອອກໄດ້ຫລາຍດ້ານ; ກອງປະຊຸມໄດ້ເຫັນດີເປັນເອກະພາບວາງທິດທາງວຽກງານຈຸດສຸມ ໃນການນຳພາ-ຊີ້ນຳຂອງກົມການເມືອງ ແລະ ຄະນະເລຂາທິການສູນກາງພັກ ໃນໄລຍະ 6 ເດືອນທ້າຍປີ 2026. ສຳລັບທິດທາງແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ 6 ເດືອນທ້າຍປີ 2026 ແມ່ນສ້າງ ຄວາມເຂັ້ມແຂງໃຫ້ຄັງສຳຮອງເງິນຕາຕ່າງປະເທດ, ສ້າງຖານລາຍຮັບໃໝ່; ດຶງດູດການລົງທຶນທັງພາຍໃນ ແລະ ຕ່າງປະເທດ, ຍູ້ແຮງຂະບວນການຜະລິດເປັນສິນຄ້າ; ຫັນການຈັດເກັບລາຍຮັບ-ຄຸ້ມຄອງລາຍຈ່າຍງົບປະມານເຂົ້າສູ່ ລະບຽບການ ແລະ ເປັນທັນສະໄໝ;  ສ້າງເສດຖະກິດປາຍແຫລມ, ເສີມຂະຫຍາຍທ່າແຮງຂອງບັນດາພາກສ່ວນເສດຖະກິດ; ສືບຕໍ່ປະຕິຮູບລັດວິສາຫະກິດ, ປັບປຸງພື້ນຖານໂຄງລ່າງ, ຖະໜົນຫົນທາງ, ແກ້ໄຂການປະລະການຮຽນ, ຂາດແຄນຄູສອນ, ບັນຫາແຮງງານ, ການບໍລິການ ດ້ານສາທາລະນະສຸກ, ປະກົດການ ຫຍໍ້ທໍ້ໃນສັງຄົມ ແລະ ການສ້າງ ແຜນຮັບມືໄພພິບັດທີ່ອາດຈະເກີດ ຂຶ້ນ. ນອກຈາກນີ້, ຍັງຍົກໃຫ້ເຫັນ ເຖິງວຽກງານກໍ່ສ້າງຮາກຖານ ການເມືອງ, ວຽກງານພັດທະນາ ຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ຊຶ່ງຄະນະບໍລິຫານງານສູນກາງພັກໄດ້ຕີລາຄາວ່າ ມາຮອດປັດຈຸບັນນີ້, ຮາກຖານການເມືອງໄດ້ຮັບການປັບປຸງ ແລະ ມີຄວາມໜັກແໜ້ນ-ເຂັ້ມແຂງເທື່ອລະກ້າວ, ຊົນນະບົດໄດ້ຮັບການພັດທະນາດີຂຶ້ນ; ຄວາມທຸກຍາກໄດ້ຮັບການແກ້ໄຂ, ຄອບຄົວທຸກຍາກຫລຸດລົງ, ຄອບຄົວ ແລະ ບ້ານພັດທະນາເພີ່ມຂຶ້ນ; ການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນມີຄວາມຈະແຈ້ງຂຶ້ນກວ່າເກົ່າ; ສືບຕໍ່ຊີ້ນຳບັນຫາຕ່າງໆ ໃຫ້ໄດ້ຮັບການແກ້ໄຂ ແລະ ຕົກໄປເປັນກ້າວໆ ເປັນຕົ້ນແມ່ນບັນຫາຄວາມຫຍຸ້ງຍາກດ້ານເສດຖະກິດ-ການເງິນ, ຮັບປະກັນບໍ່ໃຫ້ຂາດແຄນນໍ້າມັນເຊື້ອໄຟ, ຄຸ້ມຄອງລາຄາສິນຄ້າ, ຄ່າຄອງຊີບ ແລະ ອັດຕາແລກປ່ຽນໃຫ້ສະຫງົບ ແລະ ບໍ່ສົ່ງຜົນກະທົບຫລາຍຕໍ່ເສດຖະກິດ ແລະ ຊີວິດການເປັນຢູ່ຂອງປະຊາຊົນ; ສຸມໃສ່ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ ຢາເສບຕິດ, ລັກລອບຂຸດຄົ້ນແຮ່ທາດ ແລະ ຊັບພະຍາກອນທຳມະຊາດ, ການຄ້າ-ຂາຍອາວຸດ, ກຸ່ມແກ້ງສະແກມເມີ, ຄໍເຊັນເຕີ, ປຸ້ນຈີ້ຊີງຊັບ, ອຸບັດເຫດຕາມທ້ອງຖະໜົນ.

    ໃນໂອກາດນີ້, ສະຫາຍ ວັນສີ ກົວມົວ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ກໍໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ຄະນະໂຄສະນາອົບຮົມສູນກາງພັກ; ທ່ານ ຄຳມອນ ຈັນທະຈິດ ກຳມະການສຳຮອງສູນ ກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ກໍໄດ້ເຜີຍແຜ່ມະຕິກ່ຽວກັບວຽກງານກໍ່ສ້າງຮາກຖານການເມືອງ ແລະ ທ່ານ ສາຄອນ ພົມມະລາດ ກຳມະການປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ກໍໄດ້ເຜີຍແຜ່ແຜນພັດທະນາວຽກງານໂຄສະນາອົບຮົມ.

    ພ້ອມກັນນີ້, ກໍໄດ້ມີການປະກາດກົງຈັກການຈັດຕັ້ງພະນັກງານບໍລິ ຫານ ຂັ້ນ 3 ແລະ ຂັ້ນ 4 ພາຍໃນຄະນະໂຄສະນາອົບຮົມສູນກາງພັກ. ໃນນີ້, ຕຳແໜ່ງບໍລິຫານປະເພດ 3 ມີ 5 ສະຫາຍ, ຍິງ 1 ສະຫາຍຄື: ສະຫາຍ ສົດ ວົງພະຈັນ ຫົວໜ້າພະແນກການເງິນ ເປັນຮອງຫົວໜ້າຫ້ອງການ, ສະຫາຍ ລິດສະໄໝ ເພັງສະຫວັນ ຫົວໜ້າພະແນກນະໂຍບາຍ ແລະ ຍ້ອງຍໍ ເປັນຮອງຫົວໜ້າກົມຈັດຕັ້ງ, ສະຫາຍ ບຸນຊູ ວື ຫົວໜ້າພະແນກກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫລວງເປັນຮອງຫົວໜ້າກົມກວດກາ, ສະຫາຍ ນາງ ກີຄໍາ ແກ່ນມະນີ ຫົວໜ້າພະແນກຝຶກອົບຮົມ ເປັນຮອງຫົວໜ້າກົມອົບຮົມ, ສະຫາຍ ປັນຍາສິດ ທຳມະວົງສາ ຫົວໜ້າພະແນກຂ່າວພາຍໃນ ເປັນຮອງຫົວໜ້າບັນນາທິການໃຫຍ່ໜັງສືພິມພາສາຕ່າງປະເທດ ແລະ ຕຳແໜ່ງບໍລິຫານປະເພດ 4  ຂັ້ນຫົວໜ້າພະແນກ ມີ 10 ສະຫາຍ, ຍິງ 4 ສະຫາຍ.

ຂ່າວ: ກິດຕາ; ພາບ: ອ່າຍຄຳ

KPL