ຂປລ
ພິທີປະກາດສ້າງຕັ້ງ ໂຮງຮຽນມັດທະຍົມຕົ້ນສົງ ເມືອງເງິນ ແຂວງໄຊຍະບູລີ ຈັດຂຶ້ນໃນວັນທີ 3 ກັນຍາ 2026 ຢູ່ວັດສະຫຼີດອນແກ້ວ ບ້ານແກ້ວດອນຄູນ ເມືອງເງິນ ແຂວງໄຊຍະບູລີ ໂດຍມີພະອາຈານໃຫຍ່ ພັນທອງ ໂພມີໄຊ ຄະນະປະຈຳສູນກາງ ອົງການພຸດທະສາສະໜາສຳພັນລາວ (ອພສ), ຮອງຫົວໜ້າກຳມາທິການສຶກສາສົງສູນກາງ ແລະ ທ່ານ ອິນເນດ ຂຽວສີຟ້າ ຮອງເລຂາພັກເມືອງ, ປະທານຄະນະກຳມະການອົງການປົກຄອງເມືອງເງິນ, ມີພະເຖຣານຸເຖຣະ ຈາກສູນກາງ, ແຂວງ, ເມືອງ, ຄະນະນຳຂອງເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທັງນີ້, ກໍເພື່ອເປັນການຂະຫຍາຍໂອກາດທາງດ້ານການສຶກສາ ໃຫ້ແກ່ພະພິກຂຸສົງ-ສາມະເນນ ໃນທ້ອງຖິ່ນ, ເປີດໂອກາດໃຫ້ໄດ້ສຶກສາທັງທາງທຳ (ຫຼັກທຳຄຳສອນ) ແລະ ທາງໂລກ (ວິຊາສາມັນ) ຄວບຄູ່ກັນໄປ. ພ້ອມນີ້, ຍັງເປັນການສ້າງບຸກຄະລາກອນທີ່ມີຄຸນນະພາບ ທັງດ້ານຄວາມຮູ້ ແລະ ຄຸນສົມບັດ ມາຊ່ວຍພັດທະນາປະເທດຊາດ ແລະ ສືບທອດພະພຸດທະສາສະໜາ.
ທ່ານ ບຸນລົດ ສີຖາວອນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ໃຫ້ຮູ້ວ່າ: ການສຶກສາຂອງພະສົງ-ສາມະເນນພາຍໃນເມືອງເງິນ ໃນໄລຍະຜ່ານມາ ແມ່ນໄດ້ເຂົ້າຮຽນຮ່ວມກັບສຶກສາຝ່າຍໂລກ ຊຶ່ງມີຄວາມຫຍຸ້ງຍາກ, ບໍ່ໄດ້ຮຽນຫຼັກສູດສາຍພຸດທະສາສະໜາ ເປັນຕົ້ນແມ່ນວິຊາທຳມະ-ປາລີ-ວິໄນ ຊຶ່ງເປັນວິຊາຫຼັກຂອງພະສົງ-ສາມະເນນ. ໃນໄລຍະຜ່ານມາ, ນັກຮຽນທີ່ເປັນພະສົງ-ສາມະເນນທີ່ຢູ່ຕາມວັດຕ່າງໆພາຍໃນເທສະບານເມືອງເງິນ ແມ່ນໄດ້ໄປເຂົ້າຮຽນທີ່ໂຮງຮຽນມັດທະຍົມສົມບູນເມືອງເງິນ ແລະ ໂຮງຮຽນມັດທະຍົມສົມບູນນໍ້າເງິນ ຮ່ວມກັບອອກຕົນຍາດໂຍມ ລວມທັງຍິງ-ຊາຍໃນໂຮງຮຽນສາມັນຝ່າຍນອກ, ແຕ່ມີຈຳນວນໜຶ່ງກໍໄດ້ໄປຮຽນຕໍ່ຢູ່ໂຮງຮຽນສົງຢູ່ຕ່າງເມືອງ, ຕ່າງແຂວງທີ່ມີໂຮງຮຽນສົງ ຍ້ອນໂຮງຮຽນສົງສະເພາະຢູ່ໃນເມືອງເງິນຍັງບໍ່ທັນມີ. ໃນສົກຮຽນ 2020-2021 ອພສ ເມືອງ ໄດ້ສົມທົບກັບຫ້ອງການສຶກສາທິການ ແລະ ກິລາເມືອງ, ອົງການປົກຄອງເມືອງ ແລະ ພາກສ່ວນກ່ຽວຂ້ອງ ເຫັນດີເປັນເອກະພາບເປີດຫ້ອງຮຽນສົງ ຢູ່ວັດສະຫຼີດອນແກ້ວ ຂຶ້ນກັບໂຮງຮຽນ ມສ ເມືອງເງິນ ແລະ ໄດ້ສະເໜີສ້າງຕັ້ງເປັນໂຮງຮຽນມັດທະຍົມຕົ້ນສົງ ເມືອງເງິນ. ມາຮອດສົກຮຽນ 2025-2026 ຈຶ່ງໄດ້ຮັບອະນຸມັດສ້າງຕັ້ງຂຶ້ນ ແລະ ມື້ນີ້ກໍໄດ້ຈັດພິທີປະກາດສ້າງຕັ້ງ ໂຮງຮຽນມັດທະຍົມຕົ້ນສົງ ເມືອງເງິນ ແຂວງໄຊຍະບູລີ ຢ່າງເປັນທາງການ.
ໂຮງຮຽນມັດທະຍົມຕອນຕົ້ນສົງ ເມືອງເງິນ ປະກອບມີ ອາຄານຮຽນ 1 ຫຼັງ, ມີ 6 ຫ້ອງ, ເປັນອາຄານຖາວອນ ໃຊ້ເປັນຫ້ອງຮຽນ 4 ຫ້ອງ, ຫ້ອງການ 1 ຫ້ອງ, ຫ້ອງຄອມພິວເຕີ 1 ຫ້ອງ, ມີຄອມພິວເຕີຈຳນວນ 12 ຊຸດ, ເຄື່ອງປຣິນເອກະສານ 3 ໜ່ວຍ, ເຄື່ອງ LCD 1 ຊຸດ, ມີຫ້ອງນໍ້າຖາວອນ 6 ຫ້ອງ, ມີລະບົບໄຟຟ້າໃນອາຄານຄົບຊຸດ. ປັດຈຸບັນ (ສົກຮຽນ 2026-2027) ມີຄູສອນ ທັງໝົດ 8 ທ່ານ, ເປັນພະສົງ 3 ອົງ, ຄະລຶຫັດ 5 ຄົນ, ຍິງ 2 ຄົນ, ມີນັກຮຽນທັງໝົດ 66 ອົງ. ໃນນັ້ນ, ຂັ້ນ ມ1 ມີ 1 ຫ້ອງ ມີນັກຮຽນ 26 ອົງ, ມ2 ມີ 1 ຫ້ອງ ມີນັກຮຽນ 18 ອົງ, ມ3 ມີ 1 ຫ້ອງ ມີນັກຮຽນ 8 ອົງ ແລະ ມ4 ມີ 1 ຫ້ອງ ມີນັກຮຽນ 14 ອົງ.
ໂອກາດດຽວກັນນີ້, ຄະນະກຳມາທິການເຜີຍແຜ່ສີລະທຳ ແລະ ປະຕິບັດກຳມະຖານ ນະຄອນຫຼວງວຽງຈັນ ກໍໄດ້ມອບອຸປະກອນການຮຽນ-ການສອນ ແລະ ທຶນການສຶກສາຈຳນວນໜຶ່ງໃຫ້ແກ່ນັກຮຽນພາຍໃນໂຮງຮຽນດັ່ງກ່າວ.
KPL
