ທ່ານ ນາງ ນ້ຳທິບ ອິນທະວົງ ຮັກສາການຜູ້ອຳນວຍການໂຮງຮຽນສອງພາສາ ລາວ-ຫວຽດນາມ ຫງວຽນຢູ ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 4 ກັນຍາ 2026 ນີ້ວ່າ: ໃນສົກຮຽນໃໝ່ 2026-2027 ນີ້, ໂຮງຮຽນສອງພາສາ ລາວ-ຫວຽດນາມ ຫງວຽນຢູ ໄດ້ມີຄວາມພ້ອມຮອບດ້ານ ໂດຍໄດ້ກຳນົດທິດທາງ ແລະ ວຽກງານຈຸດສຸມທີ່ສຳຄັນຫຼາຍດ້ານ ເປັນຕົ້ນ ຍຶດໝັ້ນຍົກສູງຄຸນນະພາບການສຶກສາຮອບດ້ານເປັນຫຼັກ ອີງຕາມ 3 ລັກສະນະ 5 ຫຼັກມູນ ແລະ 3 ຂໍ້ແຂ່ງຂັນ ທີ່ກະຊວງສຶກສາທິການ ແລະ ກິລາ ວາງອອກ ໂດຍເນັ້ນໃຫ້ ຄູ-ອາຈານ ສຸມໃສ່ພັດທະນາຕົນເອງ, ຫັນເອົາການຮຽນ-ການສອນ ເປັນທັນສະໄໝ ເພື່ອຖ່າຍທອດຄວາມຮູ້ ໃຫ້ນັກຮຽນໄດ້ຢ່າງມີປະສິດທິພາບ, ນອກຈາກປະຕິບັດຕາມຫຼັກສູດການຮຽນ-ການສອນ ທີ່ກະຊວງສຶກສາທິການ ແລະ ກິລາ ວາງອອກແລ້ວ, ໂຮງຮຽນ ຍັງໄດ້ເນັ້ນການສອນພາສາຫວຽດນາມ ເປັນຫຼັກ ເພື່ອເຮັດໃຫ້ນັກຮຽນ ທີ່ຮຽນຈົບຈາກໂຮງຮຽນດັ່ງກ່າວ ສາມາດຟັງ, ເວົ້າ ແລະ ຂຽນພາສາຫວຽດນາມ ໄດ້ໂດຍພື້ນຖານ, ພ້ອມທັງສົ່ງເສີມສຶກສາອົບຮົມນັກຮຽນ ໃຫ້ຮູ້ຈັກຮັກສາ ແລະ ສືບທອດເອກະລັກທາງດ້ານວັດທະນະທຳ ຄຽງຄູ່ກັບການເສີມຂະຫຍາຍສາຍພົວພັນມິດຕະພາບແບບພິເສດ ຂອງ 2 ຊາດ ລາວ-ຫວຽດນາມ. ພ້ອມນີ້, ໂຮງຮຽນ ຍັງມຸ່ງໝັ້ນສ້າງສະພາບແວດລ້ອມການສຶກສາທີ່ປອດໄພ, ມີລະບຽບວິໄນ, ມີມະນຸດສະທຳ ແລະ ທັນສະໄໝ, ຍຶດຖືນັກຮຽນເປັນໃຈກາງ ໂດຍໃຫ້ຄວາມສຳຄັນຕໍ່ການພັດທະນາຄຸນສົມບັດ, ຄວາມສາມາດ, ທັກສະ ແລະ ຈິດໃຈການເຊື່ອມໂຍງສູ່ສາກົນຂອງນັກຮຽນ.

ທ່ານ ນາງ ນ້ຳທິບ ອິນທະວົງ ໄດ້ກ່າວອີກວ່າ: ດ້ວຍນ້ຳໃຈແຫ່ງຄວາມສາມັກຄີ, ການປ່ຽນແປງໃໝ່, ຄວາມຮັບຜິດຊອບ ແລະ ຄວາມມຸ່ງໝັ້ນຢ່າງໜັກແໜ້ນ, ຄະນະບໍລິຫານ, ຄູ-ອາຈານ ແລະ ພະນັກງານທຸກຄົນ ຂອງໂຮງຮຽນ ຈະພ້ອມໃຈກັນມຸ່ງໝັ້ນປະຕິບັດໜ້າທີ່ວຽກງານ ກໍຄື ການຮຽນ-ການສອນ ໃນສົກຮຽນ 2026-2027 ໃຫ້ປະສົບຜົນສຳເລັດ ແລະ ບັນລຸຕາມເປົ້າໝາຍທີ່ວາງໄວ້, ສົມກັບຄວາມໄວ້ວາງໃຈຂອງພໍ່ແມ່-ຜູ້ປົກຄອງ, ນັກຮຽນ ແລະ ສັງຄົມ, ພ້ອມທັງວາງຮາກຖານອັນໝັ້ນຄົງ ເພື່ອການພັດທະນາໂຮງຮຽນແບບຍືນຍົງໃນອະນາຄົດ.

ຂ່າວ-ພາບ: ທະນູທອງ

KPL