ຂປລ
ແຫຼ່ງຂ່າວຈາກແຂວງສະຫວັນນະເຂດ ໃຫ້ຮູ້ວ່າ: ໃນວັນທີ 8 ກັນຍາ 2026, ທ່ານ ບຸນລັດ ລໍບານເຢັນ ເລຂາພັກເມືອງອາດສະພອນ ພ້ອມດ້ວຍພາກສ່ວນກ່ຽວຂ້ອງ ລົງພື້ນທີ່ຕິດຕາມ ແລະ ກວດເບິ່ງສະພາບນໍ້າຖ້ວມຢູ່ຕາມເສັ້ນທາງສາຍບ້ານທາດດອກແກ້ວ ຫາ ບ້ານຜັກຂະຫຍ່າ ບໍລິເວນຂົວຫ້ວຍພຸງ ແລະ ເສັ້ນທາງຈາກບ້ານທາດດອກແກ້ວ ຫາ ບ້ານດົງນາງາມ. ການລົງຕິດຕາມຄັ້ງນີ້, ກໍເພື່ອກວດກາ ແລະ ຕິດຕາມສະພາບນໍ້າຖ້ວມຢ່າງໃກ້ຊິດ ພ້ອມທັງປະເມີນສະພາບຄວາມເສຍຫາຍຂອງເສັ້ນທາງ, ຂົວ ແລະ ພື້ນຖານໂຄງລ່າງອື່ນໆ ທີ່ອາດໄດ້ຮັບຜົນກະທົບຈາກນໍ້າຖ້ວມ.
ພ້ອມນີ້, ການນໍາເມືອງຍັງໄດ້ສະແດງຄວາມເປັນຫ່ວງເປັນໄຍຕໍ່ການເດີນທາງຂອງພີ່ນ້ອງປະຊາຊົນ ໂດຍສະເພາະ ໃນຈຸດທີ່ຍັງມີນໍ້າຖ້ວມຂັງ ແລະ ຈຸດທີ່ເສັ້ນທາງ ຫຼື ຂົວອາດມີຄວາມສ່ຽງ.
ຈາກການຕິດຕາມສະພາບຫຼ້າສຸດ ມາຮອດວັນທີ 9 ກັນຍາ 2026 ສະພາບນໍ້າຖ້ວມໂດຍລວມໃນພື້ນທີ່ເມືອງອາດສະພອນ ແມ່ນມີທ່າອ່ຽງດີຂຶ້ນ ເຮັດໃຫ້ລະດັບນໍ້າໄດ້ຫຼຸດລົງຫຼາຍແລ້ວ, ສະພາບຝົນຕົກກໍໄດ້ຫຼຸດລົງ ເຮັດໃຫ້ເສັ້ນທາງຫຼາຍສາຍ ສາມາດໃຫ້ພາຫະນະ ແລະ ປະຊາຊົນສັນຈອນໄປ-ມາໄດ້ຕາມປົກກະຕິ.
ເຖິງແນວໃດກໍຕາມ, ບາງຈຸດທີ່ເຄີຍຖືກນໍ້າຖ້ວມອາດຍັງມີສະພາບດິນອ່ອນ, ເປັນຂີ້ຕົມ ຫຼື ມີຄວາມເສຍຫາຍບາງສ່ວນຂອງໜ້າທາງ ແລະ ໂຄງສ້າງຂົວ. ດັ່ງນັ້ນ, ພາກສ່ວນກ່ຽວຂ້ອງຍັງຈະສືບຕໍ່ຕິດຕາມສະພາບຢ່າງໃກ້ຊິດ ແລະ ກວດກາຈຸດທີ່ເສຍຫາຍ ເພື່ອວາງແຜນສ້ອມແປງ ແລະ ຟື້ນຟູໃຫ້ສາມາດນໍາໃຊ້ໄດ້ຢ່າງປອດໄພ ແລະ ສະດວກແກ່ປະຊາຊົນ.
KPL
