ຂປລ
ວັນທີ 31 ສິງຫາ 2026 ຜ່ານມາ, ທ່ານ ສົມບູນ ສີຫານາດ ຫົວໜ້າກົມເສດຖະກິດ, ກະຊວງການຕ່າງປະເທດ, ໃນນາມປະທານສະພາບໍລິຫານງານສະຖາບັນແມ່ນໍ້າຂອງ ໄດ້ເຂົ້າຮ່ວມງານສະເຫຼີມສະຫຼອງ ຄົບຮອບ 30 ປີ ແຫ່ງການສ້າງຕັ້ງສະຖາບັນແມ່ນໍ້າຂອງ ທີ່ຂອນແກ່ນ, ປະເທດໄທ ໂດຍມີສະມາຊິກສະພາບໍລິຫານງານສະຖາບັນແມ່ນໍ້າຂອງ, ສະມາຊິກຄະນະປະຈໍາສະຖາບັນແມ່ນໍ້າຂອງ, ຜູ້ຕາງໜ້າຈາກສະຖານກົງສຸນໃຫຍ່ ຂອງບັນດາປະເທດສະມາຊິກອະນຸພາກພື້ນແມ່ນໍ້າຂອງ (GMS) ທີ່ຂອນແກ່ນ, ຄູ່ຮ່ວມງານ, ຄູ່ຮ່ວມພັດທະນາ ແລະ ພະນັກງານຂອງສະຖາບັນດັ່ງກ່າວ ເຂົ້າຮ່ວມ.
ການສະເຫຼີມສະຫຼອງຄັ້ງນີ້, ຈັດຂຶ້ນພາຍໃຕ້ຫົວຂໍ້ “People-Partnership-Progress” ຊຶ່ງສະທ້ອນໃຫ້ເຫັນເຖິງການປະຕິບັດງານຂອງສະຖາບັນແມ່ນໍ້າຂອງ ໃນການພັດທະນາຊັບພະຍາກອນມະນຸດ, ສົ່ງເສີມການຮ່ວມມື ແລະ ເສີມຂະຫຍາຍຄວາມກ້າວໜ້າຢູ່ອະນຸພາກພື້ນແມ່ນໍ້າຂອງ.
ໃນໂອກາດດັ່ງກ່າວ, ທ່ານ ສົມບູນ ສີຫານາດ ໄດ້ຂຶ້ນກ່າວຄໍາເຫັນ ເພື່ອສະແດງຄວາມຊົມເຊີຍຕໍ່ ສະຖາບັນແມ່ນໍ້າຂອງ ທີ່ໄດ້ປະກອບສ່ວນສໍາຄັນເຂົ້າໃນການພັດທະນາ ແລະ ການຮ່ວມມືໃນອະນຸພາກພື້ນແມ່ນໍ້າຂອງ ຕະຫຼອດໄລຍະ 30 ປີ ຜ່ານມາ ແລະ ຍັງໄດ້ສະແດງຄວາມຂອບໃຈຕໍ່ບັນດາຜູ້ກໍ່ຕັ້ງ, ຜູ້ອໍານວຍການສະຖາບັນແມ່ນໍ້າຂອງ ໃນແຕ່ລະໄລຍະ, ຕະຫຼອດຮອດບັນດາພະນັກງານຂອງສະຖາບັນແມ່ນໍ້າຂອງ ທີ່ໄດ້ເອົາໃຈໃສ່ຢ່າງຕັ້ງໜ້າ ໃນການປະຕິບັດໜ້າທີ່ຂອງຕົນ ດ້ວຍຄວາມເສຍສະຫຼະ, ມີຫົວຄິດປະດິດສ້າງ ແລະ ມີຄວາມຮັບຜິດຊອບສູງ, ພ້ອມທັງໄດ້ສະແດງຄວາມຂອບໃຈຕໍ່ບັນດາຄູ່ຮ່ວມງານ, ຄູ່ຮ່ວມພັດທະນາ ແລະ ອົງການຈັດຕັ້ງອື່ນໆ ທີ່ໄດ້ໃຫ້ການສະໜັບສະໜູນ ແລະ ການຮ່ວມມືທີ່ດີຕະຫຼອດມາ. ນອກນັ້ນ, ຍັງໄດ້ຢືນຢັນຄືນຄວາມໝາຍໝັ້ນ ທີ່ ສປປ ລາວ ຈະສືບຕໍ່ຊຸກຍູ້ ແລະ ໃຫ້ການຮ່ວມມືແກ່ສະຖາບັນແມ່ນໍ້າຂອງ ໃນປັດຈຸບັນ ກໍຄື ໃນຕໍ່ໜ້າ ໂດຍສະເພາະ ໃນໄລຍະທີ່ ສປປ ລາວ ປະຕິບັດໜ້າທີ່ປະທານສະພາບໍລິຫານງານສະຖາບັນແມ່ນໍ້າຂອງ.
ພ້ອມນີ້, ຍັງມີຜູ້ຕາງໜ້າຈາກສະຖານກົງສຸນໃຫຍ່ ແຫ່ງ ສປປ ລາວ, ສປ ຈີນ ແລະ ສສ ຫວຽດນາມ ທີ່ຂອນແກ່ນ ໄດ້ຂຶ້ນກ່າວຄໍາເຫັນຊົມເຊີຍໃນງານດັ່ງກ່າວ. ຄຽງຄູ່ກັນນີ້, ທ່ານ Narongchai Akrasanee ປະທານຄະນະປະຈໍາສະຖາບັນແມ່ນໍ້າຂອງ ກໍໄດ້ຂຶ້ນກ່າວຄໍາເຫັນ ເພື່ອຫວນຄືນເຖິງການເຕີບໃຫຍ່ຂະຫຍາຍຕົວຂອງສະຖາບັນແມ່ນໍ້າຂອງ ຕະຫຼອດ 3 ທົດສະວັດຜ່ານມາ.
ໃນໂອກາດນີ້, ທ່ານ Suriyan Vichitlekarn ໄດ້ຂຶ້ນກ່າວຄໍາເຫັນອໍາລາ ໃນໂອກາດສິ້ນສຸດວາລະການດໍາລົງຕໍາແໜ່ງເປັນຜູ້ອໍານວຍການສະຖາບັນແມ່ນໍ້າຂອງ ແລະ ທ່ານ ອານຸລັກ ກິດຕິຄຸນ ກໍໄດ້ຂຶ້ນກ່າວຄໍາເຫັນແນະນໍາຕົນເອງ ໃນໂອກາດເຂົ້າຮັບຕໍາແໜ່ງເປັນຜູ້ອໍານວຍການຄົນໃໝ່ ຂອງສະຖາບັນແມ່ນໍ້າຂອງ.
KPL
