ຂປລ
ກອງເລຂາຄະນະກຳມະການອະໄພຍະໂທດລະດັບຊາດ ໄດ້ເປີດກອງປະຊຸມ ລາຍງານຜົນການຄົ້ນຄວ້າ, ກວດກາການສະເໜີຂໍອະໄພຍະໂທດໃຫ້ແກ່ນັກໂທດທີ່ຖືກສານຕັດສິນປະຫານຊີວິດ ປະຈຳປີ 2026 ໃນວັນທີ 3 ກັນຍາ 2026 ພາຍໃຕ້ການເປັນປະທານຂອງທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ, ຫົວໜ້າກອງເລຂາຄະນະກຳມະການອະໄພຍະໂທດລະດັບຊາດ, ມີບັນດາຮອງຫົວໜ້າກອງເລຂາ ແລະ ຄະນະກອງເລຂາຄະນະກຳມະການອະໄພຍະໂທດລະດັບຊາດ ທີ່ມາຈາກອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ, ຫ້ອງວ່າການສຳນັກງານປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ ແລະ ສານປະຊາຊົນສູງສຸດ ເຂົ້າຮ່ວມ.
ໃນວາລະກອງປະຊຸມ, ທ່ານ ບົວລີ ເພັດມີໄຊ ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ອົງການໄອຍະການປະຊາຊົນສູງສຸດ ໄດ້ລາຍງານຜົນການຄົ້ນຄວ້າ, ກວດກາ ຂອງນັກໂທດປະຫານຊີວິດ ປະຈຳປີ 2026 ຕາມຫ້ອງວ່າການສຳນັກງານປະທານປະເທດ ສັງລວມ ແລະ ນຳສົ່ງມາຍັງກອງເລຂາ ຄະນະກຳມະການອະໄພຍະໂທດລະດັບຊາດ ແລະ ຕາມຂໍ້ຕົກລົງແບ່ງຄວາມຮັບຜິດຊອບຂອງກອງເລຂາຄະນະກຳມະການອະໄພຍະໂທດລະດັບຊາດ ສະບັບເລກທີ 52/ກລຂ, ລົງວັນທີ 2 ກໍລະກົດ 2026. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ມີການປະກອບຄຳຄິດຄຳເຫັນ ເຈາະຈິ້ມກ່ຽວກັບຜົນການຄົ້ນຄວ້າ, ກວດກາຂອງແຕ່ລະທ່ານ ທີ່ຮັບຜິດຊອບຄົ້ນຄວ້າ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ບົນພື້ນຖານຕາມລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບເລກທີ 001/ປປທ, ລົງວັນທີ 20 ມີນາ 2018 ແລະ ກົດໝາຍວ່າດ້ວຍການດຳເນີນຄະດີອາຍາ ສະບັບປັບປຸງປີ 2017 ເພື່ອເຮັດໃຫ້ການຄົ້ນຄວ້າຄຳຮ້ອງຂໍອະໄພຍະໂທດຂອງນັກໂທດປະຫານ ປະຈຳປີ 2026 ນີ້ມີຄວາມຍຸຕິທຳ, ໂປ່ງໃສ ແລະ ທັນກຳນົດເວລາ.
ໂອກາດນີ້, ທ່ານ ບຸນທັນ ບຸນທະວິໄລ ໄດ້ເນັ້ນໃຫ້ຄະນະຮັບຜິດຊອບກອງເລຂາ ຄະນະກຳມະການອະໄພຍະໂທດລະດັບຊາດ ຮີບຮ້ອນປັບປຸງຕາມການຕົກລົງຂອງກອງປະຊຸມ ໂດຍເນັ້ນໜັກໃຫ້ຜູ້ຮັບຜິດຊອບກວດກາຄືນກ່ຽວກັບບັນດາຂໍ້ມູນຕ່າງໆ ຂອງນັກໂທດແຕ່ລະຄົນ ໃຫ້ຖືກຕ້ອງຄົບຖ້ວນ ຮັບປະກັນບໍ່ໃຫ້ມີການຜິດພາດ ແລະ ຫຼີກລ່ຽງການປັບປຸງເອກະສານ ຫຼົບໄປຫຼົບມາຫຼາຍຄັ້ງ ເພື່ອນຳສະເໜີຕໍ່ກອງປະຊຸມຄະນະກຳມະການອະໄພຍະໂທດລະດັບຊາດ ພິຈາລະນາຕາມຂັ້ນຕອນທີ່ກຳນົດໄວ້ໃນ ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ຮັບປະກັນໃຫ້ທັນກຳນົດເວລາ ໃນການສະເໜີຫາຫ້ອງວ່າການສຳນັກງານນາຍົກລັດຖະມົນຕີ ເພື່ອສະເໜີຕໍ່ທ່ານປະທານປະເທດ ແຫ່ງ ສປປ ລາວ ອອກລັດຖະດຳລັດອະໄພຍະໂທດໃຫ້ແກ່ນັກໂທດ ໃນວັນຊາດທີ 2 ທັນວາ 2026.
ຂ່າວ: ສຸກ ອອປສ
KPL
