ຂປລ
ໂຄງການປົກປັກຮັກສາ ແລະ ນຳໃຊ້ລະບົບນິເວດປ່າໄມ້ ແລະ ຊີວະນາໆພັນແບບຍືນຍົງ (ProFEB) ຈັດກອງປະຊຸມສະຫຼຸບການວາງແຜນຂະຫຍາຍໂຄງການ ໃນວັນທີ 4 ກັນຍາ 2026 ຜ່ານມາ ໂດຍການເປັນປະທານຮ່ວມຂອງ ທ່ານ ສົມຫວັງ ພິມມະວົງ ຫົວໜ້າກົມປ່າໄມ້ ກະຊວງກະສິກຳ ແລະ ສິ່ງແວດລ້ອມ, ທ່ານ ບຸນເດດ ສຸດທະວິໄລ ຫົວໜ້າກົມກວດກາຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງກະສິກຳ ແລະ ສິ່ງແວດລ້ອມ, ມີຜູ້ຕາງໜ້າສະຫະພາບເອີຣົບປະຈຳລາວ, ສະຖານທູດເຢຍລະມັນ ປະຈຳລາວ, ຜູ້ຕາງໜ້າຈາກພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງຫຼວງພະບາງ, ອຸດົມໄຊ, ຫົວພັນ, ໄຊຍະບູລີ, ຄຳມ່ວນ ແລະ ແຂວງສະຫວັນນະເຂດ, ພ້ອມດ້ວຍບັນດາອົງການຈັດຕັ້ງສາກົນທີ່ກ່ຽວຂ້ອງເຂົ້າຮ່ວມ.
ກອງປະຊຸມຈັດຂຶ້ນ ເພື່ອສະຫຼຸບການວາງແຜນຂະຫຍາຍໂຄງການ, ພ້ອມທັງປຶກສາຫາລືກ່ຽວກັບທິດທາງບຸລິມະສິດ ສຳລັບຂໍ້ສະເໜີງົບປະມານ ແລະ ຂະຫຍາຍໄລຍະຈັດຕັ້ງປະຕິບັດໂຄງການ ໄປຮອດປີ 2028 ແລະ ທົບທວນຄວາມຄືບໜ້າ, ຮວບຮວມຂໍ້ສະເໜີແນະໃນການສ້າງຄວາມເຂັ້ມແຂງໃຫ້ກັບນະໂຍບາຍປ່າໄມ້, ການອະນຸລັກຄວາມຫຼາກຫຼາຍທາງຊີວະນາໆພັນ, ການສຶກສາດ້ານວິຊາການປ່າໄມ້, ການຟື້ນຟູປ່າໄມ້ ແລະ ຕ່ອງໂສ້ມູນຄ່າ ທີ່ພົວພັນກັບປ່າໄມ້ຢ່າງຍືນຍົງ ແລະ ຮັບຮອງເອົາທິດທາງຍຸດທະສາດທີ່ສຳຄັນ ສຳລັບການກະກຽມໄລຍະສືບຕໍ່ ແລະ ຂະຫຍາຍໂຄງການ.
ໂຄງການ ProFEB ໄດ້ສະໜັບສະໜູນການປົກປັກຮັກສາ ແລະ ນຳໃຊ້ລະບົບນິເວດປ່າໄມ້ຢ່າງຍືນຍົງ ໄປພ້ອມກັບການເພີ່ມການມີສ່ວນຮ່ວມຂອງຊຸມຊົນທ້ອງຖິ່ນ ໂດຍສະເພາະແມ່ນແມ່ຍິງ ໃນຕ່ອງໂສ້ທີ່ພົວພັນກັບປ່າໄມ້ຢ່າງຍືນຍົງ. ໂຄງການ ProFEB ໄດ້ຮັບການຮ່ວມທຶນຈາກສະຫະພາບເອີຣົບ ແລະ ກະຊວງ ເພື່ອການຮ່ວມມືທາງດ້ານເສດຖະກິດ ແລະ ການພັດທະນາແຫ່ງ ສະຫະພັນ ເຢຍລະມັນ (BMZ) ແລະ ຈັດຕັ້ງປະຕິບັດໂດຍ ອົງການ GIZ. ສະຫະພາບເອີຣົບ ໄດ້ອະນຸມັດງົບປະສານເພີ່ມເຕີມຈຳນວນ 5 ລ້ານເອີໂຣ ສຳລັບແຜນງານຂະແໜງການປ່າໄມ້ ແລະ ຄວາມມຸ່ງໝັ້ນທີ່ຈະຂະຫຍາຍໄລຍະການຈັດຕັ້ງປະຕິບັດໂຄງການ ໄປຮອດສິ້ນສຸດປີ 2028. ການເຈລະຈາລະດັບລັດຖະບານ ກ່ຽວກັບການຮ່ວມມື ເພື່ອການພັດທະນາ ລະຫວ່າງ ລາວ-ເຢຍລະມັນ ທີ່ຈະຈັດຂຶ້ນໃນເດືອນພະຈິກ ຈະເປັນບ່ອນອີງໃນການຕັດສິນໃຈ ແລະ ຢັ້ງຢືນການເພີ່ມງົບປະສານ ແລະ ການສືບຕໍ່ໂຄງການ ProFEB ຫຼັງຈາກສິ້ນສຸດໄລຍະຈັດຕັ້ງປະຕິບັດ.
ທ່ານ ສົມຫວັງ ພິມມະວົງ ກ່າວວ່າ: ເປົ້າໝາຍຂອງພວກເຮົາ ແມ່ນການຮ່ວມມືກັນເພື່ອສ້າງຮາກຖານທີ່ເຂັ້ມແຂງ ແລະ ຍືນຍົງ ໃຫ້ກັບໄລຍະໃໝ່ຂອງໂຄງການ ProFEB ໂດຍຍຶດຖືຄວາມເປັນເຈົ້າການຂອງຊາດຢ່າງໜັກແໜ້ນ. ການເປັນຄູ່ຮ່ວມງານຈະປະກອບສ່ວນໂດຍກົງຕໍ່ເປົ້າໝາຍໄລຍະຍາວ ຂອງ ສປປ ລາວ ເພື່ອການຄຸ້ມຄອງປ່າໄມ້ຢ່າງຍືນຍົງ ແລະ ການເຕີບໂຕສີຂຽວແບບມີສ່ວນຮ່ວມ.
ຂໍ້ມູນ-ພາບ: ຂ່າວສານກະສິກຳ
KPL
