ຂປລ
ຍ້ອນໄດ້ຮັບຜົນກະທົບ ຈາກການລະເບີດ ຂອງພູໄຟກູນັງ ອານັກ ກຣາກາຕົວ, ສະໜາມບິນ 8 ແຫ່ງ ຂອງອິນໂດເນເຊຍ ໄດ້ປິດບໍລິການຊົ່ວຄາວ ເຊິ່ງເຮັດໃຫ້ 467 ຖ້ຽວບິນ ໄດ້ຮັບຜົນກະທົບ
ຂປລ.ວິທະຍຸ ໂທລະພາບ ສູນກາງຈີນ, ວັນທີ 6 ກັນຍານີ້, ທ່ານ ດູດີ ປູຣ໌ວາກັນດີ ລັດຖະມົນຕີ ກະຊວງຄົມມະນາຄົມ ອິນໂດເນເຊຍ ໄດ້ເປີດເຜີຍວ່າ: ຍ້ອນໄດ້ຮັບຜົນກະທົບ ຈາກການລະເບີດ ຂອງພູໄຟກູນັງ ອານັກ ກຣາກາຕົວ, ສະໜາມບິນ 8 ແຫ່ງ ຂອງອິນໂດເນເຊຍ ໄດ້ປິດບໍລິການຊົ່ວຄາວ ເຊິ່ງເຮັດໃຫ້ 467 ຖ້ຽວບິນ ໄດ້ຮັບຜົນກະທົບ, ໃນນັ້ນ ລວມທັງ 58 ຖ້ຽວບິນສາກົນ ແລະ 409 ຖ້ຽວບິນພາຍໃນປະເທດ. ທ່ານ ດູດີ ປູຣ໌ວາກັນດີ ໄດ້ກ່າວຕື່ມວ່າ: ການປິດສະໜາມບິນ ແມ່ນເພື່ອປ້ອງກັນບໍ່ໃຫ້ເທົ່າຖ່ານພູໄຟ ສົ່ງຜົນກະທົບຕໍ່ຄວາມປອດໄພຂອງການບິນ. ຖ້າຫາກເທົ່າຖ່ານພູໄຟສືບຕໍ່ແຜ່ກະຈາຍ, ຈະບໍ່ຟຶ້ນຟູການດຳເນີນງານ ຂອງສະໜາມບິນແບບບັງຄັບ. ພ້ອມທັງ ໄດ້ຮຽກຮ້ອງ ໃຫ້ບໍລິສັດການບິນແຈ້ງ ສະພາບການຍົກເລີກ, ປັບປ່ຽນ ແລະ ປ່ຽນເສັ້ນທາງການບິນຂອງຖ້ຽວບິນ ຕໍ່ຜູ້ໂດຍສານ ຢ່າງທັນການ ແລະ ຖືກຕ້ອງ, ພ້ອມທັງຮັບປະກັນສິດ ແລະ ຜົນປະໂຫຍດ ຂອງຜູ້ໂດຍສານ ເຊັ່ນ: ການຖອນປີ້ ເປັນຕົ້ນ. ຖ້າຫາກມີຄວາມຈຳເປັນ, ບາງຖ້ຽວບິນສາມາດໂອນໄປ ສະໜາມບິນອື່ນໄດ້./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
