ຂປລ
ກອງປະຊຸມ ສຸດຍອດ ອາຊຽນ - ລັດເຊຍ ປີ 2026 ຖືກໄຂຂຶ້ນ ຢ່າງເປັນທາງການ ໃນວັນທີ 17 ມິຖຸນາ ຢູ່ນະຄອນ ຄາ ຊານ (Kazan)ຂອງ ລັດເຊຍ, ສ້າງຂີດໝາຍ ການພົວພັນ ຄູ່ຮ່ວມມື ຍຸດທະສາດ ຮອບດ້ານ ລະຫວ່າງ ອາຊຽນ ແລະ ລັດເຊຍ ຄົບຮອບ 35 ປີ (1991–2026).
ຂປລ.ວິທະຍຸ ກະຈາຍສຽງ ຫວຽດນາມ, ກອງປະຊຸມ ສຸດຍອດ ອາຊຽນ - ລັດເຊຍ ປີ 2026 ຖືກໄຂຂຶ້ນ ຢ່າງເປັນທາງການ ໃນວັນທີ 17 ມິຖຸນາ ຢູ່ນະຄອນຄາຊານ(Kazan)ຂອງ ລັດເຊຍ, ສ້າງຂີດໝາຍ ການພົວພັນຄູ່ຮ່ວມມື ຍຸດທະສາດ ຮອບດ້ານ ລະຫວ່າງ ອາຊຽນ ແລະ ລັດເຊຍ ຄົບຮອບ 35 ປີ (1991–2026). ກອງປະຊຸມຄັ້ງນີ້ ໄດ້ສຸມໃສ່ການກວດຄືນ ການພົວພັນ ຄູ່ຮ່ວມມື ຍຸດທະສາດ ອາຊຽນ-ລັດເຊຍ ຮອບດ້ານ, ຕີລາຄາໝາກຜົນ ທີ່ບັນລຸໄດ້, ຮັບຮູ້ສິ່ງທ້າທາຍ ແລະ ສະເໜີ ບັນດາການກຳນົດທິດທາງ ການຮ່ວມມືໃໝ່, ບຸກທະລຸ, ໂດຍສະເພາະ ແມ່ນໃນຂົງເຂດຄວາມໝັ້ນຄົງ ດ້ານພະລັງງານ ແລະ ການຮ່ວມສຳພັນ ເສດຖະກິດ ອາຊີ - ເອີຣົບ. ບັນດາການນຳ ກໍໄດ້ແລກປ່ຽນ ຢ່າງເລິກເຊິ່ງກວ້າງຂວາງ ກ່ຽວກັບ ບັນດາບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງ ມີຄວາມສົນໃຈ. ພ້ອມດຽວກັນນັ້ນ, ກໍຄາດວ່າ ກອງປະຊຸມ ຈະຮັບຮອງເອົາ ບັນດາເອກະສານສຳຄັນ, ສ້າງຂອບເຂດ ການຮ່ວມມືໃໝ່ ທີ່ແທດເໝາະກັບຄວາມຕ້ອງການພັດທະນາ ຂອງສອງຝ່າຍ ໃນໄລຍະຈະມາເຖິງ.ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ນຳໜ້າຄະນະຜູ້ແທນຂັ້ນສູງ ສສ ຫວຽດນາມ ເຂົ້າຮ່ວມກອງປະຊຸມ ແລະ ດຳເນີນຫລາຍການເຄື່ອນໄຫວສອງຝ່າຍ ຢູ່ນອກກອງປະຊຸມ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
