ຂປລ
ໂອກາດລົງເຄື່ອນໄຫວພົບປະ ແລະ ເຜີຍແຜ່ຜົນສຳເລັດກອງປະຊຸມຄັ້ງປະຖົມມະລືກຂອງສະພາແຫ່ງຊາດ (ສພຊ) ຊຸດທີ X ແລະ ສະພາປະຊາຊົນນະຄອນຫລວງວຽງຈັນ ຊຸດທີ V ຢູ່ເມືອງສີໂຄດຕະບອງ ນະຄອນຫລວງວຽງຈັນ ໃນວັນທີ 10 ມິຖຸນາ 2026,
ຂປລ. ທ່ານ ໄຊສົມພອນ ພົມວິຫານ ປະທານສະພາ ແຫ່ງຊາດໄດ້ເນັ້ນໃຫ້ເມືອງສີໂຄດຕະບອງ ເອົາໃຈໃສ່ເພີ່ມທະວີການນໍາພາ-ຊີ້ນໍາທາງດ້ານແນວຄິດການເມືອງ, ທັງຊອກທ່າແຮງການຂຸດຄົ້ນແຫລ່ງລາຍຮັບ ແລະ ຊຸກຍູ້ສົ່ງເສີມປະຊາຊົນທຳການການຜະລິດເພື່ອສ້າງຖານລາຍຮັບໃໝ່.
ນອກຈາກນີ້, ຍັງສະເໜີໃຫ້ເລັ່ງແກ້ໄຂບັນຫາຮົ່ວໄຫລຂອງງົບປະມານ, ບັນຫາສິ່ງເສບຕິດ, ຂີ້ລັກງັດແງະ, ສະແກມເມີ ແລະ ອື່ນໆ; ເພີ່ມທະວີການນໍາພາຮອບດ້ານຕ່ໍວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມໜັກແໜ້ນ, ຊຸກຍູ້ສົ່ງເສີມ ແລະ ສ້າງເງ່ືອນໄຂໃຫ້ປະຊາຊົນທຳການຜະລິດກະສິກໍາ, ການ ລ້ຽງສັດເປັນສິນຄ້າມີມາດຕະຖານ, ມີຄຸນນະພາບເພື່ອສະໜອງໃຫ້ແກ່ບັນດາໂຮງແຮມ, ຮ້ານອາຫານ, ຕະຫລາດຕ່າງໆໃນນະຄອນຫລວງວຽງຈັນ; ສ້າງ ແລະ ລວມໝູ່ຂອງປະຊາຊົນໃຫ້ກາຍເປັນຖານເສດຖະກິດອັນໝ້ັນຄົງ ແລະ ໜັກແໜ້ນ; ພັດທະນາຊັບພະຍາກອນມະນຸດໃຫ້ສອດຄ່ອງກັບຄວາມຮຽກຮ້ອງຕ້ອງການ ແລະ ສາມາດຕອບສະໜອງແກ່ການສ້າງສາພັດທະນາພາຍໃນ; ສຶກສາອົບຮົມໃຫ້ປະຊາຊົນຮັກສາມູນເຊ້ືອຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະລະເພື່ອຜົນປະໂຫຍດສ່ວນລວມ; ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ; ເພ່ີມທະວີການຝຶກອົບຮົມສີມືແຮງງານໃຫ້ມີຄຸນນະພາບ, ປະຊາຊົນມີວຽກເຮັດງານທໍາ, ມີລາຍຮັບ ແລະ ມີຊີວິດການເປັນຢູ່ທີ່ໝັ້ນຄົງດີຂຶ້ນ; ປັບປຸງໂຮງໝໍເມືອງ, ໂຮງໝໍນ້ອຍໃຫ້ພໍ່ແມ່ປະຊາຊົນສາມາດເຂົ້າເຖິງການປ່ິນປົວຢ່າງກວ້າງຂວາງ, ສະດວກ ແລະ ມີປະສິດທິພາບ; ເພ່ີມຄວາມສາມາດໃນການເຝົ້າລະວັງຕິດຕາມ, ຊອກຄົ້ນຫາ, ໂຕ້ຕອບກໍລະນີພະຍາດລະບາດໃຫ້ໄດ້ໄວ; ເອົາໃຈໃສ່ການສ້າງ ແລະ ສ້ອມແປງໂຮງຮຽນ.
ໃນໂອກາດດຽວກັນ, ປະທານສະພາແຫ່ງຊາດກໍໄດ້ມອບເຄື່ອງ ອຸໂພກ-ບໍລິໂພກ ແລະ ອຸປະກອນທີ່ຈຳເປັນໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດທາງທຳມະຊາດພາຍຸໝາກເຫັບທີ່ພັດ ຖະຫລົ່ມໃນໄລຍະຜ່ານມາ ເພື່ອ ຊ່ວຍເຫລືອຟ້ືນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດໄວ, ທັງປຸກລະດົມຈິດໃຈໃຫ້ປະຊາຊົນມີຄວາມອຸ່ນໃຈ ແລະ ມີສະຕິເຂັ້ມແຂງໃນການສ້າງສາຄອບຄົວຄືນໃໝ່. ພ້ອມນີ້, ທ່ານຍັງໄດ້ສະແດງຄວາມເຫັນໃຈ ແລະ ຢ້ຽມຢາມຖາມຂ່າວຄວາມທຸກສຸກຂອງປະຊາຊົນ ແຕ່ລະຄອບຄົວ, ທັງຍ້ອງຍໍຊົມເຊີຍຄວາມສາມັກຄີຮັກແພງຂອງອຳ ນາດການປົກຄອງ ແລະ ປະຊາຊົນ ພາຍໃນບ້ານທີ່ໄດ້ຊ່ວຍເຫລືອເບ່ິງແຍງກັນໃນຍາມເກີດເຫດສຸກເສີນ.
ຂ່າວ: ກິດຕາ
KPL
