ຂປລ.  ໃນໂອກາດວັນປູກຕົ້ນໄມ້ແຫ່ງຊາດ1 ມິຖຸນາຄົບ ຮອບ 46 ປີ, ວັນສິ່ງແວດລ້ອມໂລກ 5 ມິຖຸນາ ຄົບຮອບ 53 ປີ ແລະ ວັນສິ່ງແວດລ້ອມແຫ່ງຊາດ ຄົບຮອບ 27 ປີ ແລະ ວັນເດັກນ້ອຍສາກົນໃນປີນີ້, ທົ່ວປະເທດໄດ້ຈັດພິທີປູກຕົ້ນໄມ້ຢ່າງຟົດຟຶ້ນ ເພື່ອໃຫ້ສ້າງຄວາມອຸດົມສົມບູນໃຫ້ແກ່ທຳມະຊາດ ທັງທົດແທນຕົ້ນໄມ້ທີ່ຖືກທຳລາຍ ຫລື ຕາຍໃຫ້ກັບຄືນມາປົກຫຸ້ມດ້ວຍສີຂຽວ.

      ເພື່ອເປັນການສະເຫລີມສະຫລອງວັນສຳຄັນດັ່ງກ່າວໃຫ້ມີຄວາມໝາຍສຳຄັນນັ້ນ, ແຂວງບໍລິຄໍາໄຊ ກໍໄດ້ຈັດພິທີປູກຕົ້ນໄມ້ຢູ່ສະໂມສອນໂຮງຮຽນ ມສ ສີທານາໄຊ ໂດຍໃຫ້ກຽດເຂົ້າຮ່ວມຂອງ ທ່ານ ຄໍາແຫວນ ປັນຍານຸວົງ ປະທານ ຄະນະກໍາມະການປົກຄອງແຂວງ. ການໄມ້ດັ່ງກ່າວ   ເພຶ່ອເປັນການສ້າງສະຕິຫວງແຫນປູກຈິດສໍານຶກ ໃຫ້ຊາວໜຸ່ມ ເຍົາ ວະຊົນຄົນຮຸ່ນຫລັງ ໄດ້ເຫັນເຖິງຄຸນປະໂຫຍດ ຂອງປ່າໄມ້ ເຊັ່ນ: ທີ່ຢູ່ອາໄສ, ແຫລ່ງນໍ້າ, ອາຫານ, ຢາປົວພະຍາດ, ອາກາດ, ສິ່ງແວດລ້ອມ ແລະ ອື່ນໆ. ທັງໝົດເຫລົ່ານີ້ ຖືເປັນສິ່ງສໍາຄັນຕໍ່ການດໍາລົງຊີວິດຂອງຄົນເຮົາ.     ເບ້ຍໄມ້ທີ່ນໍາມາປູກໃນຄັ້ງນີ້ ມີເບ້ຍໄມ້ດູ່, ໄມ້ຂະຍຸງ ແລະ ເບ້ຍໄມ້ປະດັບ ລວມທັງໝົດປະມານ 1.000 ກວ່າເບ້ຍ.

 ສຳລັບຢູ່ແຂວງໄຊສົມບູນໄດ້ຈັດພິທີປູກຕົ້ນໄມ້ ຢູ່ສະໂມສອນເມືອງອະນຸວົງຢ່າງຟົດຟື້ນ ໂດຍການເຂົ້າຮ່ວມຂອງ ທ່ານ ພອຍຄຳ ຮຸ່ງບຸນຍວງ ກຳມະການສູນກາງພັກ, ເລຂາພັກແຂວງ, ປະທານສະພາປະຊາຊົນ ແຂວງໄຊສົມບູນ. ພິທີດັ່ງກ່າວ ໄດ້ມີການຫວນຄືນປະຫວັດຄວາມເປັນມາ ແລະ ຄວາມສຳຄັນຂອງວັນປູກຕົ້ນໄມ້ແຫ່ງຊາດ, ວັນສິ່ງ ແວດລ້ອມແຫ່ງຊາດ, ວັນສິ່ງແວດລ້ອມໂລກ ແລະ ວັນເດັກນ້ອຍສາກົນ. ປ່າໄມ້ແມ່ນມີຄວາມສຳຄັນຫລາຍຕໍ່ກັບການພັດທະ ນາເສດຖະກິດ-ສັງຄົມ ໂດຍທາງກົງ ແລະ ທາງອ້ອມ ທັງຍັງເປັນການປົກປັກຮັກສາດິນ, ແຫລ່ງນໍ້າ ແລະ ຊີວະນາໆພັນ ໃຫ້ມີຄວາມອຸດົມສົມບູນ ພ້ອມທັງຫລຸດຜ່ອນຜົນກະທົບຂອງການປ່ຽນແປງດິນຟ້າອາກາດ. ດັ່ງນັ້ນ, ຕ້ອງມີການຄຸ້ມຄອງ, ປົກປັກຮັກສາ ແລະ ນໍາໃຊ້ທີ່ດິນ, ປ່າໄມ້, ຊັບພະຍາກອນທຳມະຊາດອື່ນໆ.   

 ສ່ວນຫ້ອງການກວດກາ ແລະ ຄວບຄຸມຢາເສບຕິດ ກໍໄດ້ຈັດກິດຈະກຳປູກຕົ້ນໄມ້ເຊັ່ນດຽວກັນຢູ່ສູນປິ່ນ ປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ( ຫລັກ 62 ) ຊຶ່ງນຳພາໂດຍ ພັອ ຈັນທອນ ເຮືອງຄຳໄຊ ຄະນະພັກກົມໃຫຍ່ຕຳຫລວດ, ຫົວໜ້າຫ້ອງກວດກາ ແລະ ຄວບຄຸມຢາເສບຕິດ. ການຈັດກິດຈະກຳ ປູກຕົ້ນໄມ້ຄັ້ງນີ້, ເພື່ອເປັນການຈັດຕັ້ງຜັນຂະຫຍາຍ ແນວທາງນະໂຍບາຍຂອງພັກ ແລະ ລັດຖະບານ, ໂດຍສະເພາະແມ່ນແຜນຍຸດທະສາດ ການເພີ່ມທະວີການປົກປັກຮັກສາຊັບພະຍາກອນປ່າໄມ້ ແລະ ຟື້ນຟູ່ປ່າ ໃຫ້ຍືນຍົງຄຽງຄູ່ກັບການພັດທະນາເສດ ຖະກິດ - ສັງຄົມຂອງຊາດ. ທັງເປັນການປູກຈິດສຳນຶກໃຫ້ນາຍ ແລະ ພົນຕຳຫລວດ ໃຫ້ເຫັນໄດ້ເຖິງຄຸນປະໂຫຍດ, ຄວາມສຳຄັນຂອງປ່າໄມ້ ທີ່ຕິດພັນກັບຊີວິດການເປັນຢູ່ຂອງປະຊາຊົນບັນດາເຜົ່າ, ທັງເຮັດໃຫ້ປ່າໄມ້ກາຍເປັນພື້ນທີ່ສີຂຽວ, ເພີ່ມຄວາມອຸດົມສົມບູນໃຫ້ແກ່ທຳມະຊາດ ແລະ ສະພາບແວດລ້ອມ ເພື່ອຫລຸດຜ່ອນການປ່ຽນແປງດິນຟ້າອາກາດ.

KPL