ຂປລ. ການຈັດຕັ້ງປະຕິບັດ ມະຕິວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ (ສອຈ) ໃນໄລຍະໃໝ່ ຖືເປັນທິດທາງຍຸດທະສາດທີ່ສໍາຄັນ ໃນການບູລະນະ ແລະ ຟື້ນຟູເສດຖະກິດ-ສັງຄົມ ຂອງສປປ ລາວ ໃຫ້ມີຄວາມເຂັ້ມແຂງ, ຍືນຍົງ ແລະ ສາມາດຮອງຮັບຄວາມຜັນຜວນຈາກສະພາບແວດລ້ອມພາຍນອກໄດ້ດີຂຶ້ນ. ມະຕິດັ່ງກ່າວມຸ່ງເນັ້ນການນຳໃຊ້ທ່າແຮງພາຍໃນປະເທດໃຫ້ເກີດປະໂຫຍດສູງສຸດ, ຫລຸດຜ່ອນການເພິ່ງພາຈາກພາຍນອກ, ສ້າງຄວາມເຂັ້ມແຂງໃຫ້ລະບົບເສດຖະກິດພາຍໃນ ແລະ ຍົກສູງຄວາມສາມາດໃນການຮັບມື ແລະ ຕ້ານທານກັບວິກິດການຕ່າງໆ.

ໃນໄລຍະຜ່ານມາ ການຜັນຂະຫຍາຍມະຕິໄດ້ຮັບການຈັດຕັ້ງຢ່າງເປັນລະບົບ ແລະ ບັນລຸຜົນສຳເລັດຫລາຍດ້ານ. ພາກລັດໄດ້ສຸມໃສ່ການປັບປຸງນະໂຍບາຍ, ກົດໝາຍ ແລະ ກົນໄກການບໍລິຫານເສດຖະກິດ ໃຫ້ມີຄວາມໂປ່ງໃສ ແລະ ເອື້ອອຳນວຍຕໍ່ການຜະລິດ, ການຄ້າ ແລະ ການລົງທຶນ. ພ້ອມກັນນັ້ນ, ຍັງໄດ້ຊຸກຍູ້ການຜະລິດພາຍໃນປະເທດ, ພັດທະນາກະສິກຳສະອາດ, ອຸດສາຫະກຳປຸງແຕ່ງ, ວິສາຫະກິດຂະໜາດນ້ອຍ ແລະ ຂະໜາດກາງ, ຄວບຄູ່ກັບການນຳໃຊ້ຊັບພະຍາກອນທຳມະຊາດຢ່າງຄຸ້ມຄ່າ ແລະ ຍືນຍົງ.

ຜົນສຳເລັດທີ່ໂດດເດັ່ນ ແລະ ເປັນຮູບປະທຳ ໃນການຈັດຕັ້ງປະຕິບັດມະຕິດັ່ງກ່າວໃນໄລຍະຜ່ານມາມີດ້ານພົ້ນເດັ່ນຂຶ້ນດັ່ງນີ້:  ຜົນງານພົ້ນເດັ່ນອັນໜຶ່ງແມ່ນດ້ານການຜະລິດ ແລະ ການຄໍ້າປະກັນ ພຽງພໍພາຍໃນ ໂດຍການສົ່ງເສີມການຜະລິດກະສິກຳ ແລະ ແປຮູບ ໄດ້ມີການຊຸກຍູ້ການປູກຝັງ-ລ້ຽງສັດ ເພື່ອທົດແທນການນຳເຂົ້າຢ່າງແຂງແຮງ ໂດຍສະ ເພາະພືດເສດຖະກິດ, ຜັກ, ໝາກໄມ້ ແລະ ຊີ້ນສັດ ສາມາດສະໜອງໃຫ້ຕະຫລາດພາຍໃນໄດ້ເພີ່ມຂຶ້ນ. ພ້ອມທັງເພີ່ມການແປຮູບຜົນຜະລິດທາງການກະສິກຳ ແລະ ໄມ້ ເພື່ອຍົກສູງມູນຄ່າສິນຄ້າ ແລະ ຫລຸດການສົ່ງອອກວັດຖຸດິບ.

          ດ້ານການເງິນ, ເງິນຕາ ແລະ ຄວາມເຂັ້ມແຂງທາງງົບປະມານການຄຸ້ມຄອງເງິນຕາ ໄດ້ສົ່ງເສີມການນຳໃຊ້ເງິນກີບ ໃນການຊຳລະສະສາງພາຍໃນປະເທດຢ່າງເຂັ້ມງວດ, ຄຸ້ມຄອງອັດຕາແລກປ່ຽນ ແລະ ດຶງເງິນຕາຕ່າງປະເທດເຂົ້າສູ່ລະບົບທະນາຄານໃຫ້ໄດ້ຫລາຍຂຶ້ນ. ຂະນະດຽວກັນ, ການເກັບລາຍຮັບງົບປະມານໄດ້ຫັນສູ່ລະບົບດີຈິຕອນຫລາຍຂຶ້ນ ເພື່ອຫລຸດການຮົ່ວໄຫວ ແລະ ຄຸ້ມຄອງໜີ້ສາທາລະນະໃຫ້ມີປະສິດທິຜົນ.

          ດ້ານການຄ້າ, ການບໍລິການ ແລະ ການເຊື່ອມໂຍງ-ເຊື່ອມຈອດ ໄດ້ນຳໃຊ້ປະໂຫຍດຈາກໂຄງສ້າງພື້ນຖານເຊັ່ນ: ທາງລົດໄຟ ລາວ-ຈີນ, ທາງດ່ວນ, ແລະ ທ່າບົກ/ດ່ານສິນຄ້າ ເພື່ອປ່ຽນຈາກປະເທດທີ່ “ບໍ່ມີທາງອອກສູ່ທະເລ” ໃຫ້ກາຍເປັນ “ສູນກາງການເຊື່ອມໂຍງຂອງພາກພື້ນ.ພ້ອມນັ້ນ, ຍັງໄດ້ຍົກລະດັບການການສົ່ງອອກສິນຄ້າທີ່ມີມູນຄ່າເພີ່ມຂຶ້ນ ແລະ ຊຸກຍູ້ການທ່ອງທ່ຽວພາຍໃນ “ລາວທ່ຽວລາວ” ຄວບຄູ່ກັບປີທ່ອງທ່ຽວລາວ  ເພື່ອດຶງລາຍຮັບເຂົ້າປະເທດ.

ຂະນະດຽວກັນ, ການພັດທະນາພະລັງງານ ແລະ ຊັບພະຍາກອນຢ່າງມີຄວາມຍືນຍົງ ການເປັນ "ໝໍ້ໄຟແຫ່ງ ອາຊີ": ສືບຕໍ່ພັດທະນາພະລັງງານສະອາດ (ພະລັງງານນ້ຳ, ແສງຕາເວັນ ແລະ ພະລັງງານລົມ) ເພື່ອຄໍ້າປະກັນພະລັງງານ ພາຍໃນ ແລະ ສົ່ງອອກສ້າງລາຍຮັບໃຫ້ປະເທດ.ຄວບຄູ່ກັນ ລັດຍັງໄດ້ປັບປຸງການຄຸ້ມຄອງ ແລະນຳໃຊ້ຊັບພະຍາກອນໂດຍສະເພາະການຂຸດຄົ້ນແຮ່ທາດ ໃຫ້ມີຄວາມໂປ່ງໃສ ແລະ ເກີດປະໂຫຍດສຸງສຸດຕໍ່ປະເທດຊາດ.

   ຜົນສຳເລັດຈາກການຈັດຕັ້ງປະຕິບັດມະຕິວ່າດ້ວຍການສ້າງ ເສດຖະ ກິດເອກະລາດ ເປັນເຈົ້າຕົນເອງ ບໍ່ພຽງແຕ່ຊ່ວຍຫລຸດຜ່ອນຄວາມສ່ຽງຈາກວິກິດການພາຍນອກເທົ່ານັ້ນ, ແຕ່ຍັງເປັນການວາງຮາກຖານໃຫ້ປະເທດຊາດມີຄວາມເຂັ້ມແຂງ, ສາມາດເພິ່ງພາຕົນເອງ, ປົກປ້ອງອະທິປະໄຕ ທາງເສດຖະກິດ ແລະ ສ້າງພື້ນຖານສຳລັບການພັດທະນາທີ່ຍືນຍົງໃນໄລຍະຍາວ.

KPL