ຂປລ.   ໂດຍມີທ່ານ ພົນເອກ  ວິໄລ ຫລ້າຄຳຟອງ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ,  ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານພັກແຂວງຈຳປາສັກ,  ທ່ານ ສຸກສະຫວັນ ວິໄລວົງ ປະທານຄະນະກຳມະການປົກຄອງ ແຂວງຈຳປາສັກ, ພ້ອມດ້ວຍຜູ້ຕາງໜ້າກະຊວງສາທາລະນະສຸກ,   ການນໍານະຄອນປາກເຊ, ນັກທຸລະກິດ,  ຜູ້ປະກອບ  ແລະ  ຂະແໜງການທີ່ກ່ຽວຂ້ອງ ເຂົ້າຮ່ວມ. 

        ໃນພິທີ,  ທ່ານ ໄພທູນ ປະທຸມທອງ ປະທານກຸ່ມບໍລິສັດ ຈໍາປາຄໍາ  ຈໍາກັດຜູ້ດຽວ ລາຍງານວ່າ: ໂຄງການກໍ່ສ້າງໂຮງໝໍປາກເຊ  ອິນເຕີເນຊັນນໍ  ໃນຄ້ັງນ້ີແມ່ນປະຕິບັດຕາມສັນຍາເຊ່ົາສໍາປະທານດິນ ເລກທີ 2546/ປກສ.ຈສ, ລົງວັນທີ 15 ກໍລະກົດ 2025; ອີງຕາມໜັງສືແຈ້ງຕອບຂອງພະແນກສາທາລະນະສຸກ ແຂວງ ເລກທີ 076/ສທຂ.ຈສ, ລົງວັນທີ 12 ພະຈິກ 2025 ໂດຍພື້ນຖານແມ່ນເຫັນດີໃນການສົ່ງເສີມການລົງທຶນໃນການບໍລິການສຸຂະພາບເພ່ືອເປັນທາງເລືອກທ່ີດີຂອງພ່ໍແມ່ປະຊາຊົນ.  ເພ່ືອເປັນການ ຈັດຕັ້ງ-ຜັນຂະຫຍາຍແນວທາງນະໂຍບາຍຂອງພັກ,  ແຜນພັດທະນາເສດຖະກິດ - ສັງຄົມຂອງແຂວງ ແລະ  ນະຄອນປາກເຊ ແຕ່ນີ້ຮອດ ປີ 2030 ໃຫ້ມີຜົນສໍາເລັດເປັນຮູບພະທໍາເທື່ອລະກ້າວ,  ນໍາເອົາຜົນປະໂຫຍດຕົວຈິງມາສູ່ປະຊາຊົນ ໂດຍປະຕິບັດຕາມທິດຊີ້ນໍາຂອງພັກ ທີ່ວ່າ: ລັດ ແລະ ປະຊາຊົນ ພ້ອມກັນເຮັດເພື່ອແບ່ງເບົາພາລະແບກຫາບໃນການພັດທະນາເສດຖະກິດ-ສັງຄົມຂອງແຂວງ-ນະຄອນ ໃນຂົງເຂດບໍລິການປິ່ນປົວດູແລສຸຂະພາບຂອງປະຊາຊົນບັນດາເຜ່ົາ, ຊ້ັນຄົນພາຍໃນແຂວງ-ຕ່າງແຂວງ,  ກຸ່ມບໍລິສັດຈຳປາຄໍາ ຈຳກັດຜູ້ດຽວ ຈ່ຶງມີວັດຖຸປະສົງໃນການລົງທຶນກໍ່ສ້າງໂຮງໝໍມາດຕະຖານສາກົນແຫ່ງໃໝ່ຂຶ້ນ ເພື່ອເປັນການຍົກລະດັບລະບົບສາທາລະນະສຸກ  ໃຫ້ປະຊາຊົນໃນແຂວງຈຳປາສັກ ແລະ ແຂວງໃກ້ຄຽງ  ໄດ້ເຂົ້າເຖິງການປິ່ນປົວທີ່ມີຄຸນນະພາບ,  ທັນສະໄໝ ແລະ ສະດວກສະບາຍ ໂດຍທີມບຸກຄະລາກອນການແພດທີ່ມີຄຸນນະພາບ.

      ທ່ານ ໄພທູນ ປະທຸມທອງ ກ່າວຕື່ມວ່າ: ເພື່ອເຮັດໃຫ້ໂຄງການກ່ສ້າງໂຮງໝໍປາກເຊ ອີນເຕີເນຊັນນໍ ຖືກຈັດຕັ້ງປະຕິບັດຕາມແຜນກໍ່ສ້າງໃຫ້ສໍາເລັດ  ແລະ  ເປີດບໍລິການຮັບໃຊ້ສັງຄົມໃຫ້ວ່ອງໄວ, ສະຖານທ່ີກ່ໍສ້າງໂຄງການມີເນ້ືອທີ່ດິນນໍາໃຊ້ທັງໝົດ 2. 700 ຕາແມັດ, ປຸກສ້າງເປັນອາຄານ 4 ຊັ້ນ ໂດຍນໍາໃຊ້ພະລັງງານສະອາດ,  ຮັກສາສ່ິງແວດລ້ອມລວມເນື້ອທ່ີໃຊ້ສອຍອາຄານ 6. 500 ຕາແມັດ,  ມີຫ້ອງສຸກເສີມ  1  ຫ້ອງ,  ຕຽງນອນໃນຫ້ອງສຸກເສີນ 4 ຕຽງ,  ມີຫ້ອງພັກຄົນເຈັບ 15  ຫ້ອງ,  ລວມທັງໝົດ 30 ຕຽງ,  ມີຫ້ອງຜ່າຕັດ 1  ຫ້ອງ,  ຫ້ອງສຸກເສີນ 2  ຫ້ອງ  ໂດຍການລົງທຶນຂອງກຸ່ມບໍລິສັດຈໍາປາຄໍາ ຈຳກັດຜູ້ດຽວ  100%, ຄາດໝາຍກຳນົດການກໍ່ສ້າງໃຫ້ສໍາເລັດໃນ 6 ເດືອນ, ພ້ອມປະກອບວັດຖຸເຄື່ອງມືການແພດຕ່າງໆ ແລະ ຄາດຄະເນຈະການເປີດນໍາໃຊ້ບໍລິການຢ່າງເປັນທາງການທ້າຍປີ 2026 ນີ້.

       ໂອກາດນີ້, ທ່ານ ສຸກສະຫວັນ ວິໄລວົງ ກ່າວວ່າ: ໂຄງການກໍ່ສ້າງໂຮງໝໍປາກເຊ ອິນເຕີເນຊັນນໍ ນ້ີ  ເປັນໂຄງການໜຶ່ງທີ່ມີຄວາມສໍາຄັນ,  ຖ້າວ່າການກໍ່ສ້າງດັ່ງກ່າວສໍາເລັດ ຈະສາມາດປະກອບສ່ວນ ໃນການພັດທະນາ ເສດຖະກິດ -ສັງຄົມຂອງແຂວງ  ໂດຍສະເພາະຊ່ວຍຫລຸດຜ່ອນຜູ້ຄົນເຈັບທ່ີຈະໄປປິ່ນປົວຢູ່ຕ່າງປະເທດ,  ຍ້ອນແນວນັ້ນ,  ຄະນະພັກ-ຄະນະກໍາມະການປົກຄອງແຂວງ ຈຶ່ງຖືເປັນໂຄງການທ່ີສໍາຄັນທັງໃຫ້ການສະໜັບສະໜູນຕໍ່ໄປ  ແລະ ເຊື່ອໝັ້ນວ່າການຈັດຕັ້ງພັກ -ລັດ, ພະແນກການກົມກອງອ້ອມຂ້າງແຂວງ, ຄະນະກໍາມະ ການປົກຄອງແຕ່ລະຂັ້ນ  ແລະ  ວິຊາສະເພາະທີ່ກ່ຽວຂ້ອງ ຈະເອົາໃຈໃສ່ຊີ້ນໍາຢ່າງໃກ້ຊິດຕິດແທດ ເພື່ອກະຕຸກຊຸກຍູ້ ແລະ ເປັນກຳລັງໃຈໃຫ້ໂຄງການນີ້ໄດ້ຮັບຈັດຕັ້ງປະຕິບັດໄປໂດຍດີ  ແລະ  ມີຜົນສໍາເລັດຕາມກຳນົດເວລາຄາດໝາຍໄວ້.  

KPL