ຂປລ
ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະເຈລະຈາກັບ ທ່ານ ໂດນັນ ທຣຳ, ປະທານາທິບໍດີ ສ.ອາເມລິກາ ທີ່ເດີນທາງມາຢ້ຽມຢາມ ສປ ຈີນ ທາງລັດຖະກິດ ຢູ່ຫໍສະພາປະຊາຊົນ ທີ່ນະຄອນຫລວງປັກກິ່ງ.
ຂປລ.ວິທະຍຸ-ໂທລະພາບ ສູນກາງຈີນ, ວັນທີ 14 ພຶດສະພານີ້, ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະເຈລະຈາກັບ ທ່ານ ໂດນັນ ທຣຳ, ປະທານາທິບໍດີ ສ.ອາເມລິກາ ທີ່ເດີນທາງມາຢ້ຽມຢາມ ສປ ຈີນ ທາງລັດຖະກິດ ຢູ່ຫໍສະພາປະຊາຊົນ ທີ່ນະຄອນຫລວງປັກກິ່ງ. ໃນໂອກາດນີ້ ທ່ານ ສີ ຈິ້ນຜິງ ໄດ້ກ່າວວ່າ: ປັດຈຸບັນ, ສະພາບການປ່ຽນແປງໃຫຍ່ຂອງໂລກ ໃນຮອບຮ້ອຍປີ ພວມຜັນແປໄວຂຶ້ນ, ສະຖານະການສາກົນ ເຕັມໄປດ້ວຍ ການປ່ຽນແປງ ແລະ ຄວາມວຸ້ນວາຍ, ສປ ຈີນ ແລະ ສ.ອາເມລິກາ ຈະສາມາດກ້າວຂ້າມ “ກັບດັກທູຊີດິເດັດ” ແລະ ສ້າງຮູບແບບໃໝ່ ຂອງການພົວພັນ ລະຫວ່າງປະເທດໃຫຍ່ ໄດ້ ຫລື ບໍ່? ຈະສາມາດຮ່ວມມືກັນ ຮັບມືກັບ ສິ່ງທ້າທາຍທົ່ວໂລກ ແລະ ເພີ່ມຄວາມໝັ້ນທ່ຽງໃຫ້ແກ່ໂລກໄດ້ ຫລື ບໍ່? ຈະສາມາດສຸມໃສ່ ຜົນປະໂຫຍດ ຂອງປະຊາຊົນ ສອງປະເທດ ກໍຄື ອະນາຄົດ ແລະ ຊາຕາກຳ ຂອງມວນມະນຸດ ແລະ ຮ່ວມກັນສ້າງອະນາຄົດ ທີ່ດີງາມຂອງການພົວພັນ ສອງປະເທດ ໄດ້ ຫລື ບໍ່? ສິ່ງເຫລົ່ານີ້ແມ່ນຄຳຖາມ ຂອງປະຫວັດສາດ, ຄຳຖາມຂອງໂລກ, ຄຳຖາມຂອງປະຊາຊົນ, ທັງເປັນຄຳຕອບ ແຫ່ງຍຸກສະໄໝ ທີ່ຜູ້ນຳປະເທດໃຫຍ່ ຕ້ອງຮ່ວມກັນຕອບ. ຂ້າພະເຈົ້າ ຫວັງຢາກແລກປ່ຽນຄຳເຫັນກັບ ທ່ານ ປະທານາທິບໍດີ ໂດນັນ ທຣຳ ກ່ຽວກັບບັນຫາສຳຄັນ ຂອງສອງປະເທດ ກໍຄືຂອງໂລກ, ຮ່ວມກັນຊີ້ແຈ້ງທິດທາງ ແລະ ຂັດທ້າຍກຳປັ່ນແຫ່ງການພົວພັນຈີນ-ອາເມຣິກາໃຫ້ດີ, ເຮັດໃຫ້ປີ 2026 ກາຍເປັນປີທີ່ມີຄວາມໝາຍຄັ້ງປະຫວັດສາດ ແລະ ເປັນຂີດໝາຍສຳຄັນ ຂອງການພົວພັນຈີນ-ອາເມລິກາ ໂດຍສືບທອດອະດີດ ແລະ ບຸກເບີກ ອະນາຄົດໃໝ່. ນອກຈາກນີ້ ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: ສປ ຈີນ ມຸ່ງໝັ້ນທີ່ຈະສຸມກຳລັງ ເຂົ້າໃນການພັດທະນາ ການພົວພັນ ຈີນ-ອາເມລິກາ ໃຫ້ໝັ້ນທ່ຽງ, ປອດໃສ ແລະ ຍືນຍົງ. ຂ້າພະເຈົ້າ ເຫັນດີນຳ ທ່ານ ປະທານາທິບໍດີ ໂດນັນ ທຣຳ ວ່າ: ຈະຖືເອົາການສ້າງ “ການພົວພັນທາງຍຸດທະສາດ ແລະ ໝັ້ນທ່ຽງ ທີ່ມີລັກສະນະສ້າງສັນ ລະຫວ່າງ ສປ ຈີນ-ສ.ອາເມລິກາ” ເປັນທິດໃໝ່ ຂອງການພົວພັນຈີນ-ອາເມລິກາ, ເຊິ່ງຈະເປັນທິດຊີ້ນຳ ທາງຍຸດທະສາດ ສຳລັບ ການພັດທະນາການພົວພັນ ຈີນ-ອາເມລິກາ ໃນ 3 ປີຕໍ່ໜ້ານີ້ ແລະ ໃນໄລຍະຍາວນານ, ເຊື່ອວ່າ, ຈະໄດ້ຮັບການຍິນດີ ຕ້ອນຮັບ ຈາກປະຊາຊົນ ສອງປະເທດ ກໍ່ຄື ປະຊາຄົມໂລກ. “ຄວາມໝັ້ນທ່ຽງ ທາງຍຸດທະສາດທີ່ສ້າງສັນ” ຄວນແມ່ນຄວາມໝັ້ນທ່ຽງທາງບວກທີ່ຖືເອົາການຮ່ວມມືເປັນຫຼັກ, ຄວນແມ່ນຄວາມໝັ້ນທ່ຽງ ທີ່ດີທີ່ມີການແຂ່ງຂັນ ໃນລະດັບທີ່ເໝາະສົມ, ຄວນແມ່ນຄວາມໝັ້ນທ່ຽງ ປົກກະຕິທີ່ມີຄວາມຂັດແຍ້ງກັນທີ່ຖືກຄວບຄຸມໄດ້, ຄວນແມ່ນຄວາມໝັ້ນທ່ຽງຍືນຍົງທີ່ມີວິໄສທັດແຫ່ງສັນຕິພາບ, “ການພົວພັນໝັ້ນທ່ຽງ ທາງຍຸດທະສາດ ທີ່ສ້າງສັນລະຫວ່າງ ສປ ຈີນ-ສ.ອາເມລິກາ” ບໍ່ແມ່ນເປັນພຽງຄຳຂວັນທໍ່ນັ້ນ, ຫາກແມ່ນການກະທຳ ທີ່ກ້າວໄປຂ້າງໜ້າ ຮ່ວມກັນ. ທ່ານ ສີຈິ້ນຜິງ ຊີ້ອອກວ່າ: ທາດແທ້ຂອງການພົວພັນ ດ້ານເສດຖະກິດ ການຄ້າ ລະຫວ່າງ ສປ ຈີນ-ສ.ອາເມລິກາ ແມ່ນຕ່າງຝ່າຍຕ່າງໄດ້ຮັບຜົນປະໂຫຍດ, ເມື່ອປະເຊີນໜ້າກັບ ຄວາມເຫັນ ທີ່ແຕກຕ່າງກັນ ແລະ ຂໍ້ຂັດແຍ້ງ, ການປຶກສາຫາລື ຢ່າງສະເໝີພາບ ແມ່ນທາງເລືອກທີ່ຖືກຕ້ອງ ພຽງທາງດຽວ. ມື້ວານນີ້, ຄະນະເສດຖະກິດການຄ້າ ຂອງສອງຝ່າຍ ໄດ້ບັນລຸຜົນສຳເລັດທີ່ຕັ້ງໜ້າ ແລະ ມີຄວາມສົມດຸນໂດຍລວມ, ສິ່ງນີ້ແມ່ນຂ່າວດີຕໍ່ປະຊາຊົນສອງປະເທດກໍຄືຕໍ່ໂລກ. ສອງຝ່າຍຄວນຮ່ວມກັນຮັກສາທ່າອ່ຽງທີ່ດີທີ່ບໍ່ງ່າຍກ່ອນຈະໄດ້ມາໃນປັດຈຸບັນ. ຈີນຈະເປີດປະຕູສູ່ພາຍນອກ ໃຫ້ນັບມື້ ນັບກວ້າງຂວາງ ກວ່າເກົ່າ, ວິສາຫະກິດອາເມລິກາ ພວມມີສ່ວນຮ່ວມ ເຂົ້າໃນການປະຕິຮູບ ແລະ ເປີດປະຕູສູ່ ພາຍນອກຂອງ ສປ ຈີນ ຢ່າງເລິກເຊິ່ງ, ສປ ຈີນ ຍິນດີຕ້ອນຮັບ ສ.ອາເມລິກາ ເພີ່ມທະວີ ການຮ່ວມມື ທີ່ຕ່າງຝ່າຍ ຕ່າງໄດ້ຮັບຜົນປະໂຫຍດ ກັບ ສປ ຈີນ. ທ່ານ ສີ ຈິ້ນຜິງ ຊີ້ອອກວ່າ: ສອງຝ່າຍ ຄວນປະຕິບັດຄວາມຮັບຮູ້ທີ່ເປັນເອກະພາບກັນ ອັນສຳຄັນ ຂອງພວກເຮົາ, ນຳໃຊ້ຮູບການທູດແບບ ທາງການເມືອງ ແລະ ຊ່ອງທາງການແລກປ່ຽນ ລະຫວ່າງ ສອງກອງທັບ ໃຫ້ດີຂຶ້ນຕື່ມອີກ, ເປີດກວ້າງການແລກປ່ຽນ ແລະ ການຮ່ວມມື ໃນຂົງເຂດຕ່າງໆ, ເຊັ່ນ: ເສດຖະກິດການຄ້າ, ສາທາລະນະສຸກ, ກະສິກຳ, ການທ່ອງທ່ຽວ, ວັດທະນະທຳ, ການປະຕິບັດກົດໝາຍ ແລະ ອື່ນໆ. ຂະນະດຽວກັນ ທ່ານ ສີຈິ້ນຜິງ ເນັ້ນໜັກຕື່ມວ່າ: ບັນຫາໄຕ້ຫວັນ ແມ່ນບັນຫາສຳຄັນທີ່ສຸດ ໃນການພົວພັນຈີນ-ອາເມລິກາ. ຖ້າແກ້ໄຂໃຫ້ດີແລ້ວ, ການພົວພັນ ລະຫວ່າງ ສອງປະເທດ ຈະສາມາດຮັກສາ ຄວາມໝັ້ນທ່ຽງ ໂດຍລວມ. ຖ້າແກ້ໄຂບໍ່ດີ, ສອງປະເທດ ກໍ່ຈະເກີດຄວາມຂັດແຍ້ງກັນ ຫລື ແມ່ນແຕ່ການປະທະກັນ, ຈະເຮັດໃຫ້ການພົວພັນ ລະຫວ່າງ ສປ ຈີນ-ສ.ອາເມລິກາ ຕົກຢູ່ໃນສະພາບການ ທີ່ອັນຕະລາຍທີ່ສຸດ. “ການແບ່ງແຍກ ໄຕ້ຫວັນ ເປັນເອກະລາດ” ຈະທຳລາຍສັນຕິພາບ ຢູ່ຊ່ອງແຄບໄຕ້ຫວັນ, ການຮັກສາສັນຕິພາບ ແລະ ສະຖຽນລະພາບ ຂອງຊ່ອງແຄບໄຕ້ຫວັນ ແມ່ນພື້ນຖານການພົວພັນ ລະຫວ່າງ ສອງຝ່າຍ, ສ.ອາເມລິກາ ຄວນປະຕິບັດ ຕໍ່ບັນຫາໄຕ້ຫວັນ ດ້ວຍຄວາມລະມັດລະວັງ ຫລາຍທີ່ສຸດ. ສ່ວນ ທ່ານ ໂດນັນ ທຣຳ ກ່າວວ່າ: ຂ້າພະເຈົ້າ ຮູ້ສຶກເປັນກຽດທີ່ສຸດ ທີ່ໄດ້ມາຢ້ຽມຢາມ ສປ ຈີນ ທາງລັດຖະກິດ. ການພົວພັນ ອາເມລິກາ-ຈີນ ດີຫລາຍ, ຂ້າພະເຈົ້າ ໄດ້ຮ່ວມກັບ ທ່ານ ສີ ຈິ້ນຜິງ ສ້າງການພົວພັນ ລະຫວ່າງ ປະມຸກລັດອາເມລິກາ-ຈີນ ທີ່ຍາວນານທີ່ສຸດ ແລະ ດີງາມທີ່ສຸດ ໃນປະຫວັດສາດ, ໂດຍໄດ້ຮັກສາ ການແລກປ່ຽນທີ່ດີ, ໄດ້ແກ້ໄຂບັນຫາສຳຄັນຫລາຍຢ່າງ. ທ່ານ ປະທານ ສີ ຈິ້ນຜິງ ເປັນຜູ້ນຳທີ່ຍິ່ງໃຫຍ່, ສປ ຈີນ ແມ່ນປະເທດທີ່ຍິ່ງໃຫຍ່, ຂ້າພະເຈົ້າ ເຄົາລົບນັບຖືທ່ານປະທານ ສີ ຈິ້ນຜິງ ກໍ່ຄືປະຊາຊົນຈີນ. ການພົບປະທີ່ຈັດຂຶ້ນ ໃນມື້ນີ້ ແມ່ນການພົບປະ ອັນສຳຄັນທີ່ປະຈັກຕາທົ່ວໂລກ. ຂ້າພະເຈົ້າ ຍິນດີຮ່ວມກັນກັບ ທ່ານປະທານ ສີຈິ້ນຜິງ ເພີ່ມທະວີການແລກປ່ຽນແລະການຮ່ວມມື, ແກ້ໄຂຄວາມຂັດແຍ້ງກັນຢ່າງເໝາະສົມ, ສ້າງການພົວພັນ ອາເມລິກາ-ຈີນ ທີ່ດີທີ່ສຸດໃນປະຫວັດສາດ, ສ້າງອະນາຄົດທີ່ດີງາມກວ່າເກົ່າ ຂອງສອງປະເທດ. ສ.ອາເມລິກາ ແລະ ສປ ຈີນ ແມ່ນປະເທດທີ່ສຳຄັນທີ່ສຸດ ແລະ ເຂັ້ມແຂງທີ່ສຸດໃນໂລກ, ການຮ່ວມມື ລະຫວ່າງ ສ.ອາເມລິກາ-ສປ ຈີນ ສາມາດເຮັດສິ່ງທີ່ຍິ່ງໃຫຍ່ ແລະ ສິ່ງທີ່ດີ ຫລາຍຢ່າງ ໃຫ້ທັງສອງປະເທດ ກໍ່ຄືໃຫ້ໂລກ. ການມາຢ້ຽມຢາມເທື່ອນີ້, ຂ້າພະເຈົ້າ ໄດ້ນຳພາຜູ້ແທນທີ່ດີເດັ່ນ ໃນວົງການ ອຸດສາຫະກຳ ການຄ້າຂອງ ສ.ອາເມລິກາ, ເຂົາເຈົ້າ ລ້ວນແຕ່ເຄົາລົບນັບຖື ແລະ ໃຫ້ຄວາມສຳຄັນຕໍ່ ສປ ຈີນ, ຂ້າພະເຈົ້າ ຕັ້ງໜ້າສົ່ງເສີມໃຫ້ເຂົາເຈົ້າ ເປີດກວ້າງ ການຮ່ວມມືກັບ ສປ ຈີນ. ຈາກນັ້ນ ປາມຸກລັດ ທັງສອງປະເທດ ຍັງໄດ້ແລກປ່ຽນຄວາມເຫັນ ກ່ຽວກັບບັນຫາສາກົນ ແລະ ພາກພື້ນ ທີ່ສຳຄັນຕ່າງໆເຊັ່ນ: ສະຖານະການ ໃນພາກພື້ນຕາເວັນອອກກາງ, ວິກິດການ ອູແກຣນ, ແຫລມເກົາຫລີ ແລະ ອື່ນໆ. ພ້ອມນີ້, ຍັງໄດ້ເປັນເອກະສັນກັນວ່າ ຈະສະໜັບສະໜູນ ເຊິ່ງກັນ ແລະ ກັນ ເພື່ອຈັດກອງປະຊຸມ ບໍ່ເປັນທາງການ ຂອງຜູ້ນຳ ອົງການຮ່ວມມື ເສດຖະກິດ ອາຊີ ປາຊີຟິກ ແລະ ກອງປະຊຸມ ສຸດຍອດກຸ່ມ 20 ປະເທດໃນປີນີ້./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
