(ເນື່ອງໃນໂອກາດ ວັນຜ່າວົງປິດລ້ອມຂອງກອງພັນທີ 2 ວິລະຊົນ ຄົບຮອບ 67 ປີ ວັນທີ 18/5/1959-18/5/2026)

ຂປລ. ໃນໂອກາດລະນຶກວັນປະຫວັດສາດ ກອງພັນທີ 2 ຜ່າວົງປິດລ້ອມຂອງສັດຕູ ຄົບຮອບ 67 ປີ (18/5/ 1959-18/5/2026) ໜັງສືພິມປະເທດລາວ ຂໍນຳສະເໜີມູນເຊື້ອວັນສຳຄັນດັ່ງກ່າວ ເພື່ອເປັນການຢັ້ງຢືນເຖິງຜົນງານ ແລະ ນໍ້າໃຈອັນພິລະອາດຫານຂອງນັກຮົບປະຕິວັດລາວ ກໍຄືກອງທັບປະຊາຊົນລາວ ໃນການຕໍ່ສູ້ປົດປ່ອຍປະເທດຊາດຊຶ່ງພາຍ ຫລັງທີ່ພວກຈັກກະພັດອາເມລິກາ ແລະ ລູກມືໄດ້ຮັບຄວາມປະລາໄຊຢ່າງຕໍ່ເນື່ອງໃນການດຳເນີນກົນອຸບາຍຫລອກເສືອອອກຈາກຖ້ຳ ແລະ ກົນອຸບາຍຫັນປ່ຽນໂດຍສັນຕິ ພວກເຂົາໄດ້ຕັດສິນໃຈໂຄ່ນລົ້ມລັດຖະບານປະສົມຈີກສັນຍາວຽງຈັນ ໃຊ້ຄວາມຮຸນແຮງຝືນປະຕິວັດດ້ວຍກຳລັງອາວຸດ ເພື່ອຫວັງດັບສູນກຳລັງປະຕິວັດພວກເຂົາໄດ້ອອກຄຳສັ່ງໃຫ້ລູກມືໃນທຸກເຂດ ແຂວງອອກແຮງປາບປາມກຳລັງຮັກຊາດ ຢ່າງໂຫດຮ້າຍປ່າເຖ່ືອນ ພ້ອມດຽວກັນນີ້ກໍດຳເນີນການປິດລ້ອມນາບຂູ່ ແລະ ຈັບກຸມຄຸມຂັງຜູ້ນຳຂອງແນວລາວຮັກຊາດ.

    ໂດຍປະຕິບັດຕາມສັນຍາວຽງ ຈັນ ປີ 1957 ວ່າດ້ວຍການລວມປະສົມກຳລັງທະຫານຂອງສອງຝ່າຍລະຫວ່າງຝ່າຍແນວລາວຮັກຊາດ ແລະ ລັດຖະບານແຫ່ງລາຊະອະນາຈັກ ກຳລັງປະກອບອາວຸດຂອງຝ່າຍ ປະເທດລາວ ຈຳນວນ 1.500 ຄົນ ໄດ້ຮັບການຈັດຕັ້ງມອບໝາຍໃຫ້ເຂ້ົາຮ່ວມກັບກອງທັບຂອງລາຊະອານາຈັກໂດຍກອງພັນທີ 1 ຕັ້ງຢູ່ເມືອງຊຽງເງິນແຂວງຫລວງພະບາງ ແລະ ກອງພັນທີ 2 ຕັ້ງຢູ່ທົ່ງໄຫຫີນ ແຂວງຊຽງຂວາງ. ກອງກຳລັງທັງສອງກອງພັນແມ່ນກລັງທີ່ຈົ່ງຮັກພັກດີຕໍ່ພັກ ແລະ ປະຊາຊົນມີມູນເຊື້ອຮັກຊາດທີ່ສູງສ່ົງມີນ້ຳໃຈປະຕິວັດສຸດກົກສຸດປາຍ ມີ ລະບຽບວິໄນທີ່ເຄັ່ງຄັດເຂັ້ມງວດ ເປັນກຳລັງທີ່ເຄີຍສ້າງຜົນງານອັນດີເດັ່ນ ໃນການຕໍ່ສູ້ອັນພິລະອາດຫານຕ້ານພວກລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາຜູ້ຮຸກ. ນັບແຕ່ມື້ທີ່ກອງພັນທີ 2 ໄດ້ເຄື່ອນທັບເຂົ້າມາຕັ້ງຢູ່ໃຈກາງທົ່ງໄຫຫີນຈັກກະພັດອາເມລິກາ ແລະ ພວກຫຸ່ນວຽງຈັນທີ່ເປັນລູກມື ກໍໄດ້ດຳເນີນກົນອຸບາຍເພື່ອຫວັງທັບມ້າງ ແລະ ດັບມອດກຳລັງຂອງກອງພັນທີ 2 ຊຶ່ງໃນເບື້ອງຕົ້ນພວກເຂົາໄດ້ນຳໃຊ້ເລ່ລ່ຽມກົນອຸບາຍ ດ້ວຍວິທີໂຄສະນາຊວນເຊື່ອຕົວະຍົວະຊື້ຈ້າງຈອບອອຍດ້ວຍເງິນຄຳນາງສາວ ແລະ ແບບດຳລົງຊີວິດທີ່ຟຸມເຟືອຍຍົວະເຍົ້າໃຫ້ກອງພັນທີ 2 ຍອມມອບອາວຸດ ແລະ ຮັບເອົາການປະດັບຊັ້ນເພ່ືອຫວັງກືນເອົາກຳລັງຂອງກອງພັນທີ 2 ເຂົ້າເປັນກຳລັງຂອງກອງທັບລາຊະອານາຈັກ.

ແຕ່ຄະນະພັກ ແລະ ຄະນະບັນຊາຂອງກອງພັນທີ 2 ກໍໄດ້ເດັດດ່ຽວນຳພາ ແລະ ອ້າຍນ້ອງພະນັກງານນັກຮົບດ້ວຍຄວາມທຸນທ່ຽງໝັ້ນໜຽວ ສາມາດຮັກສາ ແລະ ສະແດງໃຫ້ເຫັນໄດ້ທາດແທ້ ຂອງນັກຮົບປະຕິວັດ ຕໍ່ມາພວກເຂົາໄດ້ຫັນມານຳໃຊ້ວິທີການນາບຂູ່ການບີບບັງຄັບໂດຍທາງອ້ອມເປັນຕົ້ນການຈຳກັດເຂົ້າປາອາຫານ ເຄື່ອງໃຊ້ສອຍ ແລະ ອື່ນໆ ການກະ¬ທຳຂອງພວກເຂົາເຖິງວ່າໄດ້ສ້າງຄວາມຫຍຸ້ງຍາກຫລາຍປະການ ໂດຍສະເພາະແມ່ນດ້ານຊີວິດການເປັນຢູ່ຂອງພະນັກງານນັກຮົບ ແລະ ຄອບຄົວແຕ່ພວກເຂົາກໍບໍ່ສາມາດເອົາຊະນະມານະຈິດປະຕິວັດຂອງນັກຮົບປະຕິວັດໄດ້ກົງກັນຂ້າມ ທົ່ວກອງພັນຍິ່ງມີຈິດໃຈບຸກບືນນ້ຳໃຈຄຽດແຄ້ນສັດຕູ ນັບມື້ນັບສູງ.ຄະນະພັກຄະນະບັນຊາໄດ້ອອກແຮງປຸກລະດົມຂະບວນການ ເພີ່ມພູນຜະລິດຜົນປະຢັດມັດທະຍັດ ບັນດາກົມກອງໄດ້ເປັນເຈົ້າການເຮັດວຽກງານໂຄສະນາຂົນຂວາຍ ເປີດກ້ວາງການພົວພັນລະຫວ່າງ ທະຫານກັບປະຊາຊົນຢູ່ໃນເຂດ ອ້ອມແອ້ມທີ່ຕັ້ງຂອງກອງພັນ ສະນັ້ນພຽງແຕ່ໄລຍະສ້ັນໆ ພະນັກງານນັກຮົບກອງພັນທີ 2 ກໍໄດ້ຮັບຄວາມເຊື່ອຖືຮັກແພງ ແລະ ເຊື່ອໝັ້ນຈາກປະຊາຊົນຢ່າງກ້ວາງຂວາງຈາກນັ້ນ ປະຊາຊົນທີ່ຢູ່ບໍລິເວນນັ້ນກໍໄດ້ໃຫ້ຄວາມຊ່ວຍເຫລືອເບິ່ງແຍງຊີວິດການເປັນຢູ່ຂອງພະນັກງານນັກຮົບກອງພັນທີ 2 ຄືກັບລູກຫລານຄີງຂອງຕົນເອງ. ເມື່ອເຮັດແນວໃດນັກຮົບປະຕິວັດກອງພັນທີ 2 ກໍບໍ່ຍອມຈຳນົນກົງກັນຂ້າມ ຊ້ຳພັດມີຄວາມທຸນທ່ຽງ ບໍ່ຢ້ານກົວຕໍ່ການກະທຳ ແລະ ສະຖານະການໃດໆພວກເຂົາກໍໄດ້ບືນເລິກເຂ້ົາໂດຍໃຊ້ກຳລັງທະຫານລາຊະອະນາຈັກ ຈຳນວນ 3 ກອງພັນ ໂດຍມີກອງກຳລັງປືນໃຫຍ່ລົດຫຸ້ມເກາະ ແລະ ເຮືອບິນທຳການປິດລ້ອມ ກອງພັນທີ 2 ໃຊ້ຖ້ອຍຄຳນາບຂູ່ເພື່ອບັງຄັບໃຫ້ກອງພັນທີ 2 ມອບຕົວ.

  ຢືນຢູ່ຕໍ່ໜ້າສະພາບການທີ່ເຄັ່ງຕຶງ ແລະ ສ່ຽງເປັນສ່ຽງຕາຍດັ່ງກ່າວ ຄະນະພັກຄະນະບັນຊາກອງພັນ ໄດ້ເປີດກອງປະຊຸມປຶກສາຫາລືກັນຢ່າງເຄັ່ງຮ້ອນລະອຽດຮອບຄອບຖີ່ຖ້ວນບົນພື້ນຖານຄວາມເປັນເອກະພາບ ມີຄວາມຕັດສິນໃຈທີ່ໝັ້ນແກ່ນ ຂອງພະນັກງານນັກຮົບທົ່ວກອງພັນ ແລະ ດ້ວຍການອູ້ມຊູຊ່ວຍເຫລືອ ຂອງປະຊາຊົນເຂດຊຽງຂວາງກອງພັນທີ 2 ໄດ້ສ້າງວິລະກຳ ດ້ວຍການຕັດສິນໃຈບັນຊາກອງທະຫານຜ່ານວົງລ້ອມອັນແໜ້ນໜາຂອງສັດຕູ ອອກໄປສູ່ເຂດທີ່ໝັ້ນປະຕິວັດ, ໃນຄຳ່ຄືນຂອງວັນທີ 18/5/1959 ພາຍໃຕ້ການບັນຊາຂອງຄະນະກອງພັນ ແຕ່ລະກົມກອງ ພ້ອມກັບຄອບຄົວພະນັກງານ-ນັກຮົບ ທັງໝົດນຳໃຊ້ຄວາມມືດໄດ້ປິດລັບຖອນທັບໄປທາງທິດບ້ານໂຕນ-ມາແຖງ-ນອງເຕີ້ ແລ້ວເຂົ້າປ່າໄປຕາມທິດບ້ານມາຍ ( ທິດຄາເວັນຕົກສຽງໃຕ້ ປະມານ 15 ກິໂລແມັດ ) ໃນເວລາກຳລັງສ່ວນໃຫຍ່ພວມຖອນທັບອອກໄປນັ້ນ,ເພື່ອຫລອກສັດຕູພວກເຮົາໄດ້ຈັດຕັ້ງໝວດໜຶ່ງຢູ່ຄ້າຍໂດຍແມ່ນ ທ້າວ ອາວ ເປັນຜູ້ຮັບຜິດຊອບເຮັດໜ້າທີ່ຕີກະແຫຼ່ງລວມແຖວເອີ້ນຊື່ກວດກາຈຳນວນພົນຕາມປົກກະຕິທີ່ເຄີຍປະຕິບັດໃນທີ່ຜ່ານມາ, ພາກສ່ວນນີ້ປະຈຳຢູ່ຄ້າຍຈົນຮອດ 12 ໂມງກາງຄືນ ຈຶ່ງມິດງຽບແລ້ວກໍຖອນອອກໄປຕາມທິດທີ່ເຄື່ອນທັບຂອງກອງພັນ, ພ້ອມກັບພາກສ່ວນຢູ່ຄ້າຍ ເພື່ອຫລອກສັດຕູ ກອງພັນຍັງໄດ້ຈັດຕັ້ງພາກສ່ວນໜຶ່ງ (ປະມານ 1 ກອງຮ້ອຍ ) ໂດຍແມ່ນ ທ່ານ ເຢ່ຍນູ ຮັບຜິດຊອບປິດລັບ ແລະ​ ສະກັດສາຍທາງຢູ່ຂົວຊຽງຂວາງ​ ລໍຖ້າໃຫ້ຮອດເວລາ 6 ໂມງເຊົ້າຂອງມື້ຕໍ່ມາຖ້າວ່າສັດຕູໄລ່ຕາມມາຮອດຂົວແມ່ນໃຫ້ໃຊ້ລະເບີດທຳລາຍຂົວ ພ້ອມທັງດັບສູນພວກເຂົາທັນທີ ແລະ ໜ່ວຍຫວ່ານຂ່າວຂອງພວກເຮົາ ກໍ່ວ່ອງໄວປ່ອຍຂ່າວ ຫລອກສັດຕູວ່າຈະບຸກໂຈມຕີເອົາຕົວເມືອງໂພນສະຫວັນ ເພື່ອປົດປ່ອຍເອົານັກໂທດ ທີ່ຖືກກັກຂັງຢູ່ໃນຄຸກ. ຍ້ອນມີການຈັດຕັ້ງເຄື່ອນທັບຂອງກອງພັນທີ 2 ອອກຈາກຄ້າຍຈຶ່ງຮັກສາໄດ້ຄວາມລັບ ແລະ ປອດໄພດີຈົນໄປຮອດຖານທີ່ໝັ້ນຂອງການປະຕິວັດທີ່ແຂວງຫົວພັນຢ່າງປອດໄພ.

ໄຊຊະນະຂອງກອງພັນທີ 2 ໃນການຜ່າວົງລ້ອມຂອງສັດຕູ ບໍ່ພຽງແຕ່ເປັນການທັບມ້າງເລ່ລ່ຽມກົນອຸບາຍ ແລະ ການກະທຳຝືນປະຕິວັດຂອງພວກຈັກກະພັດອາເມລິກາ ແລະ ພວກຫຸ່ນວຽງຈັນທີ່ເປັນຕີນມືເທົ່ານັ້ນ ແຕ່ມັນຍັງເປັນການປຸກລະດົມ ແລະ ເປີດສາກໃຫ້ແກ່ການຫັນທິດຕໍ່ສູ້ປະຕິວັດ ໃຫ້ກ້າວໄປສູ່ໄລຍະ ແລະ ຄຸນນະພາບໃໝ່ພ້ອມດຽວກັນນີ້ ກໍໄດ້ເປັນການປະກອບສ່ວນຂຽນປະຫວັດສາດແຫ່ງການຕໍ່ສູ້ທີ່ຮຸ່ງເຮືອງເຫລືອງເຫລື້ອມ ຂອງປະຊາຊົນລາວໃນໄລຍະຕໍ່ມາ.

KPL