ຂປລ. ອາທິດຜ່ານມາ, ຢູ່ທີ່ສະໂມສອນເມືອງຊຽງຄໍ້ ແຂວງຫົວພັນ ໄດ້ຈັດພິທີປະກາດນຳໃຊ້ກາໝາຍສິນຄ້າ “ໜຶ່ງເມືອງ ໜຶ່ງຜະລິດຕະພັນ” ຫລື ໂອດັອບ  (ODOP) ໃຫ້ແກ່ຜະລິດຕະພັນຈາກກຸ່ມແປຮູບຜະລິດຕະພັນກະສິກຳບ້ານຮັບ ຢ່າງເປັນທາງການ ໂດຍມີທ່ານ ອຳພອນ ພີມແກ້ວວົງຄຳ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ, ທ່ານ ພູທອງ ພັນທະວົງ ຮອງປະທານຄະນະກຳມະການປົກຄອງເມືອງຊຽງຄໍ້ (ຜູ້ຊີ້ນຳຂົງເຂດເສດຖະກິດ), ມີບັນດາຄະນະຮັບຜິດຊອບ, ຫົວໜ້າ-ຮອງຫົວໜ້າພະແນກການຂັ້ນແຂວງ, ຫ້ອງການຂັ້ນເມືອງ, ພະນັກງານລັດຖະກອນພາຍໃນເມືອງເຂົ້າຮ່ວມ.

ໃນພິທີ, ໄດ້ຜ່ານຂໍ້ຕົກລົງວ່າດ້ວຍການ ອະນຸຍາດນຳໃຊ້ກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນ ໂອດັອບ(ODOP) ໃຫ້ແກ່ກຸ່ມແປຮູບຜະລິດ ຕະພັນກະສິກຳບ້ານຮັບ ເມືອງຊຽງຄໍ້ ເຊິ່ງປະກອບມີ 3 ຜະລິດຕະພັນຫລັກ ຄື: ກ້ວຍຈືນອົບກອບ, ກ້ວຍອົບນ້ຳເຜີ້ງ ແລະ ຖົ່ວດິນອົບກອບ. ການໄດ້ຮັບຮອງກາໝາຍ ໂອດັອບ ໃນຄັ້ງນີ້ ຖືເປັນບາດກ້າວທີ່ສຳຄັນໃນການຢັ້ງຢືນເຖິງຄຸນນະພາບ, ມາດຕະຖານ ແລະ ເອກະລັກຂອງສິນຄ້າທ້ອງຖິ່ນ ທີ່ເກີດຈາກພູມປັນຍາ ແລະ ການນຳໃຊ້ວັດຖຸດິບພາຍໃນບ້ານໃຫ້ເກີດປະໂຫຍດສູງສຸດ.

ການມອບກາໝາຍ ໂອດັອບ (ODOP) ບໍ່ພຽງແຕ່ແມ່ນການຢັ້ງຢືນດ້ານມາດຕະຖານເທົ່ານັ້ນ, ແຕ່ຍັງເປັນການສ້າງໂອກາດ ໃຫ້ແກ່ຜູ້ຜະລິດໃນການເຂົ້າເຖິງ ຕະຫລາດທີ່ກວ້າງຂວາງຂຶ້ນ ທັງພາຍໃນ ແລະ ຕ່າງປະເທດ, ທັງເປັນການຊຸກຍູ້ເສດຖະກິດຄອບຄົວຂອງປະຊາຊົນໃຫ້ມີຄວາມເຂັ້ມແຂງ ແລະ ຍືນຍົງ. ແມ່ນຄວາມມານະອົດທົນຂອງກຸ່ມແປຮູບ ແລະ ພາກສ່ວນທີ່ກ່ຽວຂ້ອງ ທີ່ຮ່ວມກັນຊຸກຍູ້ຈົນສາມາດຍົກລະດັບສິນຄ້າດັ່ງກ່າວໃຫ້ກາຍເປັນສິນຄ້າທີ່ມີຊື່ສຽງຂອງເມືອງຊຽງຄໍ້. ການມອບໃບຢັ້ງຢືນການນຳໃຊ້ກາໝາຍ ODOP ໃຫ້ແກ່ຕົວແທນກຸ່ມແປຮູບຜະລິດຕະພັນກະສິກຳບ້ານຮັບ ເພື່ອເປັນການເລີ່ມຕົ້ນການເຄື່ອນໄຫວ ດ້ານການຄ້າພາຍໃຕ້ເຄື່ອງໝາຍມາດຕະຖານແຫ່ງຊາດ, ອັນເປັນການປະກອບສ່ວນເຂົ້າໃນ ການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມຂອງເມືອງ ໃຫ້ມີບາດກ້າວຂະຫຍາຍຕົວໃໝ່ທີ່ດີຂຶ້ນ ແລະ ເປັນການສ້າງຄວາມເຊື່ອໃຈໃຫ້ຜູ້ບໍລິໂພກ.