ຂປລ. ໂດຍເລີ່ມເປີດຮັບສະໝັກລົງທະບຽນນັບແຕ່ວັນທີ 4 ກັນຍາ ແລະ ຈະແບ່ງການແຂ່ງຂັນອອກເປັນ 4 ຄັ້ງຄື: ຄັ້ງທີ 1 ການແຂ່ງຂັນຂັ້ນແຂວງ, ຄັ້ງທີ 2 ການແຂ່ງຂັນຮອບຄັດເລືອກ, ຄັ້ງທີ 3 ການແຂ່ງຂັນຮອບຮອງຊະນະເລີດ ແລະ ຄັ້ງທີ 4 ການແຂ່ງຂັນຮອບຊີງຊະນະເລີດ, ມູນຄ່າເງິນລາງວັນການແຂ່ງຂັນ 760 ລ້ານກີບ ໂດຍຈະອອກອາກາດຢູ່ໂທລະພາບແຫ່ງຊາດລາວ ຊ່ອງ ທຊລ 3 ໃນທ້າຍປີ 2026 ນີ້.

     ທ່ານ ນາງ ໄພວັນ ບຸນທະວົງ ຜູ້ຮັບຜິດຊອບລາຍການດາວດວງໃໝ່ ໄດ້ໃຫ້ຮູ້ໃນໂອກາດຖະແຫລງຂ່າວເປີດລາຍການແຂ່ງຂັນສຽງເພງລາວທົ່ວປະເທດ “ລາຍການດາວດວງໃໝ່ 2026” ໃນວັນທີ 4 ກັນຍາ 2026 ຜ່ານມາວ່າ: ການແຂ່ງຂັນຮ້ອງເພງຄັ້ງນີ້,  ເປັນການອະນຸລັກ ແລະ ສົ່ງເສີມສິລະປະວັນນະຄະດີຂອງຊາດລາວ ໃຫ້ຄຽງຢູ່ຄູ່ກັບຄົນລາວຕະຫລອດໄປ, ທັງເປັນການພັດທະນາລາຍການຂອງໂທລະພາບແຫ່ງຊາດລາວ ໃຫ້ມີຫລາກຫລາຍສີສັນ ແລະ ດຶງດູດຜູ້ຊົມໃຫ້ຫັນມາຕິດຕາມໂທລະພາບແຫ່ງຊາດເພີ່ມຂຶ້ນ, ເພື່ອເປັນເວທີໃນການສົ່ງເສີມ, ຮັກສາ ແລະ ສືບສານສິລະປະວັດທະນະທໍາໃຫ້ໄວໜຸ່ມທີ່ມີພອນສະຫວັນ, ມີຄວາມສາມາດກ້າສະແດງອອກ ແລະ ຮ່ວມເປັນກໍາລັງໃຈໃຫ້ທຸກຄວາມສາມາດໄດ້ເປັ່ງປະກາຍອອກມາຍ່າງເຕັມທີ່. ນອກຈາກນີ້, ກໍເພື່ອໃຫ້ລາຍການດາວດວງໃໝ່ ເປັນບ່ອນສົ່ງຕໍ່ແຮງບັນດານໃຈ ແລະ ພະລັງບວກໃຫ້ກັບຜູ້ຊົມທີ່ກຳລັງລຸກຂຶ້ນ ໄລ່ຕາມຄວາມຝັນຂອງຕົນເອງ, ເພື່ອຄົ້ນຫາ ແລະ ເປີດໂຕເພັດເມັດງາມ, ດາວດວງໃໝ່ທີ່ອາດຈະຍັງບໍ່ທັນມີໃຜໄດ້ເຫັນໃຫ້ມີໂອກາດມາແຈ້ງເກີດໃນເວທີນີ້ ຊຶ່ງເວທີນີ້ບໍ່ພຽງແຕ່ເປັນການແຂ່ງຂັນ ແຕ່ເປັນເວທີແຫ່ງການຮຽນຮູ້ ທີ່ເປີດໂອກາດໃຫ້ຜູ້ເຂົ້າຮ່ວມໄດ້ພັດທະນາຕົນເອງ ແລະ ເຕີບໃຫຍ່ຢ່າງມີຄຸນນະພາບ.

    ທ່ານໃດທີ່ສົນໃຈ ສາມາດສະໝັກເຂົ້າຮ່ວມແຂ່ງຂັນທາງເວັບໄຊ www.laosinger.com ຫລື ສະແກນຄິວອາໂຄດເພື່ອລົງສະໝັກ, ສ່ວນເງື່ອນໄຂຂອງຜູ້ສະໝັກບໍ່ຈໍາກັດເພດ, ຕ້ອງແມ່ນຄົນລາວທີ່ມີອາຍຸ 15-40 ປີ, ຕ້ອງຮ້ອງເພງລາວ (ສະຕິງ ຫລື ລູກທົ່ງບ້ານນາ). ສຳລັບລາງວັນຊະນະເລີດ ລວມມູນຄ່າ 300 ລ້ານກີບ. ໃນນັ້ນ, ເງິນສົດ 200 ລ້ານກີບ, ຂັນລາງວັນ, ໃບຢັ້ງຢືນ, ທຶນຝຶກອົບຮົມ 3 ເດືອນຢູ່ ສປ ຈີນ ແລະ ເຊັນສັນຍາເປັນສິລະປິນ; ລາງວັນຮອງຊະນະເລີດລວມມູນຄ່າ 200 ລ້ານກີບ. ໃນນັ້ນ, ເງິນສົດ 100 ລ້ານກີບ, ຂັນລາງວັນ, ໃບຢັ້ງຢືນ, ທຶນຝຶກອົບຮົມ 3 ເດືອນ ຢູ່ ສປ ຈີນ ແລະ ເຊັນສັນຍາເປັນສິລະປິນ; ຮອງອັນດັບ 2 ລວມມູນຄ່າຂອງລາງວັນ 150 ລ້ານກີບ, ເງິນສົດ 50 ລ້ານກີບ, ຂັນລາງວັນ, ໃບຢັ້ງຢືນ, ທຶນຝຶກອົບຮົມ 3 ເດືອນ ທີ່ ສປ ຈີນ, ເຊັນສັນຍາເປັນສິລະປິນ, ທີ 4-10, ລວມມູນຄ່າຂອງລາງວັນ 10 ລ້ານກີບ, ໃບຢັ້ງຢືນ, ເຊັນສັນຍາເປັນສິລະປິນ (ອັນດັບ 4-5 ຈະໄດ້ຮັບທຶນຝຶກອົບຮົມຢູ່  ສປ ຈີນ 3 ເດືອນ) ແລະ ທີ 11-30 ລວມມູນຄ່າຂອງລາງວັນ 2 ລ້ານກີບ, ເງິນສົດ 2 ລ້ານກີບ ແລະ ໃບຢັ້ງຢືນ.

    ໂອກາດນີ້, ທ່ານ ວັນລາຕີ ຄໍາວານວົງສາ ຜູ້ອໍານວຍການໃຫຍ່ ໂທລະພາບແຫ່ງຊາດ ໄດ້ກ່າວວ່າ: ໂທລະພາບແຫ່ງຊາດລາວ ມີຄວາມພະຍາຍາມ, ມີຄວາມຕັ້ງໃຈ ແລະ ພາກພູມໃຈເປັນຢ່າງຍິ່ງ ທີ່ຈະໄດ້ມີລາຍການໃໝ່ອອກສູ່ສາຍຕາຜູ້ຊົມ ໂດຍສະເພາະແມ່ນລາຍການບັນເທີງ ກໍຄື ການແຂ່ງຂັນສຽງເພງຂອງຄົນລາວ, ຂອງໄວໜຸ່ມລາວ ແລະ ຜູ້ທີ່ມີຄວາມສົນໃຈ, ມັກຮັກໃນການຮ້ອງເພງ ຊຶ່ງລາຍການແຂ່ງຂັນສຽງເພງຄັ້ງນີ້, ເປັນການປະກອບສ່ວນໃນການສ້າງຂະບວນການ ແລະ ສົ່ງເສີມທາງດ້ານວັດທະນະທໍາ ໂດຍສະເພາະດ້ານສິລະປະ- ການສະແດງ, ທັງເປັນການສືບທອດ, ສືບສານມູນເຊື້ອ, ຮີດຄອງປະເພນີ, ການປະດິດຄິດແຕ່ງ, ສຽງເພງ, ສຽງຂັບ, ສຽງລໍາ ທີ່ເປັນເອກະລັກ, ເປັນມໍລະດົກຂອງປວງຊົນລາວ ແລະ ໃຫ້ຢູ່ຄຽງຄູ່ກັບສັງຄົມລາວຕະຫລອດໄປ, ລາຍການນີ້ ເປັນພຽງຈຸດເລີ່ມຕົ້ນໜຶ່ງ ແລະ ກໍເປັນການປະກອບສ່ວນໃນການແລກປ່ຽນວັດທະນະທໍາ ຜ່ານສຽງເພງກັບບັນດາປະເທດໃນພາກພື້ນ ແລະ ສາກົນ ໃນຕໍ່ໜ້າອີກດ້ວຍ. 

ຂ່າວ: ກິດຕາ; ພາບ: ເກດສະໜາ

KPL