ຂປລ.  ໂດຍການໃຫ້ກຽດເຂົ້າຮ່ວມຂອງ ທ່ານ ນາງປານີ ຢາທໍ່ຕູ້ ຮອງປະທານປະເທດ, ທ່ານ ສອນໄຊ ສີພັນດອນນາຍົກລັດຖະມົນຕີ, ມີເລຂາພັກແຂວງຈຳປາສັກ, ບັນດາລັດຖະມົນຕີ-ຮອງລັດຖະມົນຕີກະຊວງ-ອົງການທີ່ກ່ຽວຂ້ອງ, ຜູ້ຕາງໜ້າການນຳບັນດາແຂວງພາກໃຕ້, ແຂວງໄຊຍະບູລີ ແລະ ແຂກຖືກເຊີນທັງພາຍໃນ ແລະ ຕ່າງປະເທດຕະຫລອດຮອດມວນຊົນຊາວແຂວງ ຈຳປາສັກ ເຂົ້າຮ່ວມ.

     ໃນໂອກາດນີ້, ທ່ານ ສຸກສະຫວັນ ວິໄລວົງ ປະທານຄະນະກຳມະການປົກຄອງແຂວງຈຳປາສັກ ໄດ້ລາຍງານໃຫ້ຊາບວ່າ: ບຸນນະມັດສະການຜາສາດຫີນວັດພູຈໍາປາສັກປີນີ້ ໄດ້ຈັດຂຶ້ນໃນທ່າມກາງບັນຍາກາດທີ່ທົ່ວພັກ-ລັດ ແລະ ປວງຊົນລາວທັງຊາດ ພວມເບີກບານມ່ວນຊື່ນ ແລະ ຊົມເຊີຍຜົນສຳເລັດຂອງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ທັງກໍາລັງສ້າງຂະບວນການຕ້ອນຮັບການເລືອກຕັ້ງສະມາຊິກແຫ່ງຊາຊຸດທີ X, ສະ ພາປະຊາຊົນແຂວງຊຸດທີ V ແລະ ສະເຫລີມສະຫລອງສະຖານບູຮານວັດພູຈໍາປາສັກ ຖືກຮັບຮອງເປັນມໍລະດົກໂລກ ຄົບຮອບ 25 ປີ. ໃນໄລຍະຜ່ານມາ, ພັກ ແລະ ລັດຖະບານກໍຄື ແຂວງຈຳປາສັກ ຍາມໃດກໍໄດ້ໃຫ້ຄວາມສຳຄັນ ແລະ ເອົາໃຈໃສ່ຢ່າງຕັ້ງໜ້າ ໃນການອະນຸລັກປົກປັກຮັກສາ ແລະ ເສີມຂະຫຍາຍວັດທະນະທຳ-ຮີດຄອງປະເພນີອັນດີງາມຂອງຊາດ ໂດຍສະເພາະວັດທະນະທຳປູສະນີຍະຖານຜາສາດຫີນວັດພູຈຳປາສັກ ທີ່ເປັນສະຖານວັດຖຸບູຮານເກົ່າແກ່ ແລະ ມີຊື່ສຽງທາງດ້ານປະຫວັດສາດຂອງຊາດລາວເຮົາ ໂດຍໄດ້ຈັດງານບຸນຂຶ້ນທຸກໆປີໃນມື້ຂຶ້ນ 15 ຄໍ່າ ເດືອນ 3 ເພື່ອອະນຸລັກຮັກສາຮີດຄອງປະເພນີອັນດີງາມທີ່ສືບທອດກັນມາແຕ່ດົນນານໃຫ້ມີຄວາມຍືນຍົງ, ທັງເປັນການສ້າງບັນຍາກາດ ໃຫ້ມີຄວາມເບີກບານມ່ວນຊື່ນ ເພື່ອຍູ້ຂະບວນການສ້າງສາພັດທະນາທ້ອງຖິ່ນ ໂດຍສະເພາະການດຶງດູດນັກທ່ອງທ່ຽວ, ການແລກປ່ຽນບົດຮຽນ, ການແລກປ່ຽນ-ຈໍາໜ່າຍສິນຄ້າ, ການສ້າງລາຍຮັບໃຫ້ແກ່ປະຊາຊົນ ແລະ ອື່ນໆ; ສະຖານບູຮານວັດພູຈໍາປາສັກ ໄດ້ຖືກສ້າງຂຶ້ນໃນສະຕະວັດທີ VII ແລະ ມີການບູລະນະ-ປະຕິສັງຂອນເປັນແຕ່ລະໄລຍະເພື່ອອະນຸລັກຮັກສາໃຫ້ສົມບູນຄົບຖ້ວນ. ຍ້ອນຄວາມເອົາໃຈໃສ່ຂອງພັກ-ລັດ ແລະ ຄວາມເປັນເຈົ້າການຂອງປະຊາຊົນລາວບັນດາເຜົ່າໃນການອະນຸລັກປົກປັກຮັກສາ ຈຶ່ງເຮັດໃຫ້ຜາສາດຫີນວັດພູຈຳປາສັກ ຖືກຮັບຮອງຈົດເຂົ້າທະບຽນມໍລະດົກໂລກ ໂດຍອົງການອຸຍແນັສໂກ (UNESCO) ໃນວັນທີ 16 ທັນວາ 2001.

      ພາຍໃນງານ, ປະກອບມີກິດຈະກຳຕ່າງໆຄື: ພິທີເປີດງານທີ່ຍິ່ງໃຫຍ່ ດ້ວຍລະບົບແສງ-ສີ-ສຽງ ເພື່ອສະແດງກ່ຽວກັບປະຫວັດຄວາມເປັນມາຂອງຜາສາດຫີນວັດພູ ໂດຍການສະແດງຮູບພາບປະກອບຕ່າງໆຈາກໂດຣນ ຈຳນວນ 590 ລໍາ ແລະ ການຍິງພຸໄຟຈໍານວນ 250 ລູກ; ການວາງສະແດງ ແລະ ຈໍາໜ່າຍສິນຄ້າ; ການແຂ່ງຂັນກິລາພື້ນເມືອງ; ການສະແດງສິລະປະວັນນະຄະດີ; ການຮັບປະທານອາຫານທ້ອງຖິ່ນທີ່ເປັນເອກະລັກຂອງເມືອງຈໍາປາສັກ; ຈັດກອງປະຊຸມ-ສໍາມະນາວິທະຍາສາດກ່ຽວກັບການເຂົ້າເປັນມໍລະດົກໂລກຂອງວັດພູຈໍາປາສັກ ຄົບຮອບ 25 ປີ; ການກາບໄຫວ້-ບູຊາພະພຸດທະຮູບ ແລະ ເຂົ້າຮ່ວມພິທີທາງສາດສະໜາ (ຟັງທໍາມະ, ສູດປະຣິຕະມຸງຄຸນ) ຕະຫລອດຄືນວັນທີ 01 ກຸມພາ 2026 ແລະ ພິທີໃສ່ບາດຖວາຍສັງຄະທານ ແດ່ພະສົງຫລາຍຮ້ອຍອົງໃນຕອນເຊົ້າຂອງວັນທີ 2 ກຸມພາ 2026.

     ຫລັງຈາກນັ້ນ, ບັນດາການນຳຂັ້ນສູງທີ່ເຂົ້າຮ່ວມກໍໄດ້ໃຫ້ກຽດກົດປຸ່ມ ເພື່ອເປີດບຸນນະມັດສະການຜາສາດຫີນວັດພູຈໍາປາສັກ ປະຈໍາປີ 2026 ຢ່າງເປັນທາງການ ແລະ ສືບຕໍ່ຮັບຊົມການສະແດງຮູບພາບຕ່າງໆດ້ວຍໂດຣນ ຊຶ່ງມີຄວາມສວຍງາມ ແລະ ໄດ້ຮັບຄວາມສົນໃຈຈາກຜູ້ເຂົ້າຮ່ວມງານເປັນຢ່າງດີ.

ຂ່າວ-ພາບ: ກົມປະຊາສໍາພັນ ຫສນຍ.

KPL